បញ្ហាឈឺក្បាលជង្គង់ ឧស្សាហ៍ប្រទះឃើញកើតលើម៉ាក់អ៊ំចាស់ៗណាស់ ប៉ុន្តែក្នុងក៏អាចកើតលើក្មេងៗកម្លាំងពេញបានដូចគ្នា។ ហើយបញ្ហាសុខភាពមួយនេះ គ្មានរបបអាហារណា អាចព្យាបាលស្ថានភាពបានក៏ពិតមែន ប៉ុន្តែបើជ្រើសរើសអាហារឲ្យបានត្រឹមត្រូវ គឺអាចធ្វើឲ្យធូរស្រាលបានមួយកម្រិត។ “Hello គ្រូពេទ្យ’ នឹងណែនាំអាហារពិសេសៗមួយចំនួន អាចជួយបន្ថយអាការៈឈឺក្បាលជង្គង់បាន។
១- ដំបូន្មានសំខាន់ៗដើម្បីកាត់បន្ថយបញ្ហាឈឺក្បាលជង្គង់ដោយសាតរលាក
ដំបូន្មានទីមួយ គឺត្រូវជ្រើសរើសអាហារមានផ្ទុកសារធាតុប្រឆាំងអុកស៊ីតកម្ម ព្រោះអាការៈរលាក នឹងផលិតពពួករ៉ាឌីកាល់សេរី ជាម៉ូលេគុលបំផ្លាញកោសិកា បង្កើយដោយរាងកាយយើងផ្ទាល់ ឬដើម្បីឆ្លើយតបនៅពេលរាងកាយមានជាតិពុល។ ផ្នែករាងកាយ ដូចជា ស្បែក ភ្នែក រួមទាំង Synovium (សន្ទះនៅចន្លោះសន្លាក់ជង្គង់) ងាយនឹងទទួលផលប៉ះពាល់ពីរ៉ាឌីកាល់សេរីទាំងនោះ។ ឯសារធាតុប្រឆាំងអុកស៊ីតកម្មអាចជួយការពាររាងកាយពីរ៉ាឌីកាល់ទាំងនោះបាន។ មានការសិក្សារឃើញថា សាធាតុប្រឆាំងអុកស៊ីតកម្ម អាចជួយប្រយុទ្ធនឹងជំងឺរលាកសន្លាក់ កាត់បន្ថយការរលាក និងបន្ធូរការឈឺចាប់។
ដំបូន្មានទីពីរ ត្រូវគ្រប់គ្រងទម្ងន់ឲ្យបានត្រឹមត្រូវ ព្រោះមានទម្ងន់សមស្រប ពិតជាសំខាន់ណាស់ក្នុងការសម្រួលស្ថានភាពឈឺក្បាលជង្គង់។ បញ្ហាលើសទម្ងន់ មិនត្រឹមតែបង្កើនសម្ពាធលើជង្គង់ប៉ុណ្ណោះទេ វាក៏ភ្ញោចការផលិតអ័រម៉ូន និងធាតុគីមីផ្សេងទៀត បង្កឲ្យមានការរលាក។
២- តិចនិកបញ្ចុះទម្ងន់ពេលមានបញ្ហាឈឺជង្គង់
នៅពេលមានបញ្ហាឈឺក្បាលជង្គង់ដោយសារលើសទម្ងន់ អាចសាកតិចនិកបញ្ចុះទម្ងន់ខាងក្រោមនេះ ដើម្បីស្តារស្ថានភាពជំងឺឲ្យធូរស្រាលវិញបាន៖
– បន្ថយបរិមាណអាហារ
– ជៀសវាងញ៉ាំអាហារមានជាតិកាលឡូរីខ្ពស់
– ព្យាយាមញ៉ាំស៊ុប ពិសេសស៊ុបមានបន្លែច្រើន
គន្លឹះមួយទៀត កុំចម្អិនអាហារប្រើសីតុណ្ហភាពខ្ពស់ពេក ព្រោះពេលយើងចម្អិនអាហារវិធីនេះ សាច់ក្នុងអាហារ និងបង្កើតជាសារធាតុមួយហៅថា Advanced glycation end products (AGEs) ដែលបង្កឲ្យរាងកាយយើងរលាកបាន។
