ពេលពពោះ គួរហាត់ប្រាណអត់? បើហាត់ បានប្រយោជន៍អីមកវិញ?

ហាត់ប្រាណពេលពពោះជារឿងល្អគួរធ្វើ។ សំខាន់ត្រង់ថា គួរហាត់របៀបម៉េច ទើបអត់ប៉ះពាល់កូន។ បើចង់មានកូន ស្រីៗយើងគួរបង្កើតទម្លាប់ហាត់ប្រាណ មុនយកកូន ព្រោះវាមានប្រយោជន៍ច្រើន។ ស្ដាប់ “Hello គ្រូពេទ្យ” បកស្រាយ៖

១- ហាត់មុនមានផ្ទៃពោះ

បើទម្លាប់ហាត់ប្រាណមុនមានផ្ទៃពោះ ធ្វើឲ្យការពពោះមានសុវត្ថិភាព និងធ្វើឲ្យមានកម្លាំង ដើម្បីទ្រាំទ្រពេលប្រឹង និងបង្កើតកូនបានយ៉ាងល្អ ហើយម៉ាក់ៗនឹងស្រកទម្ងន់លឿន ពេលសម្រាលកូនរួច។ ចំពោះស្រីៗមានបញ្ហាអត់កូនដោយសារតែលើសទម្ងន់ ឬគីសដៃស្បូន (Polycystic ovarian syndrom= PCOS) ការហាត់ប្រាណអាចជួយបាន។

២- ដាក់ផែនការហាត់ភ្លាម

មនុស្សជាច្រើនជ្រើសរើសកម្មវិធីហាត់ប្រាណ បន្ទាប់ពីដឹងថាមានផ្ទៃពោះ។ ម៉ាក់ៗគួរដឹងថា សុខភាពម្ដាយមានទំនាក់ទំនងខ្លាំងទៅនឹងសុខភាពកូនក្នុងផ្ទៃ ដូចនេះចាប់ផ្ដើមកាន់តែលឿនកាន់តែប្រសើរ។ បើហាត់ប្រាណក្លាយជាទម្លាប់ យើងនឹងយល់ថា វាកាន់តែមានភាពងាយស្រួល ពេលពពោះ។

៣- គម្រោងសាកួរ

ផែនការដាក់ហើយ ការតាំងចិត្តមានហើយ តែមិនឈ្នះការរវល់សោះ ដូច្នេះត្រូវមានគម្រោងសាកួរ ត្រូវធ្វើម៉េចកុំឲ្យរំលងការហាត់។ វាសំខាន់ណាស់ ដើម្បីជំរុញឲ្យការហាត់ប្រាណបានជោគជ័យ។

៤- ហាត់ជួយសាច់ដុំខ្នង និងពោះ

ពេលកូនក្នុងផ្ទៃលូតលាស់ ពោះ និងសុដន់ម្ដាយកាន់តែរីកធំឡើងៗ ធ្វើឲ្យបង្កើនទម្ងន់ចំចំណុចកណ្ដាល ហើយចេះតែជំរុញទៅមុខ។ ជាលទ្ធផលផ្នែកផ្សេងៗតឹង ហើយរឹង។ ដូច្នេះ ការពង្រឹងសរសៃពួរពិតជាសំខាន់ណាស់។

យោងតាមអ្នកជំនាញ ស្រីៗដែលមានសាច់ដុំពោះរឹង និងសាច់ដុំខ្នងខ្លាំង មិនសូវចេះឈឺខ្នង ពេលមានផ្ទៃពោះឡើយ។ ហាត់សាច់ដុំជុំវិញក្បាលពោះ ធ្វើឲ្យយើងមានតុល្យភាពជំហរកាន់តែល្អ ដែលនេះពិតជាសំខាន់ចំពោះស្ត្រីមានផ្ទៃពោះ។

៥- កុំហាត់ដើម្បីស្រកគីឡូ

ហាត់នេះក្នុងគោលបំណងឲ្យសុខភាពម្ដាយ និងកូនរឹងមាំល្អ មិនមែនហាត់យកស្រកគីឡូទេ។ តុល្យភាពនៃការហាត់ប្រាណ និងរបបអាហារដែលមានជីវជាតិ វាចាំបាច់ណាស់ ព្រោះរាងកាយម៉ាក់ៗត្រូវការជីវជាតិគ្រប់គ្រាន់ ដើម្បីចិញ្ចឹមកូនក្នុងពោះ។ មានកូន ទម្ងន់ចាប់ផ្ដើមឡើង ចឹងហើយ មិនបាច់ឆ្ងល់ ហើយទៅហាត់សម្រកទេ។

៦- កុំហាត់ខ្លាំងៗ

បើចូលចិត្តហាត់ខ្លាំងៗ ត្រូវប្តូរ ព្រោះពេលនេះកំពុងមានកូនក្នុងផ្ទៃ កុំចេះតែមិនអី ហើយប្រថុយ ឬធ្វើតាមទម្លាប់ ព្រោះអាចប៉ះពាល់ដល់កូន។ ចាំសម្រាល ហើយកូនរឹងដៃជើង ចាំចាប់ផ្ដើមហាត់វិញ ក៏មិនហួសពេលដែរ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ពេលពពោះ គួរ​ហាត់​ប្រាណ​អត់? បើ​ហាត់ ​បាន​ប្រយោជន៍​អីមក​វិញ?

ពេលពពោះ គួរហាត់ប្រាណអត់? បើហាត់ បានប្រយោជន៍អីមកវិញ?