បញ្ហាទម្លាប់រស់នៅ អាហារ និងខ្វះពេលហាត់ប្រាណទៀតនោះ ធ្វើឲ្យមនុស្សប្រឈមនឹងការកើតជំងឺមហារីក។ ជំងឺសាហាវនេះ បើកើតហើយ ពិបាកនឹងព្យាបាលណាស់ ដោយសារកោសិកាមេរោគ តែងតែវិវត្តខ្លួន ធ្វើឲ្យស៊ាំនឹងការព្យាបាល។ តែថ្នាំវីតាមីន D អាចជួយកាត់បន្ថយហានិភ័យនៃការស្លាប់ដោយជំងឺមហារីក។

ការសិក្សាចំនួន ៣ មានលទ្ធផលស្រដៀងគ្នា គឺ ថ្នាំគ្រាប់វីតាមីន D អាចជួយកាត់បន្ថយហានិភ័យ នៃការស្លាប់ដោយជំងឺមហារីកបាន តែកុំយល់ច្រឡំថា នេះជាថ្នាំបង្ការមហារីកឲ្យសោះ។

ការសិក្សាទី១ ធ្វើឡើងដោយសាកលវិទ្យាល័យ Michigan និងមជ្ឈមណ្ឌលវេជ្ជសាស្ត្រ Hurley របស់អាមេរិក លើមនុស្សពេញវ័យ ចំនួន ៨ម៉ឺននាក់។ លទ្ធផល រកឃើញថា ការលេបថ្នាំគ្រាប់វីតាមីន D យ៉ាងតិច ៣ឆ្នាំ ពាក់ព័ន្ធនឹងការធ្លាក់ចុះ ១៣% នៃការស្លាប់ដោយជំងឺមហារីកគ្រប់ប្រភេទទាំងអស់។

ការសិក្សាទី២ ធ្វើឡើងដោយមន្ទីរពេទ្យសាកលវិទ្យាល័យ Madrid របស់អេស្ប៉ាញ រកឃើញថា ការលេបថ្នាំគ្រាប់វីតាមីន D ជាមួយពពួកថ្នាំបញ្ចុះជាតិខ្លាញ់ Statin រាល់ថ្ងៃ ពាក់ព័ន្ធនឹងការកាត់បន្ថយ ៣៨% នៃការស្លាប់ដោយមហារីកក្រពេញប្រូស្ដាត។ អ្នកវិទ្យាសាស្ត្រ បញ្ជាក់ថា ឥទ្ធពលថ្នាំទាំងពីរ មានលក្ខណៈឯករាជ្យដាច់ដោយឡែកពីគ្នា។

ការសិក្សាទី៣ ធ្វើឡើងដោយវិទ្យាស្ថានបណ្ដាញសុខាភិបាលមហារីក Allegheny ក្នុងក្រុង Pittsburgh របស់អាមេរិក រកឃើញថា ការធ្លាក់ចុះកម្រិតវីតាមីន D ក្នុងខ្លួន ប្រឈមទ្វេដង នឹងជំងឺមហារីកលំពែង។

អត្ថបទពាក់ព័ន្ធ៖

លោកវេជ្ជបណ្ឌិត Tarek Haykal អ្នកស្រាវជ្រាវ នៃសាកលវិទ្យាល័យ Michigan បញ្ជាក់ថា ការរកឃើញនេះ ផ្ដល់សារៈប្រយោជន៍ដល់ប្រជាជន ដោយការលេបថ្នាំគ្រាប់វីតាមីន D ក្នុងទម្រង់ណាក៏ដោយ រយៈពេល ៣ឆ្នាំ ជួយកាត់បន្ថយការស្លាប់ដោយជំងឺមហារីក។ លោកក៏ព្រមាន អ្នកចំណាយពេលរាប់ម៉ោង ធ្វើការនៅក្នុងការិយាល័យផងដែរ ព្រោះពួកគេមានពេលលំហែតិចតួច មិនទទួលបានភាពធម្មជាតិ និងពន្លឺព្រះអាទិត្យ ដូច្នេះកម្រិតវីតាមីន D ក្នុងខ្លួន បានធ្លាក់ចុះ ងាយបង្កឲ្យកើតជំងឺមហារីក។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

​ថ្នាំ​គ្រាប់​វីតាមីន D អាច​បន្ថយ​ហានិភ័យ​ស្លាប់​ដោយ​មហារីក​គ្រប់ប្រភេទ​

ថ្នាំគ្រាប់វីតាមីន D អាចបន្ថយហានិភ័យស្លាប់ដោយមហារីកគ្រប់ប្រភេទ