បើនិយាយដល់បាក់តេរីក្នុងពោះវៀន កាលពីជាងមួយទសវត្សរ៍មុនទំនងជាមិនមានអ្នកជឿទេថាបាក់តេរីទាំងនេះអាចរួមចំណែកធ្វើឲ្យមនុស្សយើងឡើងគីឡូបាន។ ប៉ុន្តែការសិក្សាមួយចំនួនធ្វើឡើងជាបន្តបន្ទាប់រហូតមកដល់ឆ្នាំ២០២១នេះ គេឃើញថាថាបាក់តេរីក្នុងពោះវៀនមួយចំនួនពិតជាបានជួយបំបែកអាហារធ្វើឲ្យរាងកាយស្រូបយកកាឡូរី និងខ្លាញ់បានកាន់តែច្រើន ដែលជាកត្តាមួយធ្វើឲ្យមនុស្សយើងឡើងគីឡូ ឬពិបាកសម្រកទម្ងន់។
បាក់តេរីក្នុងពោះវៀនខ្លះធ្វើឲ្យមនុស្សឡើងគីឡូ មិនងាយស្រក
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ប្រហែលមួយសតវត្សរ៍មកហើយ ដែលអ្នកវិទ្យាសាស្រ្តដឹងថាបាក់តេរីរស់នៅក្នុងពោះវៀនរបស់មនុស្សយើង ប៉ុន្តែគ្រាន់តែគិតថាពពួកបាក់តេរីទាំងនោះមានប្រយោជន៍តិចតួចដល់សុខភាព និងបានត្រឹមស្រូបយកសារធាតុចិញ្ចឹមពីពោះវៀនមនុស្សតែប៉ុណ្ណោះ។
ក្នុងរយៈពេលក្រោយៗមកអ្នកអ្នកវិទ្យាសាស្ត្របានរកឃើញពីចំនួន និងរូបរាងហ្សែនរបស់បាក់តេរីនៅក្នុងពោះវៀនទាំងនោះ។ អ្វីដែលបានរកឃើញបានធ្វើឲ្យអ្នកវិទ្យាសាស្រ្តមានការភ្ញាក់ផ្អើលយ៉ាងខ្ឡាំង។ បាក់តេរីនៅក្នុងពោះវៀនរបស់មនុស្សយើងមានចំនួនហ្សែនពី២៥០ទៅ៨០០ដងច្រើនជាងហ្សែនរបស់មនុស្សយើង។ អ្វីដែលគួរឲ្យកត់សម្គាល់នោះ គឺថាបាក់តេរីទាំងនេះបានបង្កើតសារធាតុផ្សេងៗចូលទៅក្នុងចរន្តឈាមរបស់មនុស្ស ដែលមានឥទ្ធិពលលើសារធាតុគីមីរាងកាយ។ ក្នុងន័យនេះហើយ បានជាបាក់តេរីក្នុងពោះវៀនទំនងជាមានឥទ្ធិពលលើសុខភាព។
ចុះបាក់តេរីមានឥទ្ធិពលលើការឡើងទម្ងន់បែបណា? ពេលយើងញ៉ាំអាហារ ពោះវៀនរបស់យើងនឹងបំបែកអាហារជាចំណែកតូចៗ ហើយមានតែបំណែកអាហារតូចៗបំផុតប៉ុណ្ណោះដែលអាចត្រូវស្រូបចូលទៅក្នុងឈាម។ អាហារដែលនៅសល់នឹងត្រូវបញ្ចេញចោល ឬអាចនិយាយបានម្យ៉ាងទៀតថាមិនមែនគ្រប់កាឡូរីក្នុងអាហារដែលយើងញ៉ាំសុទ្ធតែអាចចូលទៅក្នុងរាងកាយធ្វើឲ្យយើងឡើងទម្ងន់នោះទេ។
ប៉ុន្តែពពួកបាក់តេរីម្យ៉ាង នៅក្នុងពោះវៀនមនុស្សមួយចំនួន បានជួយបំបែកអាហារនេះបន្ថែមទៀតឲ្យកាន់តែល្អិតមែនទែន។ បាក់តេរីប្រភេទនេះជួយបំបែកអាហារឲ្យកាន់តែតូចនិងងាយស្រួលសម្រាប់ការរំលាយ ដែលនាំឲ្យបន្ថែមកាឡូរីចូលទៅក្នុងរាងកាយ អាចនាំឲ្យយើងឡើងគីឡូ។
មួយវិញទៀតបាក់តេរីក្នុងពោះវៀនប្រភេទនេះ ក៏មានទំនាក់ទំនងក្នុងយន្តការធ្វើមេតាប៉ូលិសដែលធ្វើឲ្យការស្រួបយកខ្លាញ់បានកាន់តែមានប្រសិទ្ធភាព។ ប៉ុន្តែនៅពេលការស្រូបយកខ្លាញ់នោះកាន់តែច្រើន វានឹងធ្វើឲ្យមនុស្សយើងទៅជាធាត់ទៅវិញ។
ដូចនេះ ជាទ្រឹស្ដី បើសិនជារាងកាយយើងមានបាក់តេរីប្រភេទនេះកាន់តែច្រើន យើងនឹងកាន់តែពិបាកក្នុងការសម្រកគីឡូ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម