ម៉ាក់ប៉ាទាំងអស់តែងតែព្រួយបារម្ភ គិតគូរពីកូនគ្រប់ពេលវេលាមិនថាកូនតូច ឬធំឡើយ តែសម្រាប់កូននៅតូចចិត្តខ្វាយខ្វល់ខ្លាំងជាងកូនធំ ព្រោះវ័យនេះមិនអាចធ្វើអ្វីបានដោយខ្លួនឯងឡើយ។ ជាពិសេសពេលកូនចូលរៀន តែងមានកូនចិត្តខ្លាចមិត្តរួមថ្នាក់វាយធ្វើបាបកូន។ ដូចនេះអ្នកគ្រូ សន សុចិន្តា បង្រៀននៅសាលាឯកជនថ្នាក់មតេ្តយ្យ បានណែនាំឲ្យម៉ាក់ប៉ាបង្រៀនកូន ៦ ក្បាច់ ដើម្បីការពារខ្លួនពីការវាយធ្វើបាប។
១- បង្រៀនកូនឲ្យចេះស្រុះស្រួលជាមួយមិត្តរួមថ្នាក់
រឿងដំបូងពេលចូលរៀន គឺត្រូវបង្រៀនកូនឲ្យចេះស្រលាញ់មិត្តរួមថ្នាក់ និងមានចំណីអាហារ ឬរបស់លេងចេះចែករំលែកគ្នា។ នៅពេលក្មេងមានអ្វីចែកទៅដល់ក្មេងដទៃ ក្មេងដទៃពេលមានអ្វីក៏ចេះចែករំលែកមកឲ្យកូនយើងវិញដែរ។ កាលណាតែក្មេងស្រលាញ់គ្នា ពួកគេគ្មានរឿងដែលត្រូវទាស់ទែង ឬគុំកួនគ្នាដែរ។ ក្មេងប្រៀបដូចជាក្រដាសសស្អាត ប្រសិនបើយើងបង្រៀនយ៉ាងម៉េច គេក៏ធ្វើតាមទាំងអស់។
២- បង្រៀនឲ្យចេះអភ័យ និងសុំទោស
សម្រាប់កូនតូចៗដែលរៀននៅកម្រិតទាបៗ ពេលឈ្លោះ ឬវ៉ៃគ្នាជាមួយមិត្ត មិនថានៅសាលារៀន ឬអ្នកជិតផ្ទះទេ ប្រាកដជាមកប្រាប់យើងអាណាព្យាបាលមិនខាន។ ក្រោយស្ដាប់កូនរួចហើយ យើងត្រូវតែដេញដោលថា មូលហេតុអ្វីបានកូនវ៉ៃគ្នា ទោះដឹងថាកូនយើងមិនបានខុសក៏ដោយ ក៏ត្រូវតែបង្រៀនពួកគេឲ្យចេះអធ្យាស្រ័យដល់មិត្ត ព្រោះថាបើខឹងគ្នា កូនៗនឹងបាត់បង់មិត្ត គ្មានរណាលេងជាមួយជាក់ជាមិនខាន។ បន្ទាប់ពីនោះ យើងក៏ត្រូវឆ្លៀតពេលជួបជាមួយអាណាព្យាបាលម្ខាងទៀត ដើម្បីប្រាប់គេពីរឿងនេះ ហើយយើងជាមនុស្សធំត្រូវនាំគ្នាផ្សះផ្សាចំណងមិត្តភាពពួកគេឡើងវិញ។
៣- ប្រាប់កូនពេលមានបញ្ហារាយការណ៍ទៅគ្រូ
