បើយើងគិត ស្បូនជាអវយវៈខ្លាំងមួយដែលអាចឲ្យស្ត្រីពពោះបង្កកំណើតបាន។ ប៉ុន្តែ តាមពិតទៅ ស្បូនក៏អាចប្រឈមនឹងកើតជំងឺកាចៗសាហាវដែលអាចប៉ះពាល់ដល់សុខភាព ឬជីវិតរបស់ស្ត្រីបានដែរ ដូចជាជំងឺមហារីកស្បូនដែលគ្នាយើងស្រីប្រាថ្នាមិនចង់ជួប។ ក្នុងនោះ ស្ត្រីក៏អាចកើតជំងឺវង្វេងទីតាំងនៃកោសិកាភ្នាសស្បូន ដែលផ្ដល់ផលវិបាកដល់ខ្លួនដែរ។
តើអ្វីជាជំងឺវង្វេងទីតាំងនៃកោសិកាភ្នាសស្បូន?
លោកវេជ្ជបណ្ឌិត សឿច័ន្ទ វិសាល ឯកទេសផ្នែកសម្ភព និងរោគស្ត្រី បានពន្យល់ឲ្យដឹងថា ជំងឺវង្វេងទីតាំងនៃកោសិកាភ្នាសស្បូន ជាកោសិកានៃភ្នាសស្បូនលូតលាស់នៅទីតាំងផ្សេងៗខុសពីទីតាំងធម្មតា ដែលមានតែនៅក្នុងពោះនៃស្បូន។ កោសិកាភ្នាសស្បូនអាចលូតលាស់នៅក្នុងសាច់នៃស្បូន ដៃស្បូន កន្សោមមេជីវិតញី ស្រោមពោះ លើផ្លោកនោម លើពោះវៀនធំ និងតំបន់ទាបបំផុតនៃអាងត្រគាក។ លោកបន្ត នៅពេលដែលកោសិកាភ្នាសស្បូនលូតលាស់នៅលើកន្សោមមេជីវិតញី វាបង្កើតបានជាដុំគីស ដែលយើងហៅថាដុំគីសឈាមរដូវនោះឯង។
ផលវិបាកនៃជំងឺវង្វេងទីតាំងនៃកោសិកាភ្នាសស្បូន៖
វិបត្តិ២ដែលជួបញឹកញាប់ គឺ៖
- ឈឺចុកពោះរ៉ាំរ៉ៃ
- វិបត្តិគ្មានកូន
វេជ្ជបណ្ឌិតរូបនេះ បន្ថែមថា រោគសញ្ញានៃជំងឺនេះប្រែប្រួលទៅតាមទីតាំងដែលវាលូតលាស់ដូចជា៖
– បើវាលូតលាស់នៅលើកន្សោមមេជីវិតញី និងក្នុងសាច់នៃស្បូន វាធ្វើឲ្យឈឺចុកពោះនៅពេលមានរដូវ
– បើវាលូតលាស់នៅលើផ្លោកនោម វាអាចធ្វើឲ្យឈឺចុកពោះ បត់ជើងតូចញឹកញាប់ អាចបទជើងតូចមានឈាម នៅពេលមានរដូវ
– បើវាលូតលាស់នៅលើពោះវៀនធំ អាចធ្វើឲ្យឈឺចុកពោះ និងបត់ជើងធំញឹកញាប់
– ឈាមរដូវច្រើនខុសធម្មតា
– ឈឺចុកចាប់ក្នុងតំបន់អាងត្រគាកនៅពេលរួមភេទ
– ឈឺតំបន់អាងត្រគាករ៉ាំរ៉ៃ
– ឈឺចុកពោះកាន់តែខ្លាំងឡើងៗ ពី១ខែទៅ១ខែ នៅពេលមានរដូវ
លោកបានបញ្ជាក់ថា ជំងឺនេះអាចបាត់ទៅរោគសញ្ញា ហើយជាទៅវិញនៅពេល ស្ត្រីអស់រដូវ។ តែទោះយ៉ាងណាស្ត្រីត្រូវពិគ្រោះ និងពិនិត្យជាមួយគ្រូពេទ្យជំនាញឲ្យបានត្រឹមត្រូវ។
[embed-health-tool-ovulation]
