ការលូតលាស់ និងអាកប្បកិរិយា
១- កូនចេះអីខ្លះ?
ចូលដល់ខែទី២២ នេះ កូនចាប់ផ្ដើមមានគំនិតផ្ទាល់ខ្លួនតិចតួចហើយ គេចេះគិត ហើយចូលចិត្តបង្ហាញអារម្មណ៍ឲ្យយើងជាប៉ាម៉ាក់ដឹងភ្លាមៗ។ ហ៊ានតែយើងរារាំង ឬបដិសេធអត់ឲ្យគេធ្វើអ្វីដែលចង់ធ្វើទេ អូនតូចនឹងបង្ហាញថាគេខឹងដោយការស្រែក ឬយំឡាំប៉ាជាដើម។ ទាំងនេះជាអ្វីដែលពួកគេធ្វើដើម្បីទាមទារនូវភាពឯករាជ្យ ហើយបញ្ជាក់ថាគេធំហើយ។
ទោះជាមានការគិតចង់បាននេះ ចង់បាននោះមែន តែការផ្ចង់អារម្មណ៍របស់ក្មេងៗក្នុងវ័យនេះបានត្រឹមតែ ១០នាទីប៉ុណ្ណោះ។ ការបន្លប់ ឬបង្វែរអារម្មណ៍កូន ជារឿងល្អ ហើយម៉ាក់ប៉ា ក៏ធ្វើហូរហែដែរ។ ដូចនេះបើកូនទារធ្វើអ្វីមួយ យើងអាចបង្វែរឲ្យទៅលេងរបស់ផ្សេង ឬនិយាយរឿងផ្សេងបន្លប់ជាដើម។
២- ជួយកូនរបៀបណា?
លើកទឹកចិត្តកូនឲ្យច្រើន ឲ្យជាប់លាប់ ពេលគេព្យាយាមធ្វើអ្វីមួយតែមិនបានសម្រេច ដើម្បីកុំឲ្យកូនបាក់ទឹកចិត្ត។ តាមជួយកូនជានិច្ច តែគួរទុកពេលឲ្យគេធ្វើឲ្យអស់ពីសម្ថភាពសិនចាំ កុំទម្លាប់ឲ្យកូនពឹងយើងទាំងស្រុងរាល់កិច្ចការ។ តាមជួយពិតជាអាចធុញ ចឹងត្រូវទប់ចិត្តកុំបញ្ចេញអាការៈក្រេវក្រោធដាក់កូន។
ព្យាយាមនៅជាមួយកូន ឲ្យជាប់លាប់ លើកលែងតែពេលគេគេងលក់ ឬវក់លេងខ្លាំង។ ទោះជារវល់ខ្លាំងយ៉ាងណា គួរតែឆ្លៀតទៅមើលកូន ទៅអង្អែលក្បាល ឬញញឹមដាក់បន្តិច ព្រោះពេលខ្លះកូនអ្នកមិនមែនត្រូវការចំណាប់អារម្មណ៍ពីយើងទេ តែគេត្រូវការជំនួយ។
ចំពោះរឿងញ៉ាំវិញ បើរបស់ថ្មី ឬចំណីថ្មី អាចសាកញ៉ាំឲ្យកូនញ៉ាំបន្ដិចបានហើយ។ បើកូនមិនញ៉ាំ យើងអាចប្តូររបៀបចម្អិនវិញ។ តាមសម្រួល កូនញ៉ាំប៉ុន្មានយកប៉ុណ្ណឹង កុំបង្ខំឲ្យកូនញ៉ាំឲ្យអស់ពីចាន។
សុខភាព និងសុវត្ថិភាព
៣- ពិភាក្សាជាមួយពេទ្យរឿងអីខ្លះ?
ខែទី២៤ ជាពេលដែល ម៉ាក់ៗត្រូវណាត់ជួបគ្រូពេទ្យម្តងទៀត ដើម្បីតាមដាន សុខភាពអាអូន។
៤- ត្រូវដឹងពីអីខ្លះ?
កូនអាចមានប្រតិកម្មជាមួយសត្វចិញ្ចឹម ជាពិសេសឆ្កែ និងឆ្មា។ ដូចនេះ បើយើងមានសត្វចិញ្ចឹមនៅផ្ទះគួរដឹងពីរោគសញ្ញាមួយចំនួនខាងក្រោម៖
– កណ្តាស់
– រមាស់ ឬហូរទឹកភ្នែក
– ហៀរសំបោរ
– តឹងច្រមុះ។
បើសិនកូនមានរោគសញ្ញាខាងលើសូមប្រាប់គ្រូពេទ្យភ្លាម ដើម្បីឲ្យចាក់ថ្នាំបង្ការ ទោះជាយើងយកសត្វទាំងនោះចេញ ឬលេបថ្នាំហើយក៏ដោយ។
ការព្រួយបារម្ភ
៥-រឿងអីខ្លះគួរបារម្ភ?
គួរបារម្ភពីការដុះធ្មេញរបស់កូន ព្រោះជាពេលដែលធ្មេញចាប់ផ្ដើមមានហើយ។ រោគសញ្ញាដែលទាក់ទងនឹងការដុះធ្មេញមានដូចជាឆេវឆាវ រាក និងក្តៅខ្លួនតិចៗ។ សញ្ញាទូទៅដូចជា៖
– ហៀរទឹកមាត់ ឬចេញកន្ទួលនៅមុខ
– ហើមអញ្ចាញ
– ឆេវឆាវឆាប់ខឹង
– ចូលចិត្តខាំ
– មិនព្រមញ៉ាំអាហារ
– គេងមិនលក់។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
