រាករូសបណ្ដាលមកពីការឆ្លងវីរុស ប៉ារាស៊ីត ឬបាក់តេរីផ្សេងៗ ដោយសារតែការញ៉ាំចំណីអាហារមិនស្អាត ខ្វះអនាម័យ ប៉ុន្តែពេលខ្លះក៏អាចមកពីការញ៉ាំទឹកដោះគោដែរ។ ហេតុអីបានជាក្មេងផឹកទឹកដោះគោ ឬញ៉ាំផលិតផលពីទឹកដោះគោសោះ បែរជាធ្វើឲ្យរាករូសដែរ? លោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅ អះអាងថា បញ្ហានេះបណ្ដាលមកពីក្មេង មានប្រតិកម្មជាមួយនឹងជាតិឡាក់តូសដែលមានក្នុងទឹកដោះគោ។
១- អ្វីទៅជាឡាក់តូស?
ឡាក់តូស (Lastose) ជាប្រភេទស្ករដែលមាននៅក្នុងទឹកដោះគោ។ រាងកាយរបស់មនុស្សយើងមានអង់ស៊ីមមួយដែលមានឈ្មោះថា Lactase ដើម្បីបំបែកជាតិស្ករនោះ រួចទាញស្រូបចូលក្នុងខ្លួន។ ប៉ុន្តែរាងកាយមនុស្សមួយចំនួនមិនមានអង់ស៊ីម Lactase គ្រប់គ្រាន់ដើម្បីរំលាយជាតិស្ករក្នុងទឹកដោះគោ និងផលិតផលពីទឹកដោះគោនោះទេ ពេលញ៉ាំផលិតផលទាំងនោះទៅប្រតិកម្មភ្លាម។ ផលិតផលមានជាតិស្ករឡាក់តូស មានទឹកដោះគោគ្រប់ប្រភេទ ទឹកដោះពពែ ឈីស យ៉ាអួរ ការ៉េម ប័រ និងផលិតផលពីទឹកដោះគោ។
២- រោគសញ្ញាប្រតិកម្មនឹងជាតិឡាក់តូស
បើសិនជារាងកាយក្មេងមិនរំលាយអាហារដែលមានជាតិស្ករឡាក់តូស (Lactose intolerant) មានន័យថារាងកាយគេមិនបានបង្កើតអង់ស៊ីមឡាក់តាស (Lactase) គ្រប់គ្រាន់ចាំបាច់សម្រាប់រំលាយស្ករឡាក់តូស។ លោកវេជ្ជបណ្ឌិត ចាន់ ស៊ីណេត ពន្យល់ថា ក្មេងដែលប្រតិកម្មនឹងជាតិឡាក់តូស មិនដូចគ្នានឹងអាលែកហ្ស៊ីទឹកដោះគោទេ នៅពេលក្មេងផឹកទឹកដោះគោ ឬញ៉ាំផលិតផលពីទឹកដោះគោទៅ ជាតិឡាក់តូសមិនរំលាយក្នុងពោះវៀនតូចបានទេ វាចូលទៅក្នុងពោះវៀនធំ ដែលជាកន្លែងប្រមូលផ្តុំនូវបាក់តេរីចម្រុះ និងបាក់តេរីមួយចំនួនរីកដុះដាល ដោយស្ដែងចេញនូវរោគសញ្ញាមួយចំនួនខាងក្រោម។
– ហើមពោះ
– ឈឺពោះ
– ផោម
– រាករូស។
៣- ផលប៉ះពាល់ចំពោះរាងកាយពេលប្រតិកម្មជាតិឡាក់តូស
មិនថា ក្មេង មនុស្សពេញវ័យ ឬមនុស្សចាស់នោះទេឲ្យតែប្រតិកម្មនឹងជាតិឡូសងាយនឹងហើមពោះ និងរាសរូស។ ជាធម្មតា អាការៈទាំងនេះចាប់ផ្ដើមកើតមានចន្លោះពីកន្លះម៉ោង ទៅ២ម៉ោង ក្រោយញ៉ាំទឹកដោះគោ ឬផលិតផលផលិតពីទឹកដោះគោ។ បើកូនយើង ប្រតិកម្មនឹងជាតិស្ករឡាក់តូស មិនត្រូវបណ្ដែតបណ្ដោយនោះទេ ព្រោះកាលណារាសរូសលើសពី ១ សប្តាហ៍ ធ្វើឲ្យរាងកាយបាត់បង់ជាតិទឹក និងប៉ះពាល់ដល់ប្រព័ន្ធរំលាយអាហារ។ ហើយចំពោះក្មេងតូច ឬជំទង់វិញ បើទុកឲ្យរាកយូរអាចឈានទៅបាត់បង់ជីវិត ខណៈក្រពះពោះវៀនគេនៅខ្ចីនៅឡើយ។
៤- វិធីដោះស្រាយពេលរាងកាយប្រតិកម្មនឹងជាតិឡាក់តូស
គ្មានវិធីអ្វីជួយអ្នកប្រតិកម្មនឹងសារធាតុឡាក់តូសក្នុងទឹកដោះគោ ក្រៅពីប្តូរមកញុំាទឹកដោះគោ គ្មានជាតិឡាក់តូស (Lactose-free) ញ៉ាំទឹកសណ្ដែក ញ៉ាំតៅហ៊ូ ដែលមានជាតិកាល់ស្យូម គ្រាប់ធញ្ញជាតិ ឬក៏ប្រភេទអាហារដែលមានជាតិកាល់ស្យូមផ្សេងៗជំនួស។
អត្ថបទពាក់ព័ន្ធ៖
- មូលហេតុទាំងនេះ ធ្វើឲ្យកូនតូចរាករូសញឹកញាប់ ម៉ាក់ប៉ាមិនត្រូវមើលរំលង
- វិធីងាយៗនេះអាចជួយអូនតូចៗបាន ពេលរាកតិចតួច
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
