បង្គា មានទាំងក្នុងទឹកប្រៃ និងទឹកសាប ហើយជាអាហារឆ្ងាញ់ និងមានប្រូតេអ៊ីនខ្ពស់ គ្រប់គ្នាចូលចិត្តញ៉ាំ លើកលែងតែអ្នកមានអាលែកហ្ស៊ីជាមួយគ្រឿងសមុទ្រប៉ុណ្ណោះ។ រឿងគួរឲ្យភ្ញាក់ផ្អើលមួយ គឺក្នុងខ្លួនបង្គាទន្លេ ឬយើងនិយមហៅថា បង្គាទឹកសាប នៅអង់គ្លេស មានសារធាតុញឿន កូកាអ៊ីន។

អ្នកស្រាវជ្រាវនៅមហាវិទ្យាល័យ King’s College ក្នុងក្រុងឡុងដ៍ និងសាកលវិទ្យាល័យ Suffolk តេស្ដបង្គាទន្លេ យកមកពី ១៥ ទីតាំងផ្សេងគ្នាក្នុងតំបន់ជនបទ Suffolk ឃើញថា សុទ្ធតែមានសារធាតុញឿន កូកាអ៊ីន។ ក្រៅពីនេះ សារធាតុញឿន ១ប្រភេទទៀត កេតាមីន និងជាតិថ្នាំសម្លាប់សត្វល្អិតហាមឃាត់ ក៏មានក្នុងខ្លួនបង្គាដែរ។ អ្នកស្រាវជ្រាវថា “វាជាការរកឃើញគួរឲ្យភ្ញាក់ផ្អើលមួយ” តែផលប៉ះពាល់លើបង្គា ហាក់នៅកម្រិតទាបនៅឡើយ។

លោកសាស្ដ្រាចារ្យ Nic Bury នៃសាកលវិទ្យាល័យ Suffolk ថា សារធាតុកូកាអ៊ីន ក្នុងបង្គា ជាបញ្ហាមួយសម្រាប់ទន្លេ នៅតំបន់ Suffolk ប៉ុន្ដែរង់ចាំការស្រាវជ្រាវបន្ថែមទៀត ថាតើបញ្ហានេះ កើតឡើងនៅតែតំបន់ Suffolk ចក្រភពអង់គ្លេស ឬទូទាំងពិភពលោក។

លោកបន្ថែមថា បញ្ហាបរិស្ថានទាញចំណាប់អារម្មណ៍យ៉ាងខ្លាំងពីសាធារណជន ដោយវាពាក់ព័ន្ធជាមួយបម្រែបម្រួលធាតុអាកាស និងការបំពុលដោយប្លាស្ទិក។ ផលប៉ះពាល់នៃការបំពុលដោយជាតិគីមីទាំងនេះ លើសត្វព្រៃ មិនអាចមើលឃើញទេ និងចាំបាច់ពិនិត្យឲ្យបានម៉ត់ចត់។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ប្លែក​ណាស់ ​បង្គា​មាន​ជាតិ​កូកាអ៊ីន​

ប្លែកណាស់ បង្គាមានជាតិកូកាអ៊ីន