ការសិក្សាថ្មីមួយ បានរកឃើញថាអ្នកមានសុខភាពល្អមិនគួរប្រើថ្នាំ Aspirin ដើម្បីបង្ការជំងឺបេះដូង ដូចការណែនាំរបស់ការសិក្សាកន្លងទៅនេះទេ ព្រោះថាថ្នាំនេះអាចផលប៉ះពាល់មិនល្អ ច្រើនជាងផលប្រយោជន៍ ដែលនេះហាក់ផ្ទុយទៅនឹងការសិក្សាមុនៗបានណែនាំឲ្យមានការប្រើប្រាស់ថ្នាំ aspirin រាល់ថ្ងៃដើម្បីបង្ការជំងឺគាំងបេះដូង។

សារព័ត៌មាន CNN ចុះផ្សាយកាលពីថ្ងៃទី៣ ខែមិថុនា ថា ថ្នាំ aspirin នៅតែជាថ្នាំដែលគេប្រើទូទៅនៅជុំវិញពិភពលោកទោះបីជាអាជ្ញាធរសុខាភិបាលជាច្រើនណែនាំមិនឲ្យប្រើថ្នាំនេះទៀតក៏ដោយ។ ការសិក្សាឡើងវិញមិនបានរកឃើញភស្តុតាងណាដែលថាមនុស្សពេញវ័យដែលមានសុខភាពបេះដូងល្អគួរប្រើថ្នាំ aspirin ក្នុងកម្រិតទាបនោះ (តិចជាង ៣២៥មិល្លីក្រាមក្នុងមួយថ្ងៃ) ទេ។

ការសិក្សាឡើងវិញនេះបានផ្ដោតសំខាន់លើហានិភ័យ និងអត្ថប្រយោជន៍នៃការប្រើថ្នាំ aspirin ក្នុងកម្រិតទាបបានរកឃើញថាហានិភ័យនៃការហូរឈាមច្រើនដែលជាលទ្ធផលនៃឥទ្ធិពលពង្រាវឈាមរបស់ថ្នាំនេះមានទម្ងន់ធ្ងន់ជាងអត្ថប្រយោជន៍។

គោលការណ៍ណែនាំរបស់សហរដ្ឋអាមេរិកទៅលើការប្រើប្រាស់ថ្នាំ aspirin ប្រចាំថ្ងៃបានផ្លាស់ប្តូរកាលពីឆ្នាំមុនដោយណែនាំថាការប្រើប្រាស់ថ្នាំ aspirin ជាប្រចាំគឺសម្រាប់អ្នកមានជំងឺគាំងបេះដូង ជំងឺដាច់សរសៃឈាមក្នុងខួរក្បាល ឬអ្នកធ្លាប់វះកាត់បេះដូងប៉ុណ្ណោះ។

ការវិភាគថ្មីៗដែលមើលទៅលើការសិក្សាចំនួន៦៧បានរកឃើញថាការប្រើប្រាស់ថ្នាំ aspirin កម្រិតទាបចំពោះមនុស្សមិនមានជំងឺបេះដូងបានផ្សាភ្ជាប់នឹងការថយចុះ ១៧%នៃបញ្ហាបេះដូង ដូចជាគាំងបេះដូង និងជំងឺដាច់សរសៃឈាមខួរក្បាលមែន។ ប៉ុន្តែអាចនឹងបង្កហានិភ័យខ្ពស់រហូតដល់ ៤៧% នៃការហូរឈាមក្នុងក្រពះពោះវៀន និង៣៤%នៃការហូរឈាមក្នុងលលាដ៍ក្បាល។

ការសិក្សារបស់វេជ្ជបណ្ឌិត Lee Smith អ្នកអត្ថាធិប្បាយផ្នែកសកម្មភាពរាងកាយ និងសុខភាពសាធារណៈនៅសាកលវិទ្យាល័យ Anglia Ruskin ប្រទេសអង់គ្លេស និងវេជ្ជបណ្ឌិត Nicola Veronese អ្នកឯកទេសព្យាបាលជំងឺមនុស្សចាស់នៅសាកលវិទ្យាល័យ Palermo នៅប្រទេសអ៊ីតាលីបានឲ្យដឹងថាមិនមានភស្តុតាងគាំទ្រលើការប្រើប្រាស់ថ្នាំ aspirin ចំពោះអ្នកមានសុខភាពល្អទេ។ ប៉ុន្តែការប្រើប្រាស់ថ្នាំនេះល្អសម្រាប់អ្នកដែលមានបញ្ហាបេះដូង។

លោក Smith និង លោកVeronese បានបន្តទៀតថាការប្រើប្រាស់ថ្នាំ aspirin ក្នុងកម្រិតទាបគឺជារឿងធម្មតា ប៉ុន្តែការសិក្សាឡើងវិញរបស់លោកបានណែនាំថាហានិភ័យនៃការប្រើប្រាស់ថ្នាំអាចបណ្ដាលឲ្យមានការហូរឈាម ដែលនេះមិនមែនជារឿងតូចតាចទេ។

ការសិក្សានេះក៏បានសម្គាល់ទៀតថាប្រជាជនអាមេរិករាប់លាននាក់ដែលមិនមានជំងឺបេះដូងនៅតែបន្តប្រើប្រាស់ថ្នាំ aspirin ដើម្បីបង្ការជំងឺបេះដូងដោយគ្មានការណែនាំពីគ្រូពេទ្យ ទោះបីជាគោលការណ៍ថ្មីបានលើកឡើងពីហានិភ័យក៏ដោយ។

គេក៏បានសិក្សាទៅលើការស្រាវជ្រាវដែលគាំទ្រដល់ការប្រើប្រាស់ថ្នាំ aspirin ដើម្បីបង្ការជំងឺមហារីកដែរ ហើយការសិក្សាមិនជំរុញឲ្យប្រើប្រាស់ថ្នាំ aspirin ក្នុងកម្រិតទាបសម្រាប់បង្ការជំងឺមហារីកដែរ។

អត្ថបទពាក់ព័ន្ធ៖

ចិនរកឃើញថ្នាំផ្សំពីរុក្ខជាតិក្នុងទឹក សម្រាប់ព្យាបាលមុខរបួសអ្នកជំងឺទឹកនោមផ្អែម
ប្រយ័ត្ន! បើអ្នកផ្ទះមានជំងឺលើសឈាម គួរកុំឲ្យប្រើថ្នាំប៉ុន្មានមុខនេះ
ប្រការគួរធ្វើ និងចៀសវាង ដើម្បីបង្ការជំងឺមហារីក បេះដូង ទឹកនោមផ្អែម
សញ្ញាគាំងបេះដូង ស្រីៗភាគច្រើនមិនសូវខ្វល់ តែគ្រោះថ្នាក់ធ្ងន់
Heart attack (គាំងបេះដូង)

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ការសិក្សាថ្មី៖ អ្នកមានសុខភាពល្អមិនគួរប្រើថ្នាំ Apsirin រាល់ថ្ងៃសម្រាប់បង្ការជំងឺបេះដូងទេ