ក្រោយសម្រាលកូនរួច ស្រ្តីអាចមានរដូវដូចធម្មតាវិញនៅចន្លោះពី ១ខែកន្លះ-៣ខែ ឬយូរជាងនេះ អាស្រ័យទៅលើលក្ខខណ្ឌ នៃការបំបៅដោះកូន។ ទោះជាមិនទាន់មករដូវក៏ដោយ តែការរួមភេទពេលនេះពុំមានសុវត្ថិភាពនោះទេ បើពុំការពារ អាចមានកូនមិនខាន នេះបើតាមការឲ្យដឹងពីគ្រូពេទ្យព្យាបាលរោគស្ត្រី និងសម្ភព នៃមជ្ឈមណ្ឌលជាតិគាំពារមាតា និងទារក អ៊ូង មុនីរស្មី។

លោកស្រីថា ស្រ្តីដែលបំបៅដោះកូនតែមួយមុខ ដោយបំបៅញឹកញាប់ រយៈពេលយូរ នោះអាចពន្យារការមករដូវវិញកាន់តែយូរ។ “ម៉ាក់ៗខ្លះសម្រាលកូន៦ខែ ១ឆ្នាំអី ក៏មិនទាន់មករដូវវិញដែរ ទោះមិនទាន់មានរដូវមែន តែរួមភេទពេលហ្នឹងអាចមានកូនគ្រប់ពេល គ្រាន់តែភាគរយនៃការមានកូននោះតិចប៉ុណ្ណោះ’។

ទោះជាភាគរយនៃការមានកូនតិចតួចពិតមែន តែដើម្បីបង្ការការមានផ្ទៃពោះញឹកពេក ឬការមានកូនដោយចៃដន្យ គ្រូពេទ្យផ្នែកសម្ភពរូបនេះមិនលើកទឹកចិត្តឲ្យស្ត្រីជ្រើសរើសយកវិធីពន្យារកំណើតតាមរយៈការបំបៅដោះកូននោះទេ។

ឆ្លើយនឹងសំណួរ សម្រាលកូនហើយ ពេលណាស្រីៗអាចពន្យារកំណើតបាន? លោកស្រីថា ក្រោយសម្រាលកូនបាន ១ខែកន្លះ ស្ត្រីអាចពន្យារកំណើតបានហើយ ព្រោះសុខភាព និងស្បូនជាសះស្បើយ ត្រលប់មកសភាពដើមវិញ។ ចំពោះម៉ាក់ៗដែលបំបៅដោះកូន ក៏អាចពន្យារកំណើតបានដែរ តែបើចង់ពន្យារកំណើតដោយលេបថ្នាំគ្រាប់ ត្រូវសាកសួរគ្រូពេទ្យរកថ្នាំណាដែលផលិតឡើងសម្រាប់ស្រ្តីបំបៅកូន នោះទើបមិនប៉ះពាល់ដល់សុខភាពកូន។

ក្រៅពីថ្នាំពន្យារកំណើត នៅមានមធ្យោបាយពន្យារកំណើតផ្សេងទៀត ដូចជា ស្រោមអនាម័យ ថ្នាំចាក់ កងដាក់ក្នុងស្បូន កងដាក់ក្រោមស្បែក កៅអៀកបិទពន្យារកំណើត ជាដើម ដែលគ្រូពេទ្យសម្ភព និងរោគស្រ្តី នឹងណែនាំឲ្យប្រើនៅពេលមកពិនិត្យសុខភាពក្រោយសម្រាល (១ខែកន្លះបន្ទាប់ពីសម្រាល)។

អត្ថបទពាក់ព័ន្ធ៖

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

សម្រាលកូនរួច ពេលណាមករដូវវិញ? បើមិនទាន់មានរដូវ រួមភេទអាចមានកូនទេ?