គ្នាយើងច្បាស់ជាធ្លាប់ឭ ឬឃើញពីជំងឺត្រអក ដែលជាជំងឺសើស្បែកធ្វើឲ្យរលាកកោសិកាស្បែក។ ជំងឺត្រអកនេះអាចកើតទៅលើមនុស្សគ្រប់វ័យ ពិសេសគឺទៅលើអាអូនតូចៗ ហើយវាក៏មិនរើសភេទដែរ។ ដូចគ្នានេះ ដ្បិតតែវាជាជំងឺសើស្បែកមែន ក៏ប៉ុន្តែបើវារាលដាលធ្ងន់ធ្ងរ វាក៏អាចប៉ះពាល់ដល់សុខភាព និងស្បែកយើងខ្លាំងដែរ។

តាមលោកវេជ្ជបណ្ឌិត ចាន់ ស៊ីណេត បានឲ្យដឹងថា កាលណាដែលស្បែកយើងមានសុខភាពល្អ វាជួយរក្សាសំណើម និងការពារយើងពីពពួកបាក់តេរី បញ្ហារលាក និងមុខងារធ្វើឲ្យមានអាលែ្លកហ្ស៊ី។ ជំងឺត្រអកមានការពាក់ព័ន្ធនឹងបម្រែបម្រួលហ្សែនដែលប៉ះពាល់ដល់មុខងារការពាររបស់ស្បែកយើង។

វេជ្ជបណ្ឌិតឯកទេសជំងឺទូទៅរូបនេះ បានបញ្ជាក់ថា ជួនកាល បញ្ហាពុលអាហារក៏ជាកត្តាមួយបណ្ដាលឲ្យកើតជំងឺត្រអកនេះទៅលើក្មេងតូចៗដែរ។ នៅពេលដែលជំងឺត្រអក រាលដាលធ្ងន់ធ្ងរ វាអាចបង្កជាផលប៉ះពាល់ដល់សុខភាពនៅផ្នែកផ្សេងទៀតដូចជា៖

កើតហឺត និងគ្រុនក្ដៅ (ក្មេងៗមានជំងឺត្រអកធ្ងន់ធ្ងរអាចវិវត្តជំងឺហឺត និងគ្រុនក្ដៅត្រឹមអាយុ១៣ឆ្នាំ)
បញ្ហាស្ងួត ប្រេះ រមាស់ស្បែករ៉ាំរ៉ៃ
បញ្ហាបង្ករោគលើស្បែក
បញ្ហារលាកប្រអប់ដៃ
បញ្ហារលាកស្បែកទាក់ទងនឹងអាល្លែកហ្ស៊ី
ប៉ះពាល់ដល់គុណភាពគេង (បញ្ហារមាស់ពេកអាចធ្វើឲ្យយើងពិបាកគេង)។ល។

ក្នុងករណីដែលយើងរមាស់ស្បែក មិនស្រណុកខ្លួនប៉ះពាល់ដល់ការគេង ឬសកម្មភាពប្រចាំថ្ងៃ មានការបង្ករោគលើស្បែក ឬទោះខំប្រើក្បូនធម្មជាតិព្យាបាល នៅតែមិនជា គួរទៅជួបគ្រូពេទ្យជំនាញសើស្បែកទើបល្អ។ ជាពិសេសពេលដែលឃើញក្មេងៗឡើងកន្ទួលដូចឆ្លងមេរោគលើស្បែក និងមានក្ដៅខ្លួនត្រូវយកទៅជួបពេទ្យឲ្យបានលឿន។

ម៉្យាងវិញទៀត យើងក៏អាចការពារខ្លួនឯង កុំឲ្យកើតជំងឺត្រអកបានដោយតិចនិកប៉ុន្មាននេះរួមមាន៖

– លាបឡេ ឬគ្រីមផ្ដល់សំណើមយ៉ាងតិច ២ដង/ថ្ងៃ

– ព្យាយាមចៀសវាងកត្តាដែលនាំឲ្យជំងឺត្រអកធ្វើទុក្ខ

– ចៀសវាងងូតទឹកយូរៗ (ត្រឹម១០-១៥នាទីល្មម)

– ចៀសវាងជូតសម្អាតខ្លួនខ្លាំង ក្រោយងូតទឹករួច

– ប្រើសាប៊ូស្រទន់លើស្បែក។ល។

ជំងឺត្រអកលើកូនក្មេង

ប្រយ័ត្ន! កើត​ជំងឺ​ត្រអក​ធ្ងន់ធ្ងរ ចៀសមិនផុតពីផលប៉ះពាល់រ៉ាំរ៉ៃទាំងនេះទេ

ប្រយ័ត្ន! កើតជំងឺត្រអកធ្ងន់ធ្ងរ ចៀសមិនផុតពីផលប៉ះពាល់រ៉ាំរ៉ៃទាំងនេះទេ