អាថ៌កំបាំង ៥ យ៉ាងអំពីការសម្រាលកូនតាមធម្មជាតិ ម៉ាក់ៗគួរស្វែងយល់

សម្រាលកូន ជាបទពិសោធចងចាំអស់មួយជីវិតរបស់អ្នកម្ដាយ ហើយអ្នកម្ដាយនីមួយៗ មានបទពិសោធផ្សេងៗគ្នា។ អត្ថបទនេះនឹងប្រាប់ស្រីៗយើងអាថ៌កំបាំង ៥ យ៉ាងអំពីការសម្រាលកូនតាមធម្មជាតិ (តាមទ្វារមាស) ព្រោះមានម៉ាក់ៗមួយចំនួនមិនទាន់ច្បាស់ បារម្ភរឿងសុវត្ថិភាព ឬករណីមិនប្រក្រតី អំឡុងពេលសម្រាល។

១- អាថ៌កំបាំងទី ១ – ការហូរចេញនូវកាកសំណល់មកជាមួយកូន

ពេលកំពុងត្រៀមខ្លួនសម្រាលកូន ម៉ាក់ៗនឹងមានអារម្មណ៍ថាតើនឹងមានអ្វីដែលមកជាមួយនឹងកូន។ អំឡុងពេលសម្រាល ចលនាពោះវៀនធំ ក៏មិននៅស្ងៀមដែរ គឺវាមានចលនាស្របពេលដែលយើងប្រឹងបង្កើតកូន។ ចលនាដែលមាននៅក្នុងពោះវៀនធំ មានដូចជា លាមក ទឹកនោម និងឈាម គឺជាសារធាតុដែលអាចចេញមកជាមួយកូន។ អត់មានអីខុសប្រក្រតីទេ នេះជាបាតុភូតធម្មជាតិចំពោះមធ្យោបាយសម្រាលកូនបែបធម្មជាតិ មិនវះកាត់ ហើយយើងក៏មិនអាចទប់ស្កាត់នូវបញ្ហាទាំងនេះបានដែរ ព្រោះចលនាពោះវៀន និងការរុញកូនចេញពេលសម្រាល គឺប្រើសាច់ដុំតែមួយ (ពេលយើងប្រឹង)។

២- អាថ៌កំបាំងទី ២ – អារម្មណ៍ពីរប្រភេទ

ការសម្រាលកូនតាមធម្មជាតិ ជាប្រភេទនៃការសម្រាលកូនដែលអាចធ្វើឲ្យយើងមានអារម្មណ៍ពីរប្រភេទ គឺឈឺចាប់ និងមានសម្ពាធ។ នៅពេលដែលយើងចាប់ផ្តើមប្រឹង នឹងមានសម្ពាធទៅកាន់មាត់ស្បូនដើម្បីរុញកូនចេញមកក្រៅ។ នៅពេលដែលទារកចុះក្រោម យើងនឹងមានអារម្មណ៍ពីសម្ពាធដូចនៅពេលស្បូនកន្រ្តាក់ ទៅជាមានសម្ពាធកាន់តែខ្លាំងឡើងៗ។

យើងនឹងមានអារម្មណ៍ថាដូចជាពោះវៀនកំពុងមានចលនាខ្លាំង ដោយសារវាមានសរសៃប្រសាទដូចទៅនឹងសរសៃប្រសាទដែលភ្ញោចឲ្យស្បូនកន្រ្តាក់ដែរ។ អំឡុងពេលសម្រាលកូនតាមទ្វារមាស ម៉ាក់ៗនឹងជួបហានិភ័យដែលធ្វើឲ្យស្បែក និងជាលិកាជុំវិញទ្វារមាសរលាក ឬរហែក បង្កការឈឺចាប់កាន់តែខ្លាំង និងការឈឺចាប់ខ្លះទៀត កើតមានរវាងទ្វារមាស និងរន្ធគូទក្រោយពេលសម្រាលផងដែរ។

