ជក់បារីបង្កផលអវិជ្ជមានច្រើនចំពោះសុខភាព កុំថាឡើយស្រីៗមានផ្ទៃពោះ កាន់តែគ្រោះថ្នាក់ខ្លាំងថែមទៀត។ ចំពោះស្រីៗកំពុងពពោះ មិនចាំបាច់ដល់ថ្នាក់ជក់ទេ គ្រាន់តែនៅជិតផ្សែងបារី ក៏អាចប៉ះពាល់កូនក្នុងផ្ទៃបានដែរ។ ការទទួលរងផ្សែងបារីចំពោះស្រីៗមានផ្ទៃពោះ ត្រូវគេបែងចែកជា ២ ក្រុម គឺស្រូបផ្សែងបារីដោយប្រយោល និងក្រុមអ្នកប៉ះពាល់ទាំងមិនដឹងខ្លួន។
១- អ្វីជាស្រូបផ្សែងបារីដោយប្រយោល?
ស្រូបផ្សែងបារីដោយប្រយោល ជាភាសាបច្ចេកទេស Second hand smoke សំដៅលើផ្សែងបារីដែលមនុស្សនៅជុំវិញយើងបានជក់ វាប្រៀបបានទៅស្រាក្រឡុកមួយកែវ បានមកពីសារធាតុគីមីជាង ៤.០០០ ប្រភេទ ក្នុងនោះមាន ៥០ ប្រភេទ ត្រូវបានបង្ហាញថាអាចបង្កឲ្យមានជំងឺមហារីក។
២- ស្រូបផ្សែងបារីដោយប្រយោលអាចប៉ះពាល់កូនក្នុងផ្ទៃកម្រិតណា?
ស្រូបផ្សែងបារីដោយប្រយោល ឬ Second hand smoke អាចបង្កឲ្យមានផលវិបាកជាច្រើនចំពោះស្រីៗកំពុងមានផ្ទៃពោះ ខណៈបញ្ហាសុខភាពទូទៅបណ្តាលមកពីស្រូបផ្សែងបារីដោយប្រយោល មាន៖
– រលូតកូន
– កូនកើតមិនគ្រប់គីឡូ
– កូនកើតមិនគ្រប់ខែ
– មានបញ្ហាក្នុងការលូតលាស់
– មានការលំបាកក្នុងការរៀន
– មានរោគសញ្ញាស្លាប់ភ្លាមៗរបស់ទារក (SIDS)
ការសិក្សាបានបង្ហាញថា ផលប៉ះពាល់ពីការស្រូបផ្សែងបារីដោយប្រយោល អំឡុងពេលមានផ្ទៃពោះ អាចបង្កគ្រោះថ្នាក់ ដល់ការលូតលាស់ផ្នែកស្មារតី និងខួរក្បាលទារកបាន។
៣- គ្រោះថ្នាក់ដោយប៉ះពាល់ទាំងមិនដឹងខ្លួនពេលពពោះ
ចៀសវាងពីការជក់បារី ឬស្រូបផ្សែងពីមនុស្សជុំវិញខ្លួនតែមួយមុខ គឺមិនទាន់គ្រប់គ្រាន់ទេ។ ស្រីៗមានផ្ទៃពោះជាច្រើន បានទទួលរងផ្សែង ឬប៉ះពាល់ជាមួយកាកសំណល់បារី ដោយមិនដឹងខ្លួន ហៅថា Third hand smoke។ នៅពេលមានអ្នកជក់បារី នោះផ្សែង ឬកាកសំណល់បារី នឹងជាប់នៅលើគ្រឿងសង្ហារឹម ព្រំ ថ្នាំលាប ក៏ដូចជារបស់ផ្សេងៗទៀត ហើយផ្សែងនេះ គឺអាចនៅបានជាច្រើនឆ្នាំ។
បើកន្លែងយើងមានក្លិនផ្សែងបារី ទោះជាគ្មានគេជក់ក៏ដោយ ក៏គួរចាកចេញភ្លាម បើកំពុងមានផ្ទៃពោះ។ សារធាតុគីមីក្នុងផ្សែងបារី អាចចូលទៅក្នុងចរន្តឈាមយើង រួចឆ្លងកាត់តាមឈាមទៅកាន់គភ៌ក្នុងផ្ទៃ។ ការស្រាវជ្រាវបង្ហាញថា ការប៉ះពាល់ជាមួយបារីទាំងមិនដឹងខ្លួន ធ្វើប៉ះពាល់ដល់ការអភិវឌ្ឍសួតទារក អាចនាំឲ្យមានបញ្ហាដល់ផ្លូវដង្ហើមទៀតផង។
អត្ថបទពាក់ព័ន្ធ៖
- សុខៗស្រាប់តែមានផ្ទៃទាំងមិនទាន់ចង់បាន ត្រូវធ្វើម៉េច?
- គេងអត់លក់ពេលពពោះ ប្រើថ្នាំងងុយគេង ប៉ះពាល់អត់?
៤- វិធីសាស្ត្រការពារ
បើកំពុងតែព្យាយាមចង់យកកូន គួរឈប់ជក់បារីទាំងស្រុង ត្រូវព្យាយាមឲ្យអស់ពីសមត្ថភាព ដើម្បីកាត់បន្ថយនូវបរិមាណនៃ Third hand smoke ក្នុងផ្ទះយើង។ ដៃគូ ឬប្តី នៅតែជក់បារី ត្រូវប្រាកដថាពួកគេជក់នៅក្រៅផ្ទះ និងមិនចូលផ្ទះជាមួយនឹងសម្លៀកបំពាក់ពួកគេពាក់ពេលជក់បារីនោះទេ។ គួរឲ្យដៃគូ ឬប្តីយើង ពាក់អាវក្រៅនៅពេលជក់បារី និងត្រូវដោះអាវនោះចេញ ពេលចូលផ្ទះវិញ។
ក្រោយពីកូនសម្រាលរួច ត្រូវកំណត់នូវកម្រិតជាតិផ្សែងបារីដែលប៉ះពាល់ដល់កូន ដោយសារក្មេងប៉ះពាល់ដោយប្រយោល ងាយប្រឈមជំងឺ SIDS (រោគសញ្ញាស្លាប់ភ្លាមៗលើទារក)។ លើសពីនេះទៀត ក្មេងប៉ះពាល់ផ្សែងបារីដោយប្រយោល (Second hand smoke) ងាយធ្វើឲ្យចុះខ្សោយប្រព័ន្ធការពាររាងកាយ មានហានិភ័យខ្ពស់ឆ្លងមេរោគ និងបញ្ហាផ្លូវដង្ហើម។ ផ្សែងបារី Third hand smoke ក៏អាចបង្កឲ្យមានគ្រោះថ្នាក់ដូចគ្នាដែរ ហេតុនេះត្រូវថែទាំកូនឲ្យបានល្អ ឲ្យនៅឆ្ងាយពីកន្លែងអាចមានសំណល់ផ្សែងបារី។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបលផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-pregnancy-weight-gain]