ប្រសិនបើក្មេងៗឈ្លោះគ្នានៅម៉ោងបង្រៀន គ្រូទទួលបន្ទុកថ្នាក់ប្រាកដជាដឹង តែបើគ្រូមិនដឹង ត្រូវប្រាប់កូនថា បើមានមិត្តរួមថ្នាក់តែងតែធ្វើបាបត្រូវរាយការណ៍ទៅគ្រូជាបន្ទាន់។ នៅពេលគ្រូដឹងថា មានមិត្តរួមថ្នាក់ធ្វើបាបកូនយើង គាត់ប្រាកដជាដាក់ពិន័យ និងរាយការណ៍បន្តទៅនាយក និងអាណាព្យាបាលទាំងសងខាង ដើម្បីឲ្យដឹងថាកូនមានបញ្ហាអ្វីមួយ។ សម្រាប់ភាគីខុសគ្រូនឹងសំណូមពរឲ្យម៉ាក់ប៉ាជួយធ្វើការអប់រំបន្ថែម និងហាត់ពត់លត់ដំអត្តចរិតឲ្យបានប្រសើរជាងមុន។ ប្រសិនបើក្មេងទាំងនោះនៅតែបន្តធ្វើទៀត ខាងសាលានឹងចាត់វិធានការបន្ទាន់ ដើម្បីការពារកូនយើង។
៤- កុំធ្វើបាបអ្នកដទៃ
បើមិនចង់ឲ្យអ្នកដទៃវ៉ៃ ឬឈ្លោះទាស់ទែងជាមួយ យើងត្រូវបង្រៀនកូនកុំឲ្យទៅធ្វើបាប និងរំខានអ្នកដទៃមុន។ ពេលខ្លះអាចមកពីកូនយើងទៅធ្វើបាបកូនគេមុន ទើបមានការគុំកួនរហូតដល់គេវាយ និងតាមធ្វើបាបរហូត។ មិនត្រឹមតែទង្វើនោះទេ សូម្បីតែកាយវិការក៏មិនគួរបញ្ចេញធ្វើឲ្យអ្នកដទៃថ្នាំថ្នាក់ចិត្តដែរ នេះជារបៀបសន្សំសុខឲ្យកូនរបស់យើង។
៥- ចេះជួយសង្គ្រោះអ្នកដទៃ
ត្រូវប្រាប់កូនថា ប្រសិនបើឃើញមិត្តរួមថ្នាក់ណាត្រូវគេធ្វើបាប យើងមិនគួរនៅស្ងៀមឡើយត្រូវរត់ទៅរកជំនួយពីគ្រូ ឬពីសន្តិសុខដែលមានសមត្ថភាពអាចសង្គ្រោះពួកគេបាន។ បន្ថែមពីលើនេះ យើងត្រូវផ្ដល់យោបល់ថា ការជួយអ្នកដទៃពេលមានបញ្ហា ថ្ងៃក្រោយពេលយើងមានបញ្ហាក៏នឹងមានមនុស្សមកជួយបែបនេះដែរ។
៦- កុំឲ្យកូនទៅកន្លែងស្ងាត់ជាមួយអ្នកដទៃ
ដើម្បីបញ្ច្រាសការធ្វើបាបពីសំណាក់មនុស្សគ្រប់វ័យ ត្រូវប្រាប់កូនកុំឲ្យទៅណាមកណាដោយគ្មានម៉ាក់ប៉ា ឬគ្រូទៅជាមួយ ព្រោះពេលមានរឿងអាចមានមនុស្សធំជួយសម្របសម្រួល។ ជាពិសេសកូនស្រីត្រូវហាមដាច់ខាត ដោយសារខ្លាចមានការបៀតបៀន និងធ្វើបាបផ្លូវភេទណាមួយ។
អត្ថបទពាក់ព័ន្ធ៖
- មានពេលនៅក្បែរកូន គួរតែឆ្លៀតបង្រៀនរឿង ៤ យ៉ាងនេះ
- មុនឲ្យកូនចូលរៀន ម៉ាក់ប៉ាត្រៀមអីខ្លះ? ធ្វើម៉េចកុំឲ្យកូនខ្លាចសាលា?
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
