ចង់សម្រកគីឡូ “Hello គ្រូពេទ្យ” មានវិធីសាស្ត្រ អាចជួយបាន ដោយគ្រាន់តែអនុវត្តតាមការណែនាំទាំងនេះ។
មាតិកា
ចង់ស្រកគីឡូ ដាច់ខាតត្រូវដឹងរបៀបញ៉ាំទាំងនេះសិន
១- កុំបោះបង់អាហារពេលព្រឹក
សម្រកគីឡូដោយផាសុកភាព ហាមដាច់ខាត កុំអត់អាហារពេលព្រឹក ព្រោះធ្វើឲ្យយើងកាន់តែឃ្លាន ញ៉ាំកាន់តែច្រើន។ ញ៉ាំគ្រាប់ធញ្ញជាតិសុទ្ធ ផ្លែឈើ និងទឹកដោះគោគ្មានជាតិខ្លាញ់ (ទឹកដោះគោសម្រកទម្ងន់) ជាជម្រើសល្អសម្រាប់អាហារព្រឹក។
២- ហាមញ៉ាំពេលយប់
មិនត្រូវញ៉ាំអាហារ ឬរបស់ពេលយប់ បន្ទាប់ពីបាយល្ងាចទេ។ តែបើចង់ញ៉ាំ គួរញ៉ាំតែក្តៅ ឬយ៉ាអួរមួយកំប៉ុងក៏បាន។ ពេលដុសធ្មេញរួច មិនគួរញុំាអីទៀតទេ ហើយអាហារសម្រន់ពេលយប់អាចធ្វើឲ្យឡើងគីឡូលឿនបំផុត។
៣- រើសភេសជ្ជៈមានកាឡូរីត្រឹមត្រូវ
ញ៉ាំភេសជ្ជៈផ្អែមៗ ស្រាក្រហម ឬស្រាក្រឡុកច្រើនពេក ក៏ធ្វើឲ្យខូចរាងដែរ។ បើយើងស្រេកខ្លាំង ទឹកធម្មតាជាជម្រើសល្អបំផុត ទឹកលាយក្រូចឆ្មារបន្តិច ទឹកដោះគោគ្មានជាតិខ្លាញ់ ឬជាតិខ្លាញ់ទាប ទឹកផ្លែឈើស្រស់ ក៏ល្អដែរ។ ពេលឃ្លាននៅចន្លោះពេលធម្មតា គួរញ៉ាំទឹកបន្លែដែលមានជីវជាតិ និងមានកាឡូរីទាប។
៤- ញ៉ាំផ្លែឈើឲ្យច្រើន
ដើម្បីសម្រកទម្ងន់តាមធម្មជាតិ មិនថាប្រុស ឬស្រីទេ ក្នុងរបបអាហារ គួរញុំាបន្លែ ផ្លែឈើឲ្យច្រើនជាងសាច់ ព្រោះអាចផ្តល់វីតាមីន ជាតិរ៉ែ សារធាតុបំប៉ន ជាតិសរសៃជំនួសកាឡូរី។
៥- ជ្រើសយកគ្រាប់ធញ្ញជាតិ
ធញ្ញជាតិចម្រាញ់ហើយ ដូចជា នំបុ័ងពណ៌ស នំខេក នំឃុកគី វាមិនមែនជាជម្រើសល្អសម្រាប់សម្រកទម្ងន់ទេ។ ញ៉ាំនំបុ័ងផលិតពីស្រូវសាលី និងនំចម្រាញ់ពីបន្លែ ព្រោះអាចផ្គត់ផ្គង់ជាតិសរសៃចាំបាច់ និងជួយឲ្យឆាប់ឆ្អែត។
៦- គ្រប់គ្រងបរិយាកាសជុំវិញខ្លួន
គួរធ្វើឲ្យផ្ទះបាយក្លាយជាកន្លែងពោរពេញដោយអាហារសុខភាព ហើយមានកម្មវិធីជប់លៀង ត្រូវចាំថា គួរញ៉ាំតែអាហារសម្រន់ដែលជួយឲ្យមានសុខភាពល្អ ឬញ៉ាំទឹកមួយកែវធំជាមុនសិន ចាំញុំាអាហារទាំងនោះតាមក្រោយ។ សម្រាប់អាហារប៊ូហ្វេ ជ្រើសរើសម្ហូបណាល្អសម្រាប់សុខភាពបានហើយ។
