បញ្ហាមួយដែលម៉ាក់ប៉ាគ្រប់រូបរមែងចង់ឲ្យកូនតូចៗចៀសឆ្ងាយនោះ គឺកង្វះជាតិដែក ដោយសារវាអាចបណ្ដាលឲ្យកូនកើតជំងឺស្លេកស្លាំងដោយសារខ្វះគ្រាប់ឈាមក្រហមបាន។ ហេតុនេះហើយ វាជារឿងចាំបាច់បំផុតដែលម៉ាក់ប៉ាគួរតែដឹងពីបរិមាណជាតិដែករាងកាយកូនៗត្រូវការជាប្រចាំ ដើម្បីជួយសុខភាពកូនរឹងមាំ និងលូតលាស់ឲ្យបានពេញលេញ។
ដឹងអត្ថន័យពណ៌ និងរូបរាងលាមកទារកដោយចុចត្រង់នេះ
បរិមាណជាតិដែកកូនត្រូវការ
យោងតាមការណែនាំរបស់វិទ្យាស្ថានជំងឺកុមារ American Academy of Pediatrics ក្មេងតូចៗត្រូវការបំប៉នអាហារមានបរិមាណជាតិដែកដូចខាងក្រោមនេះ៖
- ចំពោះទារកបៅដោះ អាយុ ៤-៦ ខែ ត្រូវការជាតិដែកសរុប ១មិល្លីក្រាម/គីឡូ/ថ្ងៃ។
- ចំពោះទារកកើតមុនខែ ត្រូវការ ២មិល្លីក្រាម/គីឡូ/ថ្ងៃ ប្រើពេញ១ឆ្នាំដំបូង។ គួរតែធ្វើបែបនេះរហូតដល់ក្មេងៗទទួលបានជាតិដែកគ្រប់គ្រាន់ពីទឹកដោះគោ ឬអាហារ។ ក្មេងបៅទឹកដោះគោ អាចទទួលបានជាតិដែកគ្រប់គ្រាន់។
- ក្មេងអាយុ ៦-១២ ខែ ត្រូវការជាតិដែក ១១មិល្លីក្រាម/ថ្ងៃ ពីចំណីអាហារ ឬអាហារបំប៉ន។
- ក្មេងអាយុ ១-៣ ឆ្នាំ អាចទទួលបានជាតិដែកគ្រប់គ្រាន់ពីអាហារគេញ៉ាំ ដែលតម្រូវការប្រចាំថ្ងៃ ៧មិល្លីក្រាម និងអាចបន្ថែមអាហារបំប៉នក្នុងករណីចាំបាច់។
ទន្ទឹមនឹងនេះ លោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅ បានឲ្យដឹងដែរថា កូនតូចខ្វះជាតិដែកធ្ងន់ធ្ងរអាចប្រឈមនឹងគ្រោះថ្នាក់ដល់ជីវិតបាន បើមិនបានយកចិត្តទុកដាក់តាមដានខ្ពស់ ពីអាការស្លេកស្លាំងទៅលើកូន។ កាលណាមានចំនួនគ្រាប់ឈាមក្រហមមិនគ្រប់គ្រាន់សម្រាប់ដឹកអុកស៊ីសែន និងសារធាតុចិញ្ចឹមនោះ ធ្វើឲ្យកុមារប្រឈមខ្ពស់ទៅនឹងគ្រោះថ្នាក់។
រោគសញ្ញានៃបញ្ហាខ្វះជាតិដែក
– ស្លេកស្លាំង
– អស់កម្លាំង
– បែកញើសស្អិត
– ត្រជាក់ដៃជើង
– ដង្ហើមខ្លី
– គ្រាប់ឈាមក្រហមធ្លាក់ចុះ បើពិនិត្យឈាម
– សន្លប់ដោយគ្មានអុកស៊ីសែនគ្រប់គ្រាន់ក្នុងឈាម (ករណីធ្ងន់ធ្ងរ)។
ចំណាំ៖ អាហារដែលសម្បូរជាតិដែកដែលអាអូនលើអាយុ៦ខែអាចញ៉ាំបានមានដូចជា ផ្កាខាត់ណាខៀវ សណ្ដែកសៀង តៅហ៊ូ ត្រកួន ឬពពួកគ្រាប់ធញ្ញជាតិ។
[embed-health-tool-vaccination-tool]
