ក្មេងតូចៗភាគច្រើនសុទ្ធតែធ្លាប់ជួបបញ្ហាក្តៅខ្លួន ជួនកាលក្តៅ១ ឬ២ថ្ងៃហើយ ដាក់ថ្នាំមិនបាត់សោះ ធ្វើឲ្យម៉ាក់ប៉ាព្រួយបារម្ភខ្លាំង។ លោកស្រីវេជ្ជបណ្ឌិត គុជ ឆោមដាលីន បម្រើការងារនៅមជ្ឈមណ្ឌលវេជ្ជសាស្ត្រសិង្ហបុរី នឹងចែករំលែកព័ត៌មានមូយចំនួនអំពីមូលហេតុនាំឲ្យក្មេងតូចឧស្សាហ៍ក្តៅខ្លួន រួមទាំងកម្រិតនៃអាការៈក្តៅខ្លួន ដែលម៉ាក់ប៉ាត្រូវនាំកូនទៅជួបគ្រូពេទ្យបន្ទាន់។
កម្រិតនៃអាការៈក្តៅខ្លួនដែលត្រូវនាំកូនទៅពេទ្យ លោកស្រីវេជ្ជបណ្ឌិតឯកទេសកុមាររូបនេះ បែងចែកជា ៤ ប្រភេទ។
ទី១ ៖ បើកូនអាយុក្រោម៦ខែក្តៅខ្លួន ម៉ាក់ប៉ាត្រូវនាំទៅពេទ្យ ព្រោះក្មេងអាយុប៉ុណ្ណេះអាចប្រឈមនឹងជំងឺធ្ងន់ច្រើន។
ទី២៖ កូនក្តៅខ្លួនមិនអាចគ្រប់គ្រងបាន ក្រោយឲ្យថ្នាំត្រជាក់រួច វាអាចជាសញ្ញាក្មេងមានបញ្ហាសុខភាពអ្វីផ្សេងទៀតក្រោយផ្តល់ថ្នាំហើយមិនត្រជាក់ខ្លួន។
ទី៣៖ ក្មេងមានអាការៈក្តៅខ្លួន អត់មាត់ អត់លេងច្រើន គិតតែពីគេងខុសប្លែកធម្មតា។
ទី៤៖ ក្មេងក្តៅខ្លួនខ្លាំងហើយមានសញ្ញាធ្ងន់ធ្ងរ ដូចជា ប្រកាច់ មានបញ្ហាផ្លូវដង្ហើម ក្អួត។
លោកស្រីវេជ្ជបណ្ឌិត គុជ ឆោមដាលីន បានបញ្ជាក់ទៀតថា ក្តៅខ្លួនមិនមែនជាជំងឺទេ វាជារោគសញ្ញាដែលរាងកាយកំពុងប្រឆាំងនឹងអ្វីមួយ ទើបបណ្តាលឲ្យចេញរោគសញ្ញាក្តៅខ្លួន។
ក្តៅខ្លួនអាចមកពីការមានការបង្ករោគ និងមិនមែនការបង្ករោគ។ ការបង្ករោគ អាចកើតមានដោយសារពពួកវីរុស ពពួកបាក់តេរីជាដើម។ ការបង្ករោគនៅកន្លែងណាមួយ អាចធ្វើឲ្យក្មេងៗមានបញ្ហា រលាកច្រមុះ រលាកពោះវៀន ឬរលាកស្បែក។ល។
ទាក់ទងទៅនឹងការមិនបង្ករោគវិញនោះ គឺមានកត្តាដូចជា ស្លៀកពាក់ឲ្យកូនជិតពេក ឬឃ្លុំខ្លួនពេកអាចធ្វើឲ្យកូនហប់ បណ្តាលឲ្យកម្តៅខ្លួនកូនលើសពីធម្មតា។ កត្តាមួយទៀត គឺអាចមកពីការញ៉ាំទឹកមិនគ្រប់គ្រាន់ នៅពេលអាកាសធាតុក្តៅ។ មួយវិញទៀត អាចទាក់ទងនឹងការវ៉ាក់សាំងបង្ការ និងការដុះធ្មេញ ក៏អាចធ្វើឲ្យក្មេងក្តៅខ្លួនដែរ។
អត្ថបទពាក់ព័ន្ធ៖
- Fever of Unknown Origin (ក្តៅខ្លួនដោយមិនដឹងប្រភព)
- តិចនិកបញ្ចុះកម្តៅកូនតូចៗពេលក្តៅខ្លួនខ្លាំង មិនឲ្យគ្រោះថ្នាក់ដល់ជីវិត
- មកដឹងពីវិធីសង្គ្រោះបឋមកូន ពេលក្តៅខ្លួនខ្លាំង មិនឲ្យឈានដល់ប្រកាច់
- ហេតុអីកូនតូចងាយក្តៅខ្លួន ហើយក្ដៅកម្រិតណា ទើបត្រូវបារម្ភខ្លាំង?
- កំហុសឆ្គង ៣ យ៉ាងធ្វើឲ្យកូនឈឺញឹក តែម៉ាក់ប៉ាមិនសូវចាប់អារម្មណ៍
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-vaccination-tool]
