ប៉ុន្មានថ្ងៃនេះមានករណីមនុស្សដួលសន្លប់ និងស្លាប់ភ្លាមៗ ដែលក្នុងនោះមានទាំងជនជាតិបរទេស និងជនជាតិខ្មែរ។ ស្របពេលដែលភិភពលោកកំពុងវាយលុយដោយ COVID-19 ធ្វើឲ្យមតិសាធារណៈមួយចំនួនសង្ស័យថា អ្នកទាំងនោះសន្លប់ ឬស្លាប់ដោយCOVID-19?

បដិសេធការលើកឡើងខាងលើនេះ នាយកដ្ឋានប្រយុទ្ធនឹងជំងឺឆ្លង នៃក្រសួងសុខាភិបាលបកស្រាយថា ជំងឺឆ្លងទាំងអស់ ក្នុងនោះមានទាំងជំងឺ COVID-19 មិនអាចធ្វើឲ្យអ្នកជំងឺដួលសន្លប់ ឬស្លាប់ភ្លាមៗទាន់ហន់បានទេ។ ជំងឺឆ្លងត្រូវការពេលវេលាច្រើនថ្ងៃដើម្បីវិវត្តជំងឺ ដូចជា ចាប់ផ្តើមក្តៅខ្លួន អស់កម្លាំង ក្អកស្ងួត ហៀរសម្បោរ និងករណីធ្ងន់ធ្ងរអាចវិវត្តទៅហត់ស្រាល និងវិវត្តសន្សឹមៗទៅហត់មធ្យម ហើយបន្ទាប់មកហត់ខ្លាំង។

ក្នុងនោះដែរ នាយកដ្ឋានប្រយុទ្ធនឹងជំងឺឆ្លង បញ្ជាក់ថា អ្នកជំងឺដែលដួលសន្លប់ ឬអាចស្លាប់ទាំងទាន់ហន់ភ្លាមៗ ច្រើនតែជាអ្នកជំងឺមិនឆ្លង ដូចជា ជំងឺគាំងបេះដូង គ្រោះថ្នាក់សរសៃឈាមខួរក្បាល ជំងឺខ្វះអុកស៊ីសែនខួរក្បាលរយៈពេលខ្លី (ខ្យល់គរ) ឈរក្រោមកម្តៅថ្ងៃធ្វើឲ្យខ្សោះជាតិទឹកធ្ងន់ធ្ងរ ផឹកស្រាស្រវឹងធ្ងន់ធ្ងរ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

អាចទេ អ្នកឆ្លង COVID-19 ដួលសន្លប់ ឬស្លាប់ភ្លាមៗ?