គណនារកចង្វាក់បេះដូងលោត
អ្វីជាអត្រាចង្វាក់បេះដូងលោត (RHR)?
RHR ឬ អត្រាចង្វាក់បេះដូងលោតពេលសម្រាក ជាការគណនាចំនួនដងដែលបេះដូងលោតក្នុងមួយនាទី ពេលយើងសម្រាក។ មានន័យថា បេះដូងចាប់ផ្ដើមសប់និងបញ្ជូនឈាមទៅគ្រប់ផ្នែកទាំងអស់ក្នុងរាងកាយដើម្បីផ្គត់ផ្គង់កម្រិតអុកស៊ីហ្សែនដែលត្រូវការជាចាំបាច់។ កម្រិតធម្មតានៃអត្រាចង្វាក់បេះដូងលោត (RHR) ស្ថិតនៅចន្លោះពី ៦០ – ១០០ដងក្នុងមួយនាទី (60-100/bpm)។
យើងវាស់ អត្រាចង្វាក់បេះដូងលោតពេលសម្រាក (RHR) ដោយរបៀបណា?
ដោយសារយើងកំពុងចង់ដឹងចង្វាក់បេះដូងលោតពេលសម្រាក ពេលដែលរាងកាយមិនបញ្ចេញសកម្មភាព ដូច្នេះពេលវេលាដែលល្អបំផុតក្នុងការគណនាគួរតែ នៅពេលព្រឹកព្រលឹក ទើបតែភ្ញាក់ដឹងខ្លួន មិនទាន់ក្រោកចេញពីគ្រែ។
ចំពោះវិធីគណនា យើងអាចធ្វើបាន ២របៀប៖
– យកម្រាមដៃចង្អុល និងម្រាមកណ្ដាល (២ម្រាម) សង្កត់ថ្នមៗលើកដៃផ្នែកខាងមុខ(ខាងប្រអប់ដៃ) ដើម្បីរាប់ចំនួន
– យកម្រាមដៃចង្អុល និងម្រាមកណ្ដាល (២ម្រាម) សង្កត់ថ្នមៗលើបំពង់ខ្យល់(បរិវេណ បំពង់ក ផ្នែកខាងក្រោម)
សូមសង្កត់ម្រាមទាំង២ ថ្នមៗ(តែឲ្យដឹងជីពចរលោត) ចំនួន ១៥វិនាទី។ បន្ទាប់ពីបានចំនួនជីពចរលោត ក្នុងរយៈពេល ១៥វិនាទីរួចហើយ យកមកគុណនឹង៤ (x4) អ្នកនឹងបានលទ្ធផល ឬអត្រាចង្វាក់បេះដូងពេលសម្រាកលោត(RHR) ហើយ ថាតើវានៅល្អចន្លោះពី ៦០ – ១០០ bmp ឬអត់។