ធ្លាប់ត្រូវជំងឺហឺតធ្វើទុក្ខធ្ងន់ធ្ងរភ្លាមៗអត់? នេះវិធីដោះស្រាយ

ធ្វើទុក្ខម្តងៗពិតជាពិបាកណាស់មិនអ៊ីចឹង បើមិនកើតហឺត ម៉េចដឹងថាវេទនាប៉ុណ្ណា? ហឺតអាចបង្កជាបញ្ហាធ្ងន់ភ្លាមៗ ហើយដើម្បីចៀសឆ្ងាយពីរឿងអាក្រក់ទាំងនេះ ឬមិនចង់កើតជំងឺហឺត “Hello គ្រូពេទ្យ’ មានវិធីសាស្ត្រពិសេសៗមួយចំនួនចង់ប្រាប់។

១- ប្រើថ្នាំតាមវេជ្ជបញ្ជា

ចង់ជា ចង់គ្រាន់បើ ធ្វើតាមពេទ្យទៅ មិនខុសទេ។ ជាធម្មតា គ្នាយើងមានជំងឺមិនប្រាកដថា បានប្រើប្រាស់ថ្នាំតាមគ្រូពេទ្យប្រាប់ទេ។ នេះអាចមកពីវេជ្ជបញ្ជាមានភាពស្មុគស្មាញពេក រយៈពេលព្យាបាលកាន់តែយូរ ធ្វើឲ្យការចំណាយកាន់តែច្រើន ឬពិបាកចាំពេលវេលាប្រើប្រាស់ថ្នាំជាដើម។ ទាក់ទង ការប្រើប្រាស់ថ្នាំតាមវេជ្ជបញ្ជា គឺសំខាន់ណាស់ដើម្បីព្យាបាលជំងឺហឺត។ ថ្នាំអាចជួយយើងជំងឺគ្រប់គ្រងស្ថានភាពជំងឺ និងការពារមិនឲ្យប្រែកាន់តែធ្ងន់ធ្ងរ។ ករណីខ្លះយើងអាចឈប់លេបថ្នាំដោយគិតថាបានធូរស្រាលជាងមុន។ យ៉ាងណា គ្នាយើងអាចនឹងកើតជំងឺនេះគ្រប់ពេល ទោះមិនធ្លាប់កើតពីមុនក៏ដោយ។

២- ហាត់ប្រាណឲ្យទៀងទាត់

ហាត់ប្រាណទៀងទាត់ ជួយសុខភាពយើងបានច្រើនណាស់ ទោះមាន ឬគ្មានជំងឺក្នុងខ្លួនក៏ដោយ។ ចំពោះគ្នាយើងកើតហឺត នៅតែអាចហាត់បានធម្មតា គ្រាន់តែត្រូវរើសការហាត់កុំសមស្រប។ ហាត់ប្រាណទៀងទាត់អាចជួយពង្រឹងដល់បេះដូង និងសួត។ ដោយសារតែជំងឺហឺតជាបញ្ហារបស់ផ្លូវដង្ហើម ដូច្នេះយើងអាចកាត់បន្ថយរោគសញ្ញា និងគ្រប់គ្រងជំងឺហឺតដូចគ្នា។ ពិតណាស់ គ្រូពេទ្យតម្រូវឲ្យយើងធ្វើលំហាត់ប្រាណជាក់លាក់ខ្លះដើម្បីជួយដល់ជំងឺហឺត។ ហេតុនេះ ត្រូវចាំ និងធ្វើតាមការណែនាំរបស់ពេទ្យ។ ប្រសិនបើយើងធ្វើលំហាត់ប្រាណក្នុងសីតុណ្ហភាពត្រជាក់ ត្រូវប្រាកដថាបានពាក់ម៉ាសដើម្បីរក្សាកម្ដៅខ្យល់ដង្ហើម។

