កាត់ស្បែកចុងលិង្គ មានគុណប្រយោជន៍ និងគ្រោះថ្នាក់ម៉េចខ្លះ?

ពេលទៅដណ្ដឹងកូនគេ ឲ្យតែឮថាកាត់ចុង ភ័យលោះព្រលឹងអស់ហើយ គ្នាយើងសុទ្ធតែដឹងច្បាស់ ទម្លាប់បុរាណអារឿងកាត់ចុងលិង្គ គឺជាប្រពៃណីសាសនា បងប្អូនខ្មែរឥស្លាមយើង ខណៈបណ្តាប្រជាជាតិឥស្លាមដទៃទៀត ក៏មានទម្លាប់បុរាណនេះដូចគ្នា។ ប៉ុន្តែបច្ចុប្បន្ន ក្រៅពីប្រពៃណីសាសនា ការកាត់ស្បែកចុងលិង្គ ក៏មានធ្វើឡើងចំពោះក្មេងៗ អាស្រ័យលើមូលហេតុមួយចំនួន ខណៈអត្ថបទ “Hello គ្រូពេទ្យ’ មួយនេះ នឹងលើកពីគុណប្រយោជន៍ ក៏ដូចជាគ្រោះថ្នាក់ដោយសារកាត់ស្បែកចុងលិង្គឲ្យគ្រប់គ្នាបានដឹង។

១- ពេលណាត្រូវធ្វើការកាត់ស្បែកចុងលិង្គ?

ការកាត់ស្បែកចុងលិង្គ ជាធម្មតាធ្វើនៅពេលក្មេងទើបកើតបាន ១-២ ថ្ងៃ។ តែចំពោះប្រពៃណីជនជាតិជ្វីស ការកាត់ស្បែកចុងលិង្គ ត្រូវធ្វើនៅពេលក្មេងអាយុបាន ៨ ថ្ងៃ ដោយវិធីកាត់នេះនឹងកាន់តែពិបាក ហើយកាន់តែគ្រោះថ្នាក់ នៅពេលក្មេងកាន់តែធំ និងចំពោះមនុស្សពេញវ័យ។

២- ការកាត់ស្បែកចុងលិង្គត្រូវធ្វើយ៉ាងដូចម្ដេច?

នៅពេលដែលគ្រូពេទ្យវះកាត់ត្រូវធ្វើការកាត់ស្បែកចុងលិង្គ ស្បែកដែលនៅចុងហើយគ្របក្បាលលិង្គនឹងត្រូវទាញចេញអោយផុតពីក្បាលលិង្គ រួចកាត់ស្បែកនោះចោល។ ចំពោះទារក ការវះកាត់នេះប្រើពេលត្រឹមតែប្រាំទៅដប់នាទីប៉ុណ្ណោះ តែបើចំពោះក្មេងធំ និងមនុស្សពេញវ័យវិញ អាចត្រូវប្រើពេលរហូតដល់មួយម៉ោង ហើយរបួសបន្ទាប់ពីវះកាត់តូចនេះអាចនឹងជានៅអំឡុងពេលមួយសប្ដាហ៍។

៣- ការកាត់ស្បែកចុងលិង្គ អាចមានសារសំខាន់អ្វីខ្លះ?

ក្រៅពីមូលហេតុសុខភាព ឬវេជ្ជសាស្ត្រ ការកាត់ស្បែកចុងលិង្គ នៅតែជាបញ្ហាតែងលើកយកមកពិភាក្សាជាញឹកញាប់ ខណៈគុណប្រយោជន៍ការកាត់ស្បែកចុងលិង្គចំពោះទារក មានច្រើនជាងគ្រោះថ្នាក់ ប៉ុន្តែគុណប្រយោជន៍នេះ នៅតែមិនគ្រប់គ្រាន់ដើម្បីឲ្យមានការណែនាំធ្វើវាចំពោះទារក ជុំវិញពិភពលោកនៅឡើយទេ។ ដូចនេះហើយ ក្មេងធំ និងបុរសពេញវ័យ អាចនឹងតម្រូវព្យាបាលបញ្ហាស្បែកគ្រប់ចុងលិង្គ (Phimosis) ឬព្យាបាលការបង្ករោគចំពោះលិង្គ។

ប៉ាម៉ាក់ គួរតែពិគ្រោះជាមួយគ្រូពេទ្យជំនាញ ពីគុណប្រយោជន៍ និងគ្រោះថ្នាក់ ក៏ដូចជាបច្ចេកទេសកាត់ស្បែកចុងលិង្គនេះ មុននឹងសម្រេចថាត្រូវធ្វើវា ឬអត់ចំពោះក្មេងអាយុទ្រើសៗ។

អត្ថបទពាក់ព័ន្ធ៖

បញ្ហាពាក់ព័ន្ធកន្លែងសម្ងាត់ ស្រីៗចង់ដឹងបំផុត តែអត់ហ៊ានសួរ
ប្រុសៗប្រាប់អារម្មណ៍ពិតរឿងឆាប់ចេញទឹកកាម ពេលរួមភេទ

៤- គុណប្រយោជន៍កាត់ស្បែកចុងលិង្គ?

មានភស្ដុតាងខ្លះបង្ហាញថា ការកាត់ស្បែកចុងលិង្គ មានគុណប្រយោជន៍ចំពោះសុខភាព រួមមាន៖

– បន្ថយគ្រោះថ្នាក់ ដោយការបង្ករោគទៅលើបំពង់បង្ហូរនោម

– បន្ថយអត្រាឆ្លងជំងឺកាមរោគចំពោះប្រុសៗ

– ការពារប្រឆាំងជំងឺមហារីកលិង្គ និងបន្ថយគ្រោះថ្នាក់កើត មហារីកមាត់ស្បូន ចំពោះមនុស្សស្រីដែលជាដៃគូរួមភេទ

– ការពារជំងឺរលាកក្បាលលិង្គ (Balanitis) និងជំងឺរលាកស្បែកគ្របលិង្គ និងក្បាលលិង្គ (balanoposthitis)

ការកាត់ស្បែកចុងលិង្គ ក៏អាចធ្វើឲ្យការសម្អាតលិង្គ និងចុងលិង្គងាយស្រួលផងដែរ។

៥- គ្រោះថ្នាក់កាត់ស្បែកចុងលិង្គមានអ្វីខ្លះ?

ដូចវិធីវះកាត់ដទៃទៀតដែរ ការកាត់ស្បែកចុងលិង្គ ក៏មានគ្រោះថ្នាក់ខ្លះៗដូចគ្នា។ ប៉ុន្តែគ្រោះថ្នាក់ទាំងនៅ គឺមានអត្រាទាបទេ រួមមាន៖

– ឈឺចាប់

– គ្រោះថ្នាក់ដោយសារហូរឈាមច្រើន និងមានការបង្ករោគនៅកន្លែងកាត់

– រមាស់ក្បាលលិង្គ

– រលាកនៅក្បាលលិង្គ

– មានរបួសដាច់ស្នាមនៅលើលិង្គ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ គឹម កាណែល · កែ 15/07/2020