ការប្រើទឹកសម្រាប់ឆុងទឹកដោះឲ្យកូននៅក្នុងគ្រួសារនីមួយៗប្លែកខុសៗពីគ្នា អាស្រ័យទៅតាមទម្លាប់ និងការយល់ដឹងរបស់ម៉ាក់ប៉ា ដោយអ្នកខ្លះប្រើទឹកបរិសុទ្ធ ឯមួយចំនួនទៀតប្រើទឹកដាំពុះ។
រវាងទឹកសុទ្ធ ទឹកដាំពុះ ទឹកត្រជាក់ និងទឹកក្តៅឧណ្ហៗ តើមួយណាល្អចំពោះសុខភាពក្មេង? សំណួរនេះលោកស្រីវេជ្ជបណ្ឌិត គុជ ឆោមដាលីន បម្រើការងារនៅលើ Singapore Medical Center ឆ្លើយថា ទឹកដែលល្អសម្រាប់ឆុងទឹកដោះក្មេង គឺទឹកឆ្អិន ទឹកគ្មានមេរោគ ទឹកដាំពុះ។
ងាកមកសីតុណ្ហភាពរបស់ទឹកវិញ លោកស្រីវេជ្ជបណ្ឌិតបញ្ជាក់ថា បើសិនជាម៉ាក់ប៉ាឆុងទឹកដោះកូនជាមួយនឹងទឹកក្តៅឧណ្ហៗ ធ្វើឲ្យម្សៅទឹកដោះគោរលាយសព្វល្អ កូនផឹកទៅមិនសូវជួបបញ្ហាក្តៀនលាមកនោះទេ។ ក្នុងនោះលោកស្រីវេជ្ជបណ្ឌិតបានណែនាំនូវវិធីឆុងទឹកដោះកូនត្រឹមត្រូវខាងក្រោមនេះ។
១. សម្អាតបរិវេណឆុងទឹកដោះគោកូនឲ្យស្អាត
២. ត្រូវលាងដៃឲ្យស្អាត មុននឹងឆុងទឹកដោះឲ្យកូន
៣. យកទឹកដាំពុះ ឬទុកឲ្យត្រជាក់ឧណ្ហៗចាក់ចូលកំប៉ុងឆុងទឹកដោះគោ
៤. ដួសម្សៅទឹកដោះដាក់ក្នុងកំប៉ុងទៅតាមបរិមាណទឹក
៥. លុញ ឬក្រឡុកទឹកដោះគោ និងទឹកតិចៗឲ្យសព្វ
៦. យកទឹកដោះគោទៅត្រាំទឹកត្រជាក់ បើក្តៅខ្លាំងពេក
៧. ត្រាំរួច ដកមកជូតឲ្យស្ងួតទឹក មុននឹងឲ្យកូនម៉ឹម
៨. ចាក់ទឹកដោះលើដៃ តើត្រជាក់ល្មមឲ្យបៅ ឬនៅ?
ដូចគ្នានោះដែរ នៅគ្រប់ការណែនាំលើសំបកកំប៉ុងទឹកដោះគោ ក៏បានណែនាំឲ្យយើងយកទឹកស្អាតដាំពុះ រួចទុកឲ្យនៅក្តៅឧណ្ហៗ សឹមចាក់ចូលក្នុងដបទឹកដោះគោដែលបានស្ងោរសម្លាប់មេរោគរួចក្នុងចំណុះត្រឹមត្រូវ ហើយបិទគម្របដប រួចលញ់ឲ្យម្សៅទឹកដោះគោរលាយចូលទឹកសព្វ។ ជំហានចុងក្រោយយើងត្រូវពិសោធកម្តៅទឹកដោះគោនៅលើខ្នងដៃ មុនបំបៅកូន បើក្តៅខ្លាំងត្រូវយកដបទឹកដោះគោត្រាំទឹកត្រជាក់មួយស្របក់។
[embed-health-tool-vaccination-tool]
