តៅហ៊ូគឺធ្វើពីសណ្តែកសៀងមានកាឡូរីទាប និងមិនមានជាតិ Gluten។ តៅហ៊ូសំបូរដោយជាតិដែក និងកាល់ស្យូម ជាពិសេសប្រូតេអ៊ីនសម្រាប់អ្នកតមសាច់។ ក្រៅពីនេះ តៅហ៊ូមានសារធាតុ isoflavones ដែលអាចការពារជំងឺមហារីក ជំងឺបេះដូង និងជំងឺពុកឆ្អឹង។
សារធាតុចិញ្ចឹមរបស់តៅហ៊ូ
តៅហ៊ូមួយដុំ ១២២ក្រាមមាន៖
- ១៧៧កាឡូរី
- កាបូអ៊ីដ្រាត ៥,៣៦ក្រាម
- ជាតិខ្លាញ់ ១២,១៩ក្រាម
- ប្រូតេអ៊ីន ១៥,៥៧ក្រាម
- កាល់ស្យូម ៤២១មីល្លិក្រាម
- ម៉ាញ៉េស្យូម ៦៥មីល្លិក្រាម
- ជាតិដែក ៣,៣៥មីល្លិក្រាម
- ផូស្វ័រ ២៨២មីល្លិក្រាម
- ប៉ូតាស្យូម ១៧៨មីល្លិក្រាម
- ស័ង្កសី ២មីល្លិក្រាម
- Folate ២៧មីក្រូក្រាម។
ផលប្រយោជន៍របស់តៅហ៊ូ
១. ជំងឺបេះដូង
សារធាតុ isoflavines នៅក្នុងសណ្តែកសៀងអាចជួយកាត់បន្ថយកម្រិតខ្លាញ់អាក្រក់ LDL ទោះបីជាមិនបានជួយបង្កើនកម្រិតខ្លាញ់ល្អ HDLក៏ដោយ។ ការសិក្សាជាច្រើនបានបង្ហាញថាសណ្តែកសៀងអាចកាត់បន្ថយហានិភ័យកត្តាបង្កជំងឺបេះដូងមានដូចជាការលើសទម្ងន់ និងកម្រិតកូលេស្តេរ៉ូល។ FDA របស់សហរដ្ឋអាមេរិកបានកំណត់ថាការទទួលបានយ៉ាងតិច២៥ក្រាមនៃប្រូតេអ៊ីនសណ្តែកក្នុងមួយថ្ងៃអាចមានឥទ្ធិពលល្អដល់កម្រិតកូលេស្តេរ៉ូល។
បន្ថែមពីនេះទៀតការញ៉ាំតៅហ៊ូជំនួសឲ្យសាច់អាចជួយបន្ថយកម្រិតខ្លាញ់អាក្រក់ LDL ដែលនេះបន្ថយហានិភ័យជំងឺក្រិនសរសៃឈាមបេះដូង (Atherosclerosis) និងលើសសម្ពាធឈាម។
អត្ថបទពាក់ព័ន្ធ៖
- ក្រៅពីជំងឺទឹកនោមផ្អែមទេ ជំងឺបេះដូង ក៏បង្កឡើងដោយសារជាតិស្ករដែរ!
- អត់ញ៉ាំអាហារព្រឹក អាចស្លាប់ដោយសារជំងឺបេះដូង
អត្ថបទពាក់ព័ន្ធ៖
- អាហារល្អៗជួយបេះដូង គួរញ៉ាំជាប្រចាំ
- ឮរហូតពាក្យ “កូលេស្តេរ៉ូល” ជាអ្វីឲ្យប្រាកដ ម៉េចបានពាក់ព័ន្ធជាមួយបេះដូង?
