សប្ដាហ៍មុន “Hello គ្រូពេទ្យ’ បានជម្រាបប្រិយមិត្តពី ក្មេងៗញ៉ាំផ្លែគូលែន ៣១នាក់ស្លាប់ និងរាប់សិបនាក់ ដេកពេទ្យនៅក្នុងប្រទេសឥណ្ឌា ប៉ុន្ដែឈានចូលមកដល់សប្ដាហ៍នេះ តួលេខក្មេងៗស្លាប់ដោយសារញ៉ាំផ្លែគូលែន បានកើនឡើងដល់ ១១៣នាក់ហើយ។

លោក Ashok Kumar Singh មន្រ្តីសុខាភិបាលរដ្ឋ Bihar របស់ឥណ្ឌា បញ្ជាក់ថា ក្មេងជាង ១០នាក់ទៀត បានស្លាប់កាលពីថ្ងៃអង្គារ ម្សិលមិញ ហើយសរុបតួលេខក្មេងស្លាប់ដោយសារញ៉ាំផ្លែគូលែន មានចំនួន ១១៣នាក់។ លោកបន្ដថា ក្មេង ៦០នាក់ទៀត ដែលមានអាយុក្រោម ១០ឆ្នាំ និងកង្វះអាហាររូបត្ថម្ភ កំពុងទទួលការព្យាបាល ក្រោយការផ្ទុះឡើងរោគសញ្ញាជំងឺរលាកខួរក្បាលស្រួចស្រាវ (Acute Encephalitis Syndrome) នៅស្រុក Muzaffarpur ក្នុងរដ្ឋ Bihar នៅក្នុងខែមិថុនា ឆ្នាំ២០១៩។

លោកបន្ថែមថា ក្មេង ៦នាក់ បានជាសះស្បើយ និងបានត្រឡប់ទៅផ្ទះវិញ ក្រោយការព្យាបាលរោគសញ្ញាជំងឺរលាកខួរក្បាលស្រួចស្រាវ។

កាលពីថ្ងៃអង្គារ ម្សិលមិញ ប្រជាពលរដ្ឋឥណ្ឌារាប់សិបនាក់ ប្រមូលផ្ដុំគ្នានៅមុខមន្ទីរពេទ្យក្នុងស្រុក Muzaffarpur ដោយចោទអាជ្ញាធរថា ធ្វើសកម្មភាពយឺត និងគ្មានយកចិត្តទុកដាក់នោះទេ។

អត្ថបទពាក់ព័ន្ធ៖ ក្មេងៗញ៉ាំផ្លែគូលែន ៣១នាក់ស្លាប់ និងរាប់សិបនាក់ទៀត ដេកពេទ្យ

រោគសញ្ញាជំងឺរលាកខួរក្បាលស្រួចស្រាវ (Acute Encephalitis Syndrome) កំណត់តាមរយៈអាការៈគ្រុនក្ដៅខ្លាំង ប្រកាច់ ពិការ (Paralysis) និងការធ្លាក់ចុះកម្រិតស្ករក្នុងឈាម។ អាការៈទាំងនេះ បណ្ដាលមកពីមេរោគ បាក់តេរី និងជាតិពុល រាលដាលទៅកាន់ផ្នែកផ្សេងៗនៃរាងកាយ។

ពាក់ព័ន្ធនឹងជំងឺនេះ អ្នកវិទ្យាសាស្ត្រអាមេរិក កាលពីឆ្នាំ២០១៥ រកឃើញថា វាពាក់ព័ន្ធនឹងសារធាតុពុល នៅក្នុងផ្លែគូលែន និងផ្លែឈើដាំនៅក្នុងតំបន់ត្រូពិច ដែលកម្ពុជា និងប្រទេសអាស៊ានផ្សេងទៀត ក៏នៅក្នុងតំបន់នេះដែរ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

ចំនួន​ក្មេងដែល​​ស្លាប់​ដោយ​ញ៉ាំ​ផ្លែគូលែន​ថ្ងៃ​មុន​ កើន​លើស ១០០​នាក់ហើយ

ចំនួនក្មេងដែលស្លាប់ដោយញ៉ាំផ្លែគូលែនថ្ងៃមុន កើនលើស ១០០នាក់ហើយ