តាំងពីជំងឺកូវីដ-១៩ រាតត្បាតមក យើងម្នាក់ៗត្រូវពាក់ម៉ាស និងលាងដៃជាមួយជែល ឬអាល់កុលជាប់ជានិច្ច ដើម្បីការពារខ្លួនពីការឆ្លងជំងឺផ្លូវដង្ហើមដ៏កាចសាហាវនេះ ប៉ុន្តែការបាញ់អាល់កុលញឹកញាប់ពេក បង្កផលប៉ះពាល់មួយចំនួនដូចជា បណ្ដាលឲ្យស្ងួតដៃ ឬឡើងអាចម៍រុយលើខ្នងដៃក៏មាន។ ចុះអាចម៍រុយកើតឡើងរបៀបម៉េច? គួរការពាររបៀបណាដែរ?
ផលប៉ះពាល់របស់អាល់កុល
ជុំវិញបញ្ហានេះ លោកវេជ្ជបណ្ឌិត ហ៊ាង រតនា ឯកទេសជំងឺទូទៅ និងជំងឺកុមារ បានឲ្យដឹងថា ចេញស្នាមអុជៗខ្មៅលើប្រអប់ដៃ មូលហេតុសង្ស័យខ្ពស់ជាងគេ គឺមកពីលាងអាល់កុល ឬជែលដែលមានជាតិមេតាណុល ហើយ(ប្រអប់ដៃយើង)ត្រូវពន្លឺថ្ងៃ។ កាលណាយើងឡើងអាចម៍រុយលើខ្នងដៃ ទោះវាមិនសូវបង្កជាបញ្ហាធ្ងន់ធ្ងរ ប៉ុន្តែវាអាចជាប់នៅលើស្បែកយើងយូរ និងពិបាកកម្ចាត់ទៅវិញ។
វេជ្ជបណ្ឌិតរូបនេះបន្តថា ក្នុងករណីយើងឡើងអាចម៍រុយលើខ្នងដៃ គួរទៅពិភាក្សាជាមួយគ្រូពេទ្យជំនាញសើស្បែក ឬអាចប្រើឡេផ្ដល់សំណើមដល់ស្បែក ដែលមិនមានជាតិកាត់ និងមិនមានជាតិបារត។ ម៉្យាងវិញទៀត យើងគួរការពារមិនឲ្យត្រូវកម្ដៅថ្ងៃដាច់ខាត និងផ្អាកការប្រើអាល់កុលដោយប្រើសាប៊ូលាងដៃជំនួសវិញ (ឬ ប្រើអាល់កុល ឬជែល តែត្រូវប្រាកដថាគ្មានជាតិមេតាណុល)។
វិធីការពារ
ឡើងអាចម៍រុយលើខ្នងដៃពីការបាញ់អាល់កុល ឬជែលដែលមានសារជាតិមេតាណុល លោកគ្រូពេទ្យបានណែនាំថា៖
- ប្រើប្រាស់ឡេការពារកម្ដៅថ្ងៃ៖ ឡេការពារកម្ដៅថ្ងៃ មិនអាចកម្ចាត់អាចម៍រុយបានក៏ពិតមែន តែវាមានប្រសិទ្ធភាពខ្ពស់ក្នុងការការពារមិនកើតអាចម៍រុយបន្តបន្ទាប់គ្នា។
- ពាក់ស្រោមដៃជិតៗ៖ ផ្ទៃខ្នងដៃក៏ត្រូវការការពារដូចនឹងផ្នែកដទៃនៃរាងកាយដែរ ដូចនេះ បើមិនចង់កើតអាចម៍រុយ ឬជាំខ្មៅដៃទេ គួរពាក់ស្រោមដៃឃ្លុំជិតៗពេលចេញខាងក្រៅ។
- ជៀសវាងត្រូវកម្ដៅថ្ងៃ៖ ចុងក្រោយនោះគឺត្រូវជៀសឲ្យផុតពីកត្តាដែលបង្កឲ្យមានអាចម៍រុយឲ្យបាន។ យកល្អ បើអាចមិនបាច់ចេញទៅក្រៅផ្ដេសផ្ដាសទេ ពេលមេឃក្ដៅហែង ប៉ុន្តែប្រសិនបើចេញគួររកអីបិតបាំងការបារកម្ដៅថ្ងៃ ឬរើសម៉ោងពេល អាចព្រឹកឬល្ងាចអស់ពន្លឺថ្ងៃ(ក្ដៅ)។
បើគិតត្រួសៗ គ្នាយើងបាញ់អាល់កុលលាងសម្អាតដៃប្រហែលប៉ុន្មានដងដែរក្នុងមួយថ្ងៃៗ? ហើយមានចាប់អារម្មណ៍អត់ថា ដៃចង់ឡើងអាចម៍រុយ ជាពិសេសស្រី?
[embed-health-tool-due-date]
