ភាពល្អូកល្អិនរវាងគូស្នេហ៍ ប្ដីប្រពន្ធ មិនមែនសម្ដៅដល់តែរឿងលើគ្រែមួយមុខនោះទេ។ ពេលខ្លះដៃគូយើងអាចមានបញ្ហាសុខភាព ឬទើបសម្រាលកូនជាដើម ដែលមិនអាចរួមភេទបាន។ គូស្នេហ៍ខ្លះគិតថា ការមិនបានរួមភេទជាមួយគ្នាក្នុងរយៈពេលយូរអាចធ្វើឲ្យដៃគូហាក់ឆ្ងាយគ្នា។ តាមពិត មិនដូចនោះទាំងស្រុងទេ យើងនៅមានវិធីច្រើនយ៉ាងទៀត ធ្វើឲ្យជីវិតស្នេហានៅស្អិតល្មួតបានដោយមិនបាច់តែរួមភេទ។
ចេះតិចនិកនេះ ធ្វើឲ្យគូស្នេហ៍នៅតែល្អូកល្អិននឹងគ្នា
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១. ប៉ះពាល់គ្នា
គូស្នេហ៍ជាច្រើន ពេលនៅជាមួយគ្នាក្នុងរយៈពេលយូរ ក៏លែងសូវប៉ះពាល់គ្នា ក្រៅតែពីពេលរួមភេទ។ ការណ៍នេះ មិនល្អចំពោះទំនាក់ទំនងយើងនោះទេ។ ការប៉ះពាល់គ្នាដូចជាការថើប ឱប ស្ទាបថ្ពាល់ ឬសក់ ជាដើម ក្នុងមួយថ្ងៃៗ សុទ្ធតែជាទង្វើអាចធ្វើឲ្យទំនាក់ទំនងនៅតែល្អរវាងគូស្វាមីភរិយា។ ក្រៅពីនោះយើងនៅអាចម៉ាស្សាឲ្យគ្នាទៅវិញទៅមក ដើម្បីបង្កើនក្ដីស្រឡាញ់ឲ្យគ្នាក៏បាន។ កុំភ្លេចនិយាយគ្នា យល់ពីគ្នា ដើម្បីជីវិតគូយើងនៅតែស្អិតល្មួតជានិច្ច។
២. កាន់ដៃគ្នា
គ្នាយើងធ្លាប់ឃើញគូស្នេហ៍វ័យចំណាស់កាន់ដៃគ្នាដើរអត់? ហើយទង្វើរបស់ពួកគាត់បានធ្វើឲ្យយើងកោតសរសើរទេ? បើដូចនេះ ហេតុអ្វីយើងមិនកាន់ដៃគ្នាពេលចេញក្រៅ ឬដើរលេង ដូចដែលយើងធ្លាប់ធ្វើកាលទើបស្គាល់គ្នាថ្មីៗ។ ការកាន់ដៃគ្នា ជាវិធីល្អមួយដើម្បីរក្សាទំនាក់ទំនងជិតស្និទ្ធ ដោយបង្កើតទំនាក់ទំនងស្និទ្ធស្នាល ទោះបីជាគូស្នេហ៍ស្ថិតនៅវ័យរាងជ្រេបន្តិចក្ដី។
៣. ធ្វើខ្លួនដូចគូស្នេហ៍ថ្មីថ្មោង
គ្នាយើងនៅចាំពេលដំបូងនៃការណាត់ជួបគ្នាដើម្បីផ្ដើមស្នេហ៍ទេ? ពេលនោះប្រហែលជាគ្នាយើងកាន់ដៃគ្នាជាប់មិនលែងផងមិនដឹង។ តើការកាន់ដៃពេលនោះរំភើបកម្រិតណា ទោះមិនមានការរួមភេទក៏ដោយ? បង្កើតអារម្មណ៍បែបនោះមកវិញ ដើម្បីជីវិតគូយើងនៅតែស្រស់បំព្រង។
៤. ជជែកគ្នា
ពេលខ្លះការនៅស្ងៀមមិននិយាយស្ដីអាចបង្ហាញពីភាពពេញចិត្ត ដោយគ្រាន់តែញញឹមរកគ្នា តែថាពេលខ្លះការនៅស្ងៀមអាចមកពីយើងលែងមានអ្វីនិយាយជាមួយគ្នា។ កុំឲ្យរឿងបែបនេះកើតលើជីវិតគូរបស់យើង ត្រូវជជែកលេងជាមួយគ្នាឲ្យបានច្រើន អាចនិយាយពីការគិត ការយល់សប្ដិ សុខភាពរាងកាយ និងរឿងសប្បាយៗផ្សេងៗទៀត។ បើយើងមិននិយាយលេងនឹងគ្នា ថ្ងៃណាមួយស្ថានភាពទំនាក់ទំនងកាន់តែសោះកក្រោះ និងអាចកាន់តែអាក្រក់។
៥. រកពេលនៅជាមួយគ្នា
វាអាចពិបាកសម្រាប់គូស្វាមីភរិយារកពេលនៅជិតគ្នាឲ្យបានស្រួលនៅពេលដែលយើងមានកូនតូចនៅជាមួយ។ យ៉ាងណា យើងនៅតែអាចបង្កើតពេលវេលាឲ្យគ្នាបានដូចជានៅពេលចុងសប្ដាហ៍ អាចអង្គុយញ៉ាំកាហ្វេជជែកគ្នាលេងនៅផ្ទះ ដើម្បីបានផ្ដល់ពេលវេលាមួយឲ្យយើងមានការសន្ទនាគ្នា និងដូចជាបានសម្រាកខ្លះៗដែរ។ ក្រៅពីនេះ ដូចជាការទៅផ្សារទិញអីវ៉ាន់ជាមួយគ្នា លាងចានជាមួយគ្នា ក៏ជាវិធីឲ្យយើងមានទំនាក់ទំនងល្អគង់វង្សយូរអង្វែងដែរ។
ក្នុងការរក្សាភាពស្និទ្ធស្នាលនឹងគូស្នេហ៍ គ្នាយើងកុំគិតថាមានត្រឹមតែការរួមភេទមួយមុខនោះ។ ពិតណាស់ការរួមភេទជួយឲ្យយើង និងដៃគូមានអារម្មណ៍កាន់តែពិសេស តែចុះបើដៃគូយើងក្នុងរយៈពេលណាមួយកំពុងជួបបញ្ហាសុខភាព តើយើងគួរធ្វើបែបណា?
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម