ឪឡឹក ជាផ្លែឈើពេញនិយមបំផុតទូទាំងពិភពលោក ពិសេសក្នុងរដូវក្តៅ ដោយសារវាសម្បូរជាតិទឹក និងវីតាមីន ជួយទ្រទ្រង់រាងកាយ បញ្ហាសុខភាពជាច្រើន។ ប៉ុន្តែ អ្នកទឹកនោមផ្អែម គួរប្រយ័ត្នជាមួយផ្លែឈើប្រភេទនេះបន្តិច ព្រោះឪឡឹកផ្ទុកសារធាតុមួយចំនួន មានឥទ្ធិពលអវិជ្ជមានលើអ្នកជំងឺ។
១- ផ្លែឪឡឹកមានសារធាតុអ្វីខ្លះ?
យោងតាមក្រសួងកសិកម្មអាមេរិក (USDA) ផ្លែឪឡឹក មានវីតាមីន C ស្មើនឹង ២០% នៃតម្រូវការប្រចាំថ្ងៃយើងម្នាក់ៗ ឯវីតាមីន A វិញមាន ១៧%។ លើសពីនេះ ឪឡឹកក៏មានសារធាតុលីកូប៉ែន ដែលជាសារធាតុប្រឆាំងអុកស៊ីតកម្មដ៏ល្អ ជួយចាប់យករ៉ាឌីកាល់សេរី មានន័យថា ឪឡឹក អាចជួយការពារជំងឺមហារីកទៀតផង។ ក្រៅពីនេះ ផ្លែឪឡឹក ក៏ជួយបំបាត់អាការៈឈឺចាប់សាច់ដុំ និងបន្ថយចង្វាក់បេះដូងបាន។
២- ញ៉ាំឪឡឹកមានសុវត្ថិភាពអត់?
ចំពោះអ្នកទឹកនោមផ្អែម ត្រូវពិចារណាកត្តាសំខាន់ចំនួនពីរ មាន Glycemic index (GI) និង Glycemic load (GL)។
GI បង្ហាញពីល្បឿនស្ករក្នុងអាហារ ចូលទៅក្នុងចរន្តឈាម និងវាមានកម្រិតចន្លោះពី ១-១០០ ដែលអាស្រ័យទៅតាមអាហារប្រភេទនីមួយៗ ដូចជា ស្ករស និងនំប៉័ង ជាដើម។
ចំពោះ GL ជាការរួមបញ្ចូលគ្នារវាង GI និងចំនួនស្ករ (កាបូអ៊ីដ្រាត) ពិតប្រាកដក្នុងអាហារនោះ។ គេជឿថា GL ផ្តល់ពត៌មានច្បាស់ជាង ពីឥទ្ធិពលអាហារប្រភេទណាមួយ ទៅលើជាតិស្ករក្នុងឈាម។ កាលណាកត្តាទាំងពីរនេះកាន់តែខ្ពស់ ជាតិស្ករក្នុងឈាមរងឥទ្ធិពលកាន់តែខ្លាំង។
ផ្លែឪឡឹកមាន GI ចំនួន ៧២ ជាតួលេខមួយខ្ពស់ណាស់។ តែ GL វិញ មានតែចំនួន ២/១០០ ក្រាមប៉ុណ្ណោះ។ ដូចនេះពេលចង់ញ៉ាំឪឡឹក គួរញ៉ាំជាមួយអាហារណាមាន GI ទាប ដើម្បីឲ្យរបបអាហារមានលំនឹង និងការពារការកើនឡើងកម្រិតជាតិស្ករក្នុងឈាម។ គួរពិនិត្យ និងគិតពីរបបអាហាររួម ជាជាងម្ហូបមួយមុខៗ ហើយអាចថែមឪឡឹកជាបង្អែមលាងមាត់ ព្រោះមានវីតាមីន និងជាតិរ៉ែខ្ពស់ តែញ៉ាំមួយល្មមៗបានហើយ។’
អត្ថបទពាក់ព័ន្ធ៖
- បើឈឺ ២ មុខនេះ ត្រូវដឹងអ្វីគួរញ៉ាំ និងមិនគួរ
- អាហារ ២ប្រភេទ ត្រូវតែចៀសវាង បើមានជំងឺអូទីស្សឹម
៣- ចុះផ្លែឈើផ្សេងវិញ?
បើសិនជាមានជំងឺទឹកនោមផ្អែម ខាងក្រោមនេះជាមុខផ្លែឈើ និងបរិមាណ អាចញ៉ាំបានដោយសុវត្ថិភាព៖
– ផ្លែព្រូន (Prune)៖ GI ២៤ និង GL ៤ (ផ្លែព្រូនចំនួន ២ផ្លែ)
– ផ្លែក្រូចថ្លុង៖ GI ២៥ និង GL ៧ (១ផ្លែ)។
ក្រៅពីនេះ ផ្លែស៊េរី ផ្លែអាព្រីកុត និងផ្លែប៉េស មាន GI និង GL ប្រហែលគ្នា។ ផ្លែឈើមាន GI និង GL ទាប នឹងបង្កើនជាតិស្ករទៅក្នុងឈាមតែបន្តិចប៉ុណ្ណោះ ដូចនេះមានសុវត្ថិភាពសម្រាប់អ្នកទឹកនោមផ្អែម អាចញ៉ាំបាន។ គួរតាមដានផែនការរបបអាហារ និងពិភាក្សាជាមួយគ្រូពេទ្យ ដើម្បីទទួលបានរបបអាហារល្អសម្រាប់សុខភាពយើង។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmr]