២. ជំងឺមហារីកសុដន់
ការសិក្សាជាច្រើនបានលើកឡើងថាសារធាតុប្រឆាំងអុកស៊ីតកម្ម genistein នៅក្នុងសណ្តែកសៀងអាចទប់មិនឲ្យកោសិកាមហារីកលូតលាស់បាន។ ប៉ុន្តែការសិក្សាពីមុនបានលើកឡើងពីសុវត្ថិភាពក្នុងការញ៉ាំសណ្តែកសៀងក្រោយពីរកឃើញមានជំងឺមហារីកសុដន់ ព្រោះតែសារធាតុ isoflavone មានលក្ខណៈគីមីស្រដៀងនឹងអ៊ឺស្ត្រូហ្សែន ហើយកម្រិតអ៊ឺស្ត្រូហ្សែនខ្ពស់អាចបង្កើនហានិភ័យមហារីកសុដន់។ ប៉ុន្តែការញ៉ាំកម្រិតតិចតួច ឬតិចជាង២ដងក្នុងមួយថ្ងៃគឺមិនមានប៉ះពាល់ដល់ការលូតលាស់កោសិកាមហារីក ឬហានិភ័យនៃការកើតជំងឺមហារីកសុដន់។
ផ្ទុយទៅវិញ មានភស្តុតាងផ្សេងទៀតបង្ហាញថាការញ៉ាំសណ្តែកសៀងរាល់ថ្ងៃអាចបន្ថយការកើតឡើងវិញនៃជំងឺមហារីកសុដន់។ សម្រាប់អ្នកជាពីមហារីកសុដន់គឺមិនទាន់មានភស្តុតាងគ្រប់គ្រាន់ក្នុងការណែនាំឲ្យញ៉ាំសណ្តែកសៀងទេ។ ដូចនេះគួរពិគ្រោះជាមួយគ្រូពេទ្យមុននឹងចាប់ផ្តើមបញ្ចូលសណ្តែកសៀងទៅក្នុងរបបអាហារប្រចាំថ្ងៃ។
៣. ជំងឺទឹកនោមផ្អែមប្រភេទ២
អ្នកដែលមានជំងឺទឹកនោមផ្អែមប្រភេទ២ភាគច្រើនអាចនឹងមានជំងឺលើតម្រងនោមដែលធ្វើអោយ រាងកាយបញ្ចេញជាតិប្រូតេអ៊ីនតាមទឹកនោមយ៉ាងច្រើន។ ការសិក្សាមួយបានឲ្យដឹងថាអ្នកញ៉ាំប្រូតេអ៊ីនសណ្តែកសៀងគឺបញ្ចេញប្រូតេអ៊ីនទៅក្នុងទឹកនោមតិចជាងអ្នកញ៉ាំប្រូតេអ៊ីនសាច់។ ដូចនេះសណ្តែកសៀងមានប្រយោជន៍ដល់អ្នកជំងឺទឹកនោមផ្អែមប្រភេទ២។
៤. ជួយតម្រងនោម
ប្រូតេអ៊ីនក្នុងសណ្តែកសៀងអាចជួយដល់ដំណើរការតម្រងនោម និងមានប្រយោជន៍សម្រាប់អ្នកជំងឺតម្រងនោមកំពុងព្យាបាលដោយលាងឈាម ឬប្តូរតម្រងនោម។ ការវិភាគមួយបានបង្ហាញថាសណ្តែកសៀងអាចមានផលប៉ះពាល់វិជ្ជមានទៅលើ biomarker (កម្រិតជំងឺ) របស់អ្នកជំងឺតម្រងនោមរ៉ាំរ៉ៃ។ នេះអាចមកពីប្រូតេអ៊ីននៅក្នុងសណ្តែកសៀងដែលមានឥទ្ធិពលទៅលើកម្រិតលីពីតនៅក្នុងឈាម។
៥. ជំងឺពុកឆ្អឹង
សារធាតុ isoflavones អាចជួយកាត់បន្ថយការពុកឆ្អឹង និងបង្កើនជាតិរ៉ែក្នុងឆ្អឹង ជាពិសេសសម្រាប់ស្ត្រីអស់រដូវ។
៦. ជំងឺខួរក្បាលទាក់ទងនឹងអាយុ
ការសិក្សាជាច្រើនបានឲ្យដឹងថានៅតំបន់ដែលមនុស្សញ៉ាំសណ្តែកសៀងច្រើនគឺមានភាគរយតិចក្នុងការកើតមានជំងឺខួរក្បាលទាក់ទងនឹងអាយុ។ ការសិក្សានៅឆ្នាំ២០១៧បានលើកឡើងថាសណ្តែកសៀងអាចជួយអ្នកមានជំងឺភ្លេចភ្លាំងដោយសារសារធាតុ lecithin។ សារធាតុនេះជួយរាងកាយផលិតអាស៊ីតphosphatidic និងphosphatidylserine ដែលអាស៊ីតទាំងពីរមានតួនាទីសំខាន់ក្នុងដំណើរការរបស់ណឺរ៉ូន។
[embed-health-tool-bmr]
