ម៉ាក់ប៉ាសម័យនេះរវល់នឹងការងារច្រើន មិនសូវមានពេលវេលាគ្រប់គ្រាន់សម្រាប់កូននោះទេ ទាល់តែឆ្លៀតទើបមានឱកាសបាននៅក្បែរកូន។ តាមការលើកឡើងរបស់លោកស្រី សរ ម៉ុន្ថា នាយិកាសាលាអប់រំកុមារតូច ស៊ីជីដា កម្ពុជា ទោះរវល់បែបណាក្តី តែបើម៉ាក់ប៉ា ធ្វើបាន ៣ ចំណុចងាយៗនេះ នឹងក្លាយជាឪពុកម្តាយអស្ចារ្យ កូននឹងស្រលាញ់ងប់ងល់។
១. ស្រលាញ់កូនដោយគ្មានលក្ខខណ្ឌ
នាមជាឪពុកម្តាយយើងត្រូវស្រលាញ់កូនឲ្យបានស្មើៗគ្នាដោយគ្មានលក្ខខណ្ឌអ្វីទាំងអស់។ ទ្រព្យសម្បត្តិជារបស់ក្រៅខ្លួនទេ ការយកបេះដូងទៅឲ្យកូន តាមរយៈការផ្តល់ក្តីស្រលាញ់ឲ្យកូន ដូចជា ឱប ថើប ចំណាយពេលវេលាផ្សេងជាមួយកូន នោះកូនយើងនឹងមានភាពកក់ក្តៅ មានអារម្មណ៍ល្អ ស្រលាញ់យើងកាន់តែខ្លាំងឡើង។
២. លើកសរសើរកូន
ក្មេងត្រូវការក្តីស្រលាញ់ កម្លាំងចិត្ត ដូច្នេះក្នុងនាមជាឪពុកម្តាយ ត្រូវលើកសរសើរកូនគ្រប់ពេល ជាពិសេសនៅពេលដែលកូនយើងធ្វើកិច្ចការអ្វីមួយ ទោះជាបានលទ្ធផលល្អ ឬមិនល្អក៏ដោយ។ ការលើកសរសើរជាកម្លាំងមួយជំរុញឲ្យកូនធ្វើអ្វីមួយដោយគ្មានរួញរា ហើយគេនឹងព្យាយាមធ្វើឲ្យបានល្អនៅពេលក្រោយ។
៣. ព្រមទទួលគ្រប់យ៉ាងពីកូន
ទោះជាកូនយើងកើតមកមានសភាពបែបណាក៏ដោយ យើងត្រូវស្រលាញ់ និងព្រមទទួលគ្រប់យ៉ាង ឧទាហរណ៍ថា កូនយើងកើតមកមិនគ្រប់លក្ខណៈ កើតមកទោះទាប ឬខ្មៅក៏ដោយ ក៏នៅតែជាកូនរបស់យើងដែរ ដូច្នេះយើងត្រូវស្រលាញ់កូនឲ្យអស់បេះដូង និងកុំប្រៀបធៀបកូនជាអ្នកដទៃ។
[embed-health-tool-vaccination-tool]