៣- អាថ៌កំបាំងទី ៣ – ការដកដង្ហើមចូលជួយបានច្រើន

យើងអាចគិតថាអត់សំខាន់ ប៉ុន្តែការដកដង្ហើមពិតជាអាចជួយក្នុងការសម្រាលកូនពិតមែន។ ការអនុវត្តដកដង្ហើមមុនពេលសម្រាល អាចជួយឲ្យស្បូនឆាប់កន្ត្រាក់ និងអាចជួយឲ្យយើងមានភាពស្ងប់ស្ងាត់ នៅពេលឈឺពោះ។ ត្រូវយកចិត្តទុកដាក់លើការដកដង្ហើមប្រចាំថ្ងៃដែលអាចជួយឲ្យយើងមានអារម្មណ៍ស្ងប់ស្ងាត់បាន។ ការធ្វើយ៉ូហ្កា ក៏ជាជម្រើសដ៏ល្អមួយក្នុងការត្រៀមខ្លួនសម្រាលដែរ។ ព្យាយាមដកដង្ហើមដោយមាត់ និងបើកបំពង់កឲ្យធំដើម្បីឲ្យរាងកាយ និងផ្លូវចិត្តទទួលបានអត្ថប្រយោជន៍ក្នុងពេលសម្រាល។

អត្ថបទពាក់ព័ន្ធ៖

មុនសម្រាលកូន ១ ខែ ម៉ាក់ៗគួររៀបចំរបស់អស់ទាំងនេះត្រៀម
កូនកើតភ្លាម ហេតុអីគ្រូពេទ្យតែងដាក់នៅលើទ្រូងម៉ាក់ ចុះបើដាក់លើទ្រូងប៉ាបានអត់?

៤- អាថ៌កំបាំងទី ៤ – ការធ្វើចលនាដើម្បីជួយដល់ការសម្រាល

យើងតែងឃើញគេសម្រាលកូនដោយគេងនៅលើគ្រែ ប៉ុន្តែតាមពិតទៅ វាមិនមែនជាទម្រង់ដែលល្អសម្រាប់ម្តាយនិងកូនឡើយ។ ការដើរជុំវិញ ឬឈរ អាចមាននូវអត្ថប្រយោជន៍ជាច្រើនសម្រាប់ទាំងម្តាយនិងកូន។ ការធ្វើចលនា មានតួនាទីសំខាន់ និងជួយសម្រួលដល់ការឈឺចាប់។

ម្តាយគួរឈរឲ្យត្រង់ដើម្បីឲ្យមានអារម្មណ៍ស្រួល និងបន្ធូរបន្ថយនូវការឈឺចាប់នៅពេលដែលស្បូនកន្ត្រាក់ម្តងៗ។ ការឈរមានដូចជា ឈរត្រង់ ឈរផ្អៀងទៅមុខ អង្គុយបញ្ឈរជើងម្ខាង និងដេកចំហៀង។ ជំហរទាំងនេះអាចប្រើក្នុងដំណាក់កាលទី១ និងទី ២ នៃការឈឺពោះសម្រាលកូនបាន។ ជំហរដែលសមស្រប អាស្រ័យទៅលើស្ថានភាពសុខភាពរបស់ម៉ាក់ៗ បូករួមទាំងការណែនាំរបស់វេជ្ជបណ្ឌិត។

៥- អាថ៌កំបាំងទី ៥ – ជាវិញក្នុងពេលខ្លី

ការសម្រាលកូនតាមធម្មជាតិ ជាពេលវេលាដ៏វែងដែលអាចធ្វើឲ្យអស់កម្លាំង និងពិបាកខ្លាំង។ អត្ថប្រយោជន៍ដ៏ល្អបំផុតនៃការសម្រាលកូនតាមធម្មជាតិនោះ គឺការជាសះស្បើយវិញក្នុងរយៈពេលខ្លី។ រាងកាយនឹងអាចរកឃើញនូវវិធីខ្លួនឯងក្នុងការឲ្យខ្លួនយើងជាសះស្បើយវិញ ចន្លោះពី ២៤ ទៅ ៤៨ ម៉ោង ហើយយើងក៏អាចចាកចេញពីមន្ទីរពេទ្យបានឆាប់ជាងការរំពឹងទុកដែរ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញដើម្បីស្វែងយល់ពីដំណោះស្រាយរបស់អ្នក។ Hello Health Group មិនចេញ វេជ្ជបញ្ជា មិនធ្វើរោគវិនិច្ឆ័យ ឬការព្យាបាលជូនទេ៕

ត្រួតពិនិត្យដោយ

វេជ្ជ. ចាន់ ស៊ីណេត

ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ

អត្ថបទដោយ ចាន់ សុខឡាង · កែ 26/09/2019