ការហាត់ប្រាណត្រូវគេដឹងថាមានប្រយោជន៍ច្រើនចំពោះសុខភាពរាងកាយ និងបេះដូងរបស់យើងគ្រប់គ្នា។ មជ្ឈមណ្ឌលបង្ការ និងគ្រប់គ្រងជំងឺ(CDC) អាមេរិកបានឲ្យដឹងថាជំងឺបេះដូងជាជំងឺជាប់ចំណាត់ថ្នាក់លេខ១នៅអាមេរិក។ ក្នុងមួយឆ្នាំៗពលរដ្ឋអាមេរិកជាង៥០ម៉ឺននាក់ បានជួបបញ្ហាគាំងបេះដូងលើកដំបូងរបស់ខ្លួន ហើយជាង២០ម៉ឺននាក់ផ្សេងទៀតធ្លាប់ឆ្លងកាត់បញ្ហាគាំងបេះដូងនេះ។
មជ្ឈមណ្ឌលបង្ការ និងគ្រប់គ្រងជំងឺអាមេរិកបានបញ្ជាក់ថា ការមិនបញ្ចេញសកម្មភាពរាងកាយ ជាដើមចមនៃការកើតជំងឺបេះដូងនេះ។ ការបញ្ចេញសកម្មភាពរាងកាយបានទៀងទាត់ជួយបញ្ចុះសម្ពាធឈាម និងបង្កើនកម្រិតកូលេស្តេរ៉ូលល្អ។ បើតាមសមាគមជំងឺបេះដូងអាមេរិក បានណែនាំឲ្យយើងហាត់ប្រាណប្រហែល៤០នាទី ពីកម្រិតស្រាលៗ ទៅដល់ខ្លាំងៗ បានពី៣ទៅ៤ដងក្នុងមួយសប្ដាហ៍។
បើតាមសមាគមដដែល ទោះបីយើងជាមនុស្សមានសម្ពាធឈាមខ្ពស់ និងកម្រិតកូលេស្តេរ៉ូលខ្ពស់ក៏ដោយ ឬមានជំងឺបេះដូងក្ដី បើយើងបានហាត់ប្រាណជាទៀងទាត់ យើងមិនងាយស្លាប់មុនអាយុ ដូចអ្នកមានស្ថានភាពសុខភាពដូចគ្នាតែមិនសូវមានសកម្មភាពរាងកាយនោះទេ។
ក្រៅពីការរៀបរាប់ខាងលើការហាត់ប្រាណនឹងជួយយើងបានគុណប្រយោជន៍ទាំងនេះ៖
១. ជួយរក្សាទម្ងន់បានល្អ
ពេលយើងចេះរៀបចំរបបអាហារបានត្រឹមត្រូវ ព្រមជាមួយនឹងការហាត់ប្រាណបានទៀងទាត់ទៀតនោះ យើងនឹងអាចសម្រកទម្ងន់ ឬរក្សាទម្ងន់ដងខ្លួនឲ្យស្ថិតក្នុងសុខភាពល្អ ដែលមានប្រយោជន៍ដល់សុខភាពបេះដូង។ ការលើសទម្ងន់ នឹងដាក់សម្ពាធដល់បេះដូងរបស់យើង ដែលនេះជាកត្តាបង្កឲ្យមានជំងឺបេះដូង និងគ្រោះថ្នាក់ដាច់សរសៃឈាមខួរក្បាល។
២.ពង្រឹងសាច់ដុំ
ការហាត់ប្រាណមានដូចជាដើរ រត់ ហែលទឹក និងទម្រង់ផ្សេងៗមួយចំនួនទៀត សុទ្ធតែចាត់ទុកថាជាសកម្មភាពរាងកាយល្អចំពោះសុខភាពបេះដូង។ សកម្មភាពរាងកាយទាំងនេះ ជួយពង្រឹងសកម្មភាពរបស់សាច់ដុំជួយទាញយកអុកស៊ីសែនពីចរន្តឈាម។ ការណ៍នេះជួយសម្រួលដល់បេះដូង កុំឲ្យប្រឹងបញ្ជូនឈាមកាន់តែច្រើនទៅកាន់សាច់ដុំ។
៣.ជួយបញ្ឈប់ ឬពន្យឺតការវិវត្តកើតជំងឺទឹកនោមផ្អែម
ការសិក្សាបានរកឃើញថា ការហាត់ប្រាណជាទៀងទាត់ ដូចជាជិះកង់ ដើរ ឬហែលទឹកជាដើមជួយកាត់បន្ថយហានិភ័យកើតជំងឺទឹកនោមផ្អែមរហូតដល់៥០ភាគរយ។ សកម្មភាពរាងកាយ ជួយឲ្យសាច់ដុំដំណើរការដុត glycogenបានល្អ ដែលសារធាតុនេះអាចនាំឲ្យយើងឡើងជាតិស្ករក្នុងឈាម និងវិវត្តជាជំងឺទឹកនោមផ្អែម។
៤. កាត់បន្ថយស្ត្រេស
អ័រម៉ូនស្ត្រេសអាចដាក់សម្ពាធបន្ថែមដល់បេះដូង។ ការហាត់ប្រាណដូចជារត់ លើកទម្ងន់ ហាត់យ៉ូហ្កា អាចជួយឲ្យយើងមានអារម្មណ៍ធូរស្រាល និងជួយកាត់បន្ថយស្ត្រេស។
៥. កាត់បន្ថយការរលាក
ហាត់ប្រាណបានទៀងទាត់ អាចជួយកាត់បន្ថយការរលាករ៉ាំរ៉ៃបាន ដោយសារថាប្រព័ន្ធរាងកាយបានសម្របខ្លួនទៅនឹងសកម្មភាពរាងកាយ។ ការណ៍មានសារៈសំខាន់ណាស់ក្នុងការជួយកាត់បន្ថយកត្តាប្រឈមនៃជំងឺផ្សេងៗ ពិសេសជំងឺបេះដូង។
អ្វីដែលយើងអាចសរុបមកវិញបាន គឺថាការហាត់ប្រាណបានទៀងទាត់នឹងជួយដល់ចរន្តឈាម បង្កើនកម្រិតកូលេស្តេរ៉ូលល្អ បញ្ចុះសម្ពាធឈាម និងកាត់បន្ថយហានិភ័យជំងឺនេះដូង។
[embed-health-tool-heart-rate]
