ផ្ទុះការឆ្លងកូវីដ ១៩ នៅផ្សារបឹងកេងកង រកឃើញអ្នកឆ្លងជិត ២០០នាក់ហើយ

នៅរសៀលថ្ងៃទី២៨ មិថុនា ២០២១នេះ អាជ្ញាធរខណ្ឌបឹងកេងកងបានសម្រេចបិទខ្ទប់ផ្សារបឹងកេងកងជាបន្ទាន់ ក្រោយរកឃើញអ្នកឆ្លងកូវីដ ១៩ ជិត ២០០នាក់ ដែលភាគច្រើនជាអាជីវករផ្សារនេះតែម្តង។ អាជ្ញាធរខណ្ឌបឹងកេងក៏ណែនាំអាជីវករ និងអ្នកដែលបានចេញចូលផ្សារបឹងកេងកងពីថ្ងៃទី ២១-២៦ មិថុនា ទៅផ្តល់សំណាករកវីរុសកូវីដ ១៩ នៅវិទ្យាល័យ ជា ស៊ីម បឹងកេងកង។

បើតាមសេចក្តីសម្រេចរបស់រដ្ឋបាលរាជធានីភ្នំពេញ បានបញ្ជាក់ថា សម្រេចបិទខ្ទប់ផ្សារបឹងកេងកង មានទីតាំងស្ថិតក្នុងសង្កាត់បឹងកេងកងទី១ ខណ្ឌបឹងកេងកង រាជធានីភ្នំពេញ ដែលមានករណីវិជ្ជមានកើតឡើងថ្មីក្នុងចំណោមបុគ្គលិក-កម្មករ និងអាជីវករ ដើម្បីប្រយុទ្ធ និងទប់ស្កាត់ការឆ្លងរាលដាលនៃជំងឺកូវីដ-១៩ រយៈពេល ១៤ថ្ងៃ គិតចាប់ពីម៉ោងសូន្យ នាថ្ងៃទី២៩ ខែមិថុនា ឆ្នាំ២០២១ រហូតដល់ថ្ងៃទី១២ ខែកក្កដា ឆ្នាំ២០២១ ។