ជក់បារីប៉ះពាល់ដល់សម្ពាធឈាមបែបណា? មិនថាយើងមានជំងឺលើសសម្ពាធឈាម ឬអន់នោះទេ ការជក់បារីបង្កផលវិបាកច្រើនយ៉ាងចំពោះសុខភាព។ បើសិនជាយើងកំពុងមានជំងឺលើសសម្ពាធឈាម ហើយជក់បារីទៀតកាន់តែគ្រោះថ្នាក់ថែមខ្លាំង។ ហេតុអ្វី?
មានជំងឺលើសសម្ពាធឈាម ហើយជក់បារីទៀត កាន់តែគ្រោះថ្នាក់
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១. អ្វីជាជំងឺលើសសម្ពាធឈាម
ដើម្បីឲ្យងាយយល់យើងអាចប្រៀបធៀបសរសៃឈាមអាក់ទែទៅនឹងទុយយោទឹក ដែលមានមាននាទីនាំឈាមទៅកាន់បេះដូង និងគ្រប់កន្លែងនៃរាងកាយ។ សម្ពាធឈាម គឺការកើនឡើងនៃកម្លាំងរបស់ឈាមដែលដាក់ទៅលើជញ្ជាំងនៃសរសៃឈាម។ បើសិនជាឈាមរត់ឆ្លងកាត់សរសៃឈាម ដោយមានកម្លាំងខ្លាំងជាងធម្មតានោះមានន័យថាយើងមានសម្ពាធឈាមខ្ពស់។
មិនថាក្មេង ឬចាស់ គួរតែពិនិត្យសម្ពាធឈាមរបស់ខ្លួន ពិសេសអ្នកមានវ័យចាប់ពី២១ឆ្នាំឡើងគួរពិនិត្យយ៉ាងតិចម្ដងក្នុងមួយឆ្នាំ និងសម្រាប់អ្នកធ្លាប់មានប្រវត្តិលើសឈាម គួរតែពិនិត្យឲ្យបានញឹកញាប់ជាងនេះ។
ជំងឺលើសសម្ពាធឈាមអាចធ្វើឲ្យខូចសរសៃឈាមអាក់ទែ និងសរសៃឈាមវែន ឬនិយាយខ្លីថាធ្វើឲ្យខូចសរសៃឈាម។ ការខូចខាតសរសៃឈាមអាចធ្វើឲ្យយើងមានហានិភ័យជួបបញ្ហាគ្រោះថ្នាក់សរសៃឈាមខួរក្បាល ខូចតម្រងនោម ជំងឺបេះដូង និងគាំងបេះដូង។
ដើម្បីបញ្ចុះសម្ពាធឈាមវិញ គ្រូពេទ្យអាចណែនាំឲ្យអ្នកជំងឺផ្លាស់ប្តូរបែបបទរស់នៅមួយចំនួន ដូចរបបអាហារ និងហាត់ប្រាណជាប្រចាំ ជាដើម ប៉ុន្តែបើការផ្លាស់ប្ដូរនេះមិនជួយបានទេ គ្រូពេទ្យអាចចេញវេជ្ជបញ្ជាឲ្យប្រើប្រាស់ថ្នាំ ដើម្បីបញ្ចុះសម្ពាធឈាម។
២. ជក់បារីប៉ះពាល់បែបណាលើអ្នកមានជំងឺលើសសម្ពាធឈាម?
ជាតិនីកូទីននៅក្នុងបារី និងថ្នាំជក់ ធ្វើឲ្យសរសៃឈាមរួមតូច និងធ្វើឲ្យបេះដូងដើរញាប់ ជាធម្មតា ជាហេតុធ្វើឲ្យសម្ពាធឈាមឡើងកាន់តែខ្ពស់។ មិនថាយើងជក់បារី ឬស្រូបផ្សេងបារីនោះទេ វានឹងបង្កហានិភ័យក្នុងការកកើតឡើងនៃដុំកំណកខ្លាញ់នៅក្នុងសរសៃឈាមរបស់អ្នកជក់ ឬអ្នកស្រូបផ្សេងបារី ដែលនេះក៏ជាមូលហេតុធ្វើឲ្យសម្ពាធឈាមឡើងខ្ពស់។
រាល់ពេលជក់បារី អ្នកជក់បារីនឹងមានសម្ពាធឈាមឡើងខ្ពស់ជាបណ្ដោះអាសន្នផងដែរ។ បើសិនជាយើងឈប់ជក់បារី ឬប្រើថ្នាំជក់ នោះយើងអាចបន្ថយកម្រិតសម្ពាធឈាម និងហានិភ័យជំងឺបេះដូង និងអាការៈគាំងបេះដូងបានដែរ។
ក្រៅពីបារី ការផឹកគ្រឿងស្រវឹង ក៏ធ្វើឲ្យឡើងសម្ពាធឈាមដែរសម្រាប់មនុស្សមួយចំនួន ហើយអ្នកមានជំងឺលើសសម្ពាធឈាមមិនគួរផឹកស្រាបៀរលើសពីមួយកំប៉ុងក្នុងមួយថ្ងៃ និងបើផឹកហើយ ឃើញថាសម្ពាធឈាមឡើង គួរតែឈប់ផឹកជាជម្រើសល្អបំផុត។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម