សុខភាពទារកទើបនឹងកើតមានសភាពទន់ខ្សោយនៅឡើយ ដូចនេះម៉ាក់ប៉ា ឬអ្នកថែរក្សាត្រូវប្រយ័ត្នគ្រប់យ៉ាង ហើយស្បែកក៏ងាយរងគ្រោះដូចគ្នាដែរ។ វេជ្ជបណ្ឌិត ហ៊ាង រតនា ឯកទេសជំងឺទូទៅបានឲ្យដឹងថា ទារកទើបនឹងកើតស្បែកងាយជួបបញ្ហាច្រើន តែករណីខ្លះនឹងបាត់ទៅវិញដោយខ្លួនឯង និងខ្លះទៀតត្រូវរកជំនួយវេជ្ជសាស្ត្រ។ លោកបន្ថែមទៀតថា បញ្ហាស្បែកដែលកើតឡើងដោយខ្លួនឯង មិនសូវបារម្ភ ដូចករណីយើងយកអ្វីទៅលាបផ្ដេសផ្ដាសឡើយ។ ខាងក្រោមជាបញ្ហាស្បែកដែលទារកទើបកើត តែងជួបប្រទះ៖
១- កន្ទួលសៗនៅចុងច្រមុះ ឬត្របកភ្នែក
បញ្ហាស្បែកប្រភេទនេះ បណ្ដាលមកពីក្រពេញខ្លាញ់នៅលើស្បែក។ ពងបែកតូចៗពណ៌ស ឬលឿងលើមុខរបស់ទារក ជាសញ្ញាបញ្ជាក់ពីភាពសម្បូរជាតិខ្លាញ់ដែលផ្ទុកសារជាតិ គីរ៉ាទីន (Keratin) និង ស៊ីប៊ឺម (Sebum)។ ជាធម្មតា អាការៈនេះនឹងត្រូវជាសះស្បើយឡើងវិញ ពី២-៣ថ្ងៃ ឬអាចដល់មួយសប្ដាហ៍ ដោយឯកឯង មិនចាំបាច់ការព្យាបាលអ្វីទាំងអស់។
២- របកស្បែក
បញ្ហារបកស្បែកលើទារកមិនមែនបណ្ដាលមកពីរោលទឹកភ្លោះឡើយ។ របកស្បែកអាចគ្រាន់តែជាករណីស្រាល ដែលឆ្លងមេរោគពីម្ដាយ ឬឆ្លងតាមមេរោគតាមទ្វារមាសជាដើម។ ក្នុងករណី កូនរបកស្បែកតិចតួច វាអាចគ្រាន់តែជាជំងឺសើស្បែកនៅលើក្មេងប៉ុណ្ណោះ។
៣- ចែងថ្ងៃ
កន្ទួលខ្ទុះតូចៗ ពណ៌ក្រហមដែលមានពងបែកច្រើនកើតមាននៅលើខ្នង មុខ បរិវេណដើមទ្រូងទារក នេះជារោគសញ្ញារបស់ចែងថ្ងៃ ឬចំហាយក្ដៅដែលពាក្យបច្ចេកទេសហៅថា Miliaria។ Miliaria កើតឡើងដោយសារការកកស្ទះរន្ធញើស ហើយជាពិសេសកើតតែពេលដែលអាកាសធាតុក្ដៅខ្លាំង ឬសើមខ្លាំង។
៤- ស្រែងទឹកដោះ
ស្រែងទឹកដោះ ជាការរលាកក្រហមៗ ហើយមានខ្ទុះសៗនៅលើមុខ ឬថ្ពាល់កូន។ ជំងឺនេះកើតឡើងដោយសារការវិវត្ត នៃការបញ្ជូនអ័រម៉ូនពីម៉ាក់ទៅរាងកាយទារក ឬមកការពីហៀរទឹកដោះ និងទឹកដោះគោទៅលើមុខទារក។ បើរលាកតិចតួច វារលាយបាត់ទៅវិញដោយខ្លួនឯង តែរលាកខ្លាំងម៉ាក់ប៉ាចាំបាច់ត្រូវទៅជួបគ្រូពេទ្យដើម្បីប្រើប្រេង ឬក្រែមបំបាត់រលាកព្យាបាល។
[embed-health-tool-vaccination-tool]