៧- បន្ថយរបបអាហារ
កាត់បន្ថយចំណែកអាហារពី ១០-២០% ជាវិធីអាចបញ្ចុះទម្ងន់ជោគជ័យដូចគ្នា។ ម្ហូបនៅតាមភោជនីយដ្ឋាន ឬនៅផ្ទះ ធម្មតា លើសចំណែកដែលរាងកាយយើងត្រូវការ បើអ៊ីចឹង យើងអាចគ្រប់គ្រងរបបអាហារដោយប្រើតែចានតូចៗបានហើយ។
៨- បញ្ចេញកម្លាំងឲ្យច្រើន
វិធីមានប្រសិទ្ធភាពបំផុតដើម្បីបញ្ចុះគីឡូដោយមិនចាំបាច់តមអាហារ គឺដើរឲ្យច្រើនជាងមុនប្រហែល ១០.០០០ ជំហានក្នុងមួយថ្ងៃ អាចប្រើឧបករណ៍វាស់ចម្ងាយផ្លូវរំឭក និងជំរុញទឹកចិត្តយើង។
៩- ប្រូតេអ៊ីគ្រប់គ្រាន់ក្នុងអាហារ
ញ៉ាំអាហារតិចៗ បូកជាមួយអាហារសម្រន់ រៀងរាល់ ៣-៤ ម៉ោងម្តង និងបន្ថែមប្រូតេអ៊ីន (សាច់) មានជាតិខ្លាញ់ទាប អាចជួយរក្សាកម្រិតឈាមឲ្យមានលំនឹង ធ្វើឲ្យយើងមានអារម្មណ៍ឆ្អែតបានយូរ។ យើងអាចសាកល្បងញ៉ាំយ៉ាអួរដែលមានជាតិស្ករតិច គ្រាប់ធញ្ញជាតិមួយចានតូច បឺរដំណាប់ណ្តែក (Peanut butter) ស៊ុត សណ្តែក ឬសាច់គ្មានខ្លាញ់។
១០- វិធីងាយៗផ្សេងទៀត
ដើម្បីស្រកទម្ងន់តាមធម្មជាតិ ហាមញ៉ាំអាហារមានខ្លាញ់ច្រើន ដូចជា ម៉ាយូណេស គ្រីម ឬដំឡូងបារាំងស។ ជម្រើសផ្សេងដើម្បីសម្រកទម្ងន់ មាន ដំឡូងបារាំងដុត (មិនលាយ ឬប្រលាក់គ្រឿង) ទឹកដោះគោស្រស់គ្មានខ្លាញ់។ ត្រូវចាំ ការបញ្ចុះទម្ងន់ ត្រូវធ្វើសន្សឹមៗ និងច្បាស់លាស់។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
10 Ways to Lose Weight Without Dieting. http://www.webmd.com/diet/features/10-ways-to-lose-weight-without-dieting Accessed November 31, 2016
កំណែប្រែបច្ចុប្បន្ន
27/02/2021
អត្ថបទដោយ Khlaut Rithy
ត្រួតពិនិត្យដោយ វេជ្ជ. ចាន់ ស៊ីណេត
បច្ចុប្បន្នភាពដោយ៖ ទូច សុខា
ត្រួតពិនិត្យដោយ
វេជ្ជ. ចាន់ ស៊ីណេត
ឯកទេសសម្ភព និងរោគស្ត្រី · មន្ទីរពេទ្យបង្អែកមិត្តភាពកម្ពុជា-ចិន សែនសុខ
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម