ដូច “Hello គ្រូពេទ្យ’ ប្រាប់ជារឿយៗហើយ អាហារូបត្ថម្ភសំខាន់ណាស់សម្រាប់ការលូតលាស់របស់ក្មេង ប៉ាម៉ាក់ ត្រូវគិតពីសុខភាពកូនឲ្យបានច្រើនបន្តិច ទោះកូនពិបាករឿងញ៉ាំអាហារក៏ដោយ ប៉ុន្តែក៏មិនគួរតាមចិត្តកូន មិនខ្វាយខ្វល់នោះដែរ ត្រូវតែចេះរកវិធីដោះស្រាយ បើកូនមានបញ្ហាកង្វះអាហារូបត្ថម្ភ ច្បាស់ជាវីវរមិនខាន។ ចង់ដឹងកង្វះអាហារូបត្ថម្ភលើក្មេងៗ តើដោយសារអ្វី? ប៉ះពាល់អីខ្លះដល់ក្មេង? អាចស្វែងយល់ពីអត្ថបទនេះបាន។
១- កង្វះអាហារូបត្ថម្ភលើក្មេងៗដោយសារអ្វី?
បញ្ហាកង្វះអាហារូបត្ថម្ភលើក្មេងៗ អាចមកពីទម្លាប់ញ៉ាំច្រើនពេក ឬញ៉ាំតិចពេក ញ៉ាំសារធាតុចាំបាច់ប្រចាំថ្ងៃមិនគ្រប់គ្រាន់ ឬលើសកម្រិតដូចជា ពពួកខ្លាញ់ ស្ករ និងអំបិលជាដើម។ ការញ៉ាំមិនគ្រប់គ្រាន់ ធ្វើឲ្យប៉ះពាល់ដល់សារធាតុចិញ្ចឹមផ្សេងទៀត ដូចជា ប្រូតេអ៊ីន ជាតិសរសៃ និងវីតាមីន ។ល។
២- កង្វះអាហារូបត្ថម្ភប៉ះពាល់អ្វីខ្លះដល់ក្មេង?
បើសិនជាក្មេងមានបញ្ហាកង្វះអាហារូបត្ថម្ភ អាចនឹងមានជំងឺជាច្រើនដូចជា៖
– កើតជំងឺពុកឆ្អឹង៖ ក្មេងនឹងប្រឈមជំងឺពុកឆ្អឹង ដោយសារកង្វះអាហារូបត្ថម្ភ ពិសេសខ្វះជាតិកាល់ស្យូម និងវីតាមីន D។
– បញ្ហាដង្ហើម៖ ដោយសារសារធាតុចិញ្ចឹមមិនគ្រប់គ្រាន់នៅក្នុងឈាម នាំឲ្យឈាមខ្វះអុកស៊ីហ្សែន បញ្ជូនទៅកាន់សួត នាំឲ្យប៉ះពាល់បញ្ហាផ្លូវដង្ហើម។
– ជំងឺសរសៃឈាមបេះដូង៖ ដោយសារលើសជាតិខ្លាញ់ អំបិល និងស្ករច្រើនពេក នាំឲ្យឡើងកូលេស្តេរ៉ូល លើសឈាម និងក្រិនសរសៃឈាម។
– ធាត់ខ្លាំង៖ ដោយសារក្មេងចូលចិត្តញ៉ាំពពួកអាហារសម្រន់ច្រើនពេក ដែលអាចបង្កជាផលវិបាក រួមនឹងជំងឺជាច្រើន ដូចជា ជំងឺទឹកនោមផ្អែម លើសឈាម ឃើញខ្លួនឯងអាក្រក់ដោយសារធាត់ពេក ញ៉ាំមិនប្រក្រតី ជំងឺមហារីក ជាដើម។
– បញ្ហាផ្លូវចិត្ត៖ ក្មេងមានទម្លាប់ញ៉ាំមិនគ្រប់គ្រាន់ ងាយនឹងមានជំងឺផ្លូវចិត្ត ដូចជា ជំងឺថប់បារម្ភ និងប៉ះពាល់ដល់ការលូតលាស់ផ្នែកផ្លូវចិត្តផងដែរ។
– បញ្ហាក្នុងការសិក្សា៖ នៅពេលក្មេងខ្វះអាហារូបត្ថម្ភ ក៏មិនមានកម្លាំងគ្រប់គ្រាន់ទៅលេងជាមួយក្មេងដទៃ ឬធ្វើអ្វីមួយឡើយ។ ហេតុនេះ កូនយើងហាក់មិនសូវមានមិត្តច្រើននោះដែរ ដោយសារតែអាកប្បកិរិយាមិនដូចក្មេងដទៃ។
បញ្ហាកង្វះអាហារូបត្ថម្ភលើក្មេងៗ ក៏ងាយនឹងកើតជំងឺផ្សេងៗជាច្រើនទៀត ប៉ុន្តែប៉ាម៉ាក់នៅតែអាចបង្ការ តាមរយៈការផ្លាស់ប្តូរទម្លាប់រស់នៅ និងឲ្យកូនញ៉ាំអាហារល្អសម្រាប់សុខភាព។
អត្ថបទពាក់ព័ន្ធ៖
- ចង់ឲ្យកូនស្អាត ឆ្លាត វីតាមីនទាំងនេះល្អបំផុតសម្រាប់ក្មេងៗ
- ឲ្យកូនក្មេងញ៉ាំបួស ប៉ះពាល់សុខភាពដែរអត់?
៣- គន្លឹះជ្រើសរើសអាហារូបត្ថម្ភសម្រាប់ក្មេងៗ
– ញ៉ាំអាហារល្អសម្រាប់សុខភាពបានច្រើនមុខជារៀងរាល់ថ្ងៃ
– ញ៉ាំបន្លែផ្លែឈើឲ្យបានច្រើន
– កំណត់ការញ៉ាំស្ករ អំបិល និងខ្លាញ់
– ឲ្យក្មេងញ៉ាំទឹកជំនួសភេសជ្ជៈផ្អែមៗ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយគ្រូពេទ្យជំនាញ។Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
