សារធាតុ Biphenol-A នៅក្នុងសម្ភារៈជ័រ ឬប្លាស្ទិកដែលយកមកវិចខ្ចប់អាហារ ឬជាកំប៉ុងទឹកដោះគោកូន ពេលញ៉ាំទៅបង្កគ្រោះថ្នាក់ចំពោះអាហារខ្លាំងណាស់ ព្រោះជាតិគីមីប្រភេទនោះ អាចជ្រាបចូលក្នុងខ្លួនបាន។ ដូចនេះហើយវេជ្ជបណ្ឌិតផ្នែកទូទៅ លី ឫទ្ធីគុណ បានឲ្យដឹងថា បើចង់វិចខ្ចប់ចំណីអាហារ ត្រូវរកប្រអប់ដាក់ធ្វើពីកែវ ឬដែក។
ប៉ុន្តែប្រសិនបើចង់យកសម្ភារៈផលិតពីជ័រមកដាក់ម្ហូបអាហារក្ដៅៗត្រូវសម្គាល់ពាក្យ Biphenol-A free ឬ BPA free ទើបធុននឹងកម្ដៅ ឬមិនសាយភាយពេលត្រូវកម្ដៅ។ ទោះជាអាចប្រើត្រូវកម្ដៅបានក៏ពិតមែន តែផលិតផលអស់ទាំងនោះត្រូវពឹងទៅលើម៉ាកផលិតផលដែរ ព្រោះម៉ាកដែលមានតម្លៃថ្លៃ គុណភាពក៏ល្អទៅតាមនោះដែរ។
លោកបន្តទៀតថា សម្រាប់ដបទឹកដោះគោទារកវិញ បើទោះជាផលិតផលនោះបានសរសេរលើប្រអប់ដាក់ដបថា Biphenol-A free ក៏ពិតមែន ម៉ាក់ប៉ាក៏ត្រូវ ផ្លាស់ប្ដូរដបនៅពេលឃើញពេលមានស្នាមប្រេះ ឬបែកនៅលើដប ហើយត្រូវពិនិត្យក្បាលដោះបៅរៀងរាល់ ៣ ខែម្ដងបើមានប្រែពណ៌ រហែក ស្នាមល្អក់ ស្អិត ត្រូវផ្លាស់ប្ដូរវាថ្មី។ ចំណែកតួកំប៉ុងវិញអាស្រ័យទៅលើផលិតផល ដោយខ្លះមានត្រឹម ៣ ខែ ហើយខ្លះទៀតដល់ទៅ ៦ ខែទៅលើគុណភាពផលិតផល។
ម្ចាស់សេវាថែទាំមនុស្សចាស់តាមគេហដ្ឋានរូបនោះបានបន្ថែមទៀតថា មានផលិតផលខ្លះបានសរសេរនៅលើសម្បកប្រអប់ថា Biphenol-A free ហើយអាចទ្រទ្រង់កម្ដៅបាន១១០ អង្សាសេក៏ពិតមែន ក៏មិនគួរយកទៅស្ងោរលើចង្ក្រានដែរ ហើយចំណែកដបវិញអាចប្រើបានរហូត ១ ឆ្នាំធន់កម្ដៅលើសនេះទៀត ក៏មិនគួរប្រើរហូតដល់កាលកំណត់នោះ ព្រោះថាដបទឹកដោះគោខ្លះមិនមែនលាងសម្អាតទឹកក្ដៅតែមួយដងក្នុងមួយថ្ងៃ ខ្លះមានរហូតដល់ ៣-៥ ដង ហើយការលាងសាប៊ូ ទឹកក្ដៅ ច្រំដែលៗច្រើន ក៏ងាយធ្វើឲ្យដបខូចគុណភាពមុនកំណត់ទៀតផង។
[embed-health-tool-vaccination-tool]