ជំងឺហឺត

៣- រក្សាទម្ងន់ឲ្យសមស្រប

ការឡើងលើសទម្ងន់ ឬធាត់ អាចធ្វើឲ្យជំងឺហឺតកាន់តែពិបាក និងកាត់បន្ថយសមត្ថភាពគ្រប់គ្រងជំងឺថែមទៀត។ គ្នាយើងមានសន្ទស្សន៍នៃទម្ងន់ BMI ធំជាង ឬស្មើ ៣០ (កម្រិតធម្មតា ១៨,៥-២៤,៩) មានឱកាសកើតជំងឺហឺតកាន់តែខ្ពស់។ លើសទម្ងន់ហួសប្រមាណនៅជុំវិញទ្រូង និងពោះ អាចមានផលប៉ះពាល់ដល់សួត ធ្វើឲ្យពិបាកដកដង្ហើម។ លើសពីនេះទៅ ជាលិកាខ្លាញ់អាចបង្កើតសារធាតុរលាកប៉ះពាល់ដល់ជំងឺហឺត។ គ្នាយើងមានទម្ងន់ច្រើន និងមានជំងឺហឺត និងសុខភាពផ្សេងទៀត ដែលសុទ្ធសឹងអាចប៉ះពាល់ដល់ជំងឺ ហឺត ដូចជា ជំងឺធ្លាក់ទឹកចិត្ត និងគេងអត់ដកដង្ហើម។

៤- នៅឆ្ងាយពីផ្សែង

កើតជំងឺហឺត ត្រូវនៅឲ្យឆ្ងាយពីផ្សែងបារី ទៀន ភ្លើង កាំជ្រួច ឬគ្រឿងក្រអូប ដែលសុទ្ធតែអាចជំរុញឲ្យកើតជំងឺហឺតបាន។ ផ្សែងបារីអាចធ្វើឲ្យកើតជំងឺធ្ងន់ធ្ងរដូចជា មហារីកសួត ជំងឺមហារីកបំពង់ខ្យល់ បញ្ហាបេះដូង លើសសម្ពាធឈាម និងបញ្ហាស្បែក។

ប្រសិនបើអ្នកកើតជំងឺហឺតជក់បារី អ្នកគួរតែបញ្ឈប់ការជក់បារីនៅពេលនេះ។ ប្រសិនបើមានអ្នកដទៃជក់បារី ហើយយើងស្រូបផ្សែងបារីនោះ យើងក៏អាចកើតជំងឺហឺតដែរ ជាពិសេសតាមទីសាធារណៈ ឬពេលធ្វើដំណើរ។

៥- ក្នុងផ្ទះមិនត្រូវមានវត្ថុប្រតិកម្មជាមួយឲ្យជំងឺហឺត

ផ្សិត ធូលីដី រោមសត្វ អាចធ្វើឲ្យកើតជំងឺហឺតបាន។ បើមានសត្វចិញ្ចឹម គួរតែយកវាចេញពីផ្ទះ ឬទុកវាឲ្យនៅឆ្ងាយពីបន្ទប់គេង ហើយសម្អាតទៀងទាត់។

ចំពោះម៉ាស៊ីនត្រជាក់វិញអាចកាត់បន្ថយពីការប៉ះពាល់ធូលីដីបាន។ ផ្សិតអាចមាននៅក្នុងបន្ទប់ទឹក ផ្ទះបាយ ឬបន្ទប់។ លាងសម្អាតតំបន់ទាំងនេះឲ្យបានទៀងទាត់ និងជួសជុលកន្លែងលេចទឹក ដោយប្រើម៉ាស់ដើម្បីបិទច្រមុះផងពេលលាងសម្អាត។

ហឺត ជាជំងឺរ៉ាំរ៉ៃ ហើយកើតពេញមួយជីវិត។ ទម្លាប់រស់នៅស្អាត គឺជាវិធីការពារ ប្រសើរជាងព្យាបាល។ ស្ថានភាពជំងឺ អាចកាន់តែធ្ងន់ធ្ងរ បើមិនមានការថែទាំ ឬព្យាបាលត្រឹមត្រូវ។

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ ណៃ ទូច · កែ 26/05/2021

ធ្លាប់ត្រូវជំងឺហឺតធ្វើទុក្ខធ្ងន់​ធ្ងរ​​ភ្លាម​ៗអត់? នេះវិធីដោះស្រាយ