បញ្ហាទល់លាមកជាបញ្ហាទូទៅមួយដែលគ្នាយើងធ្លាប់ជួបប្រទះ ហើយនិយមគិតថា គ្រាន់តែជាបញ្ហាធម្មតាអ្នកណាៗក៏ជួប មិនបាច់ទៅឈឺក្បាលវិលមុខនឹងបញ្ហាទល់លាមកទេ។ តាមពិតទៅ បញ្ហាទល់លាមកនេះ មិនមែនសាមញ្ញដូចដែលយើងគិតទេ ប្រសិនបើយើងមិនចាប់អារម្មណ៍ ហើយទុកបញ្ហាទល់លាមកយូរ អាចបង្កជាបញ្ហាសុខភាពផ្សេងៗទៀត។
អ្នកជំងឺទល់លាមកតែងគិតថាវារឿងធម្មតាប៉ុណ្ណោះ តែនៅពីខាងក្រោយបញ្ហាមួយនេះ មានកត្តា និងមូលហេតុច្រើនទៀតដែលមានខ្លះទាមទារការពិគ្រោះ និងពិនិត្យរកមូលហេតុច្បាស់លាស់។ បញ្ហាទល់លាមកអាចជាការរំខានដល់សុខភាពទាំងផ្លូវកាយ និងផ្នែកអារម្មណ៍ផងដែរ។នេះបើតាមការចុះផ្សាយរបស់មន្ទីរពេទ្យ កាល់ម៉ែត។
ផលវិបាកនៃបញ្ហាទល់លាមក៖
– អាចកើតជំងឺឫសដូងបាត
– អាចដាច់រហែកភ្នាសបាត និងបង្កជាការធ្លាក់ឈាម ឬឈឺចាប់ពេលបត់ជើងធំ
– បើមានបញ្ហាទល់លាមកយូររ៉ាំរ៉ៃ អាចបណ្ដាលឲ្យកើតបញ្ហាខ្សោយពោះវៀនធំ និងប្រឈមមុខទៅនឹងជំងឺមហារីកពោះវៀនធំ។ល។
គ្នាយើងគួរយកចិត្តទុកដាក់ និងប្រយ័ត្នចំពោះបញ្ហាទល់លាមកនេះ និងត្រូវដឹងពីរោគសញ្ញាមួយចំនួនបញ្ជាក់ថាបញ្ហាទល់លាមកមានសភាពធ្ងន់ធ្ងរ ហើយរោគសញ្ញារួមមាន ទល់លាមកលើសពី ២ថ្ងៃឡើង ទម្ងន់ស្រកលឿនខុសធម្មតា ស្លេកស្លាំង បត់ជើងធំមានឈាម ឈឺចុកចាប់ក្នុងពោះរ៉ាំរ៉ៃ។ល។
ដូចនេះហើយ យើងគ្រប់គ្នាគួរថែទាំប្រព័ន្ធរំលាយអាហារឲ្យបានដិត ដើម្បីបង្ការបញ្ហាទល់លាមក ក៏ដូចជាបញ្ហាធ្ងន់ធ្ងរដទៃ ហើយតិចនិកខាងក្រោមប៉ុន្មាននេះអាចជួយបានការពារយើងពីការទល់លាមកបាន៖
១. ញ៉ាំអាហារសម្បូរជាតិសរសៃឲ្យបានច្រើន (សណ្ដែក ផ្លែប៉ោម ផ្លែប៊ើរី ដំឡូងជ្វា…)
២. កាត់បន្ថយអាហារកែច្នៃ និងសាច់
៣. រៀនគ្រប់គ្រងស្ត្រេស
៤. កុំខំប្រឹងទប់ពេលឈឺពោះ ឬពេលបត់ជើង
៥. ហាត់ប្រាណឲ្យបានទៀងទាត់។ល។
[embed-health-tool-bmr]