៣- អាហារល្អៗសម្រាប់អ្នកឈឺក្បាលជង្គង់
– វីតាមីន C៖ សារធាតុប្រឆាំងអុកស៊ីតកម្ម មានក្នុងវីតាមីន C អាចជួយក្នុងការលូតលាស់របស់ឆ្អឹង។ បើកង្វះវីតាមីន C អាចបង្កទៅជាបញ្ហាឆ្អឹងពុកផុយ និងបង្កើនសញ្ញាឈឺជង្គង់។ សម្រាប់ប្រុសៗ គេណែនាំឲ្យញ៉ាំវីតាមីន C ចំនួន ៩០ មិល្លីក្រាម/ថ្ងៃ ឯស្រីៗគួរញ៉ាំ ៧៥ មិល្លីក្រាម/ថ្ងៃ ខណៈវិតាមីន C មាននៅក្នុងបន្លែផ្លែឈើដូចជា៖
- ផ្លែឈើតំបន់ត្រូពិក ដូចជា ល្ហុង ត្របែក និងម្នាស់
- ផ្លែឈើមានជាតិជូរ ពិសេស ក្រូច
- ត្រសក់ស្រូវ
- ស្រ្តប៊ើរី
- ផ្លែគីវី
- រាស់ប៊ើរី (Raspberries)
- បន្លែបៃតង ដូចជា ផ្កាស្ពៃ ប្រូខូលី ស្ពៃខៀវ (Kale)
- ប៉េងប៉ោះ
- ម្ទេសប្លោក
– វីតាមីន D៖ ទំនាក់ទំនងរវាងវីតាមីន D និងការរលាក ស្ថិតនៅដំណាក់កាលសិក្សានៅឡើយទេ។ យ៉ាងណាមិញ យើងគួរបញ្ចូលវីតាមីន D ក្នុងរបបអាហារ ព្រោះវីតាមីន D អាចប្រយុទ្ធជាមួយការខូចខាតឆ្អឹង និងកាត់បន្ថយកត្តាប្រឈម លៀនសន្ទះខួរឆ្អឹងខ្នង (Disc Herniation) ខណៈវីតាមីន D មានក្នុងអាហារមួយចំនួនពិសេស៖
- គ្រឿងសមុទ្ រដូចជា ត្រីសាល់ម៉ុន ត្រីសារឌីន បង្គា
- ទឹកដោះគោ
- ស៊ុត (ផ្នែកពណ៌លឿង)
- អាហារផ្ទុកវីតាមីន D ខ្ពស់ដូចជា ទឹកក្រូច គ្រាប់ធញ្ញជាតិ តៅហ៊ូ និងទឹកដោះគោជូរ។
– បេតាការ៉ូទីន (Beta-carotene)៖ Beta-carotene ជាសារធាតុប្រឆាំងអុកស៊ីតកម្ម ជួយប្រយុទ្ធជាមួយរ៉ាឌីកាល់សេរី។ អាហារផ្ទុកជាតិ សារធាតុ Beta-carotene ងាយចំណាំណាស់ គឺពពួកបន្លែផ្លែឈើ មានពណ៌ស្រស់ៗ រួមមាន៖
– បន្លែរាងផ្កា ដូចជា ស្ពៃខៀវ (Kale) ប្រូខូលី បន្លែបៃតង ស្ពៃស
– ដំឡូងជ្វា
– ល្ពៅ
– ត្រសក់ស្រូវ
– សាឡាត
– ស្ពៃពុយឡេង
– ជីអង្កាម
– ប៉េងប៉ោះ
– ទំពាំងបារាំង (Asparagus)
– អាស៊ីដខ្លាញ់អូមេហ្គា ៣៖ អូមេហ្គា ៣ ជាអាស៊ីដខ្លាញ់ ជួយឲ្យសុខភាពល្អជាងគេ សម្រាប់គ្នាយើង និងម៉ាក់អ៊ំមានបញ្ហាឈឺក្បាលជង្គង់។ ខ្លាញ់ដទៃទៀត នឹងបង្កើនការរលាក តែចំពោះអូមេហ្កា ៣ វិញ បែរជាជួយកាត់បន្ថយការរលាក តាមរយៈកាត់បន្ថយការផលិតអង់ស៊ីមស៊ីតូគីន ដែលបំផ្លាញឆ្អឹងយើង។ ក្នុងរបបអាហារ គួរតែបញ្ចូលអូមេហ្គា ៣ ឲ្យបាន ៨៥ ក្រាម/សប្តាហ៍ ខណៈអាហារមានអាស៊ីដខ្លាញ់អូមេហ្កា ៣ ច្រើន មានដូចជា៖
- ត្រីសាល់ម៉ុន
- ត្រីសារឌីន
- ត្រីហារ៉ុង
- ត្រីធូណា
- ត្រីស្បែកា (Mackerel)
- កូនត្រីសារឌីន Anchovy
- ត្រី Rainbow trout
- ស៊ុតដែលមានអូម៉េហ្កា ៣ ច្រើន
- គ្រាប់វ៉លណាត់ (Walnuts)
អត្ថបទពាក់ព័ន្ធ៖
- រវល់ខ្លាំងដល់គ្មានពេលចម្អិនម្ហូប ញ៉ាំអាហារកំប៉ុងល្អអត់?
- កំពូលគុណប្រយោជន៍ពីខ្ញី ពិសេសចំពោះស្រីៗកំពុងមករដូវ
– សារធាតុ Bioflavonoid៖ ប្រភេទសារធាតុ Bioflavonoids ដូចជា Quercetin និង Anthocyanidins អាចបង្កើត រួមគ្នាជាសាធាតុប្រឆាំងអុកស៊ីតកម្ម។ ឥទ្ធិពលប្រឆាំងការរលាករបស់សារធាតុ Quercetin គឺប្រហាក់ប្រហែលនឹងថ្នាំ Aspirin និង Ibuprofen ដែរ ខណៈអាហារមានជាតិ Quercetin មានដូចជា៖
- ខ្ទឹមបារាំង
- ស្ពៃខៀវ Kale
- ប្រូខូលី
- ប្លូប៊ើរី
- ផ្លែ Black currants
- បន្លែបៃតង
- ប៉េងប៉ោះ តូច (Cherry tomatoes)
- ម្សៅកាកាវ
- ផ្លែ Apricot
- ផ្លែប៉ោម (ទាំងសំបក)
– អាហារហឹរ៖ អាហារមានជាតិហឹរខ្លះ អាចមានឥទ្ធិពលប្រឆាំងរលាក ជាពិសេសខ្ញី និងរមៀត។ រមៀត មានប្រសិទ្ធភាពបន្ថយធាតុគីមីដែលបង្កឲ្យរលាក។ ជាឧទាហរណ៍ យើងអាចលាយខ្ញី ជាមួយអាហារឬ ភេសជ្ជៈ ដូចជា តែខ្ញី ឬសាលាដហឹរជាដើម។
– ប្រេងអូលីវ៖ ការស្រាវជ្រាវបានណែនាំថា មានសារធាតុមួយក្នុងប្រេងអូលីវ ឈ្មោះ Oleocanthal អាចជួយបង្ការការរលាកបាន។ រសជាតិប្រេងអូលីវកាន់តែខ្លាំង កាន់តែមាន Oleocanthal ខ្ពស់ដែរ។ បរិមាណប្រេងអូលីវ ៣ ស្លាបព្រាកន្លះ ស្មើរនឹងថ្នាំ Ibuprofen ២០០ មិល្លីក្រាម។ យ៉ាងណា ប្រេងអូលីវ ៣ ស្លាបព្រាបាយកន្លះ ក៏អាចស្មើនឹង ៤០០ កាឡូរី។ ដូចនេះដើម្បីចៀសវាងការឡើងកាឡូរីខ្ពស់ សូមឈប់ប្រើប៊ឺ ឬប្រេងប្រភេទផ្សេងទៀត អំឡុងពេលយើងកំពុងប្រើប្រេងអូលីវ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។
Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmr]
