លទ្ធផលតេស្តរបស់វិទ្យាស្ថានប៉ាស្ទ័រកម្ពុជាព្រឹកនេះបានរកឃើញអ្នកឆ្លង COVID-19 ថ្មី ២ ករណី ជាប្ដីប្រពន្ធ ហើយបានព្យាបាលជាសះស្បើយ ៥ នាក់បន្ថែមទៀត។ សម្រាប់អ្នកតេស្តវិជ្ជមាន មានស្រ្តីជនជាតិខ្មែរ អាយុ ៤៥ ឆ្នាំ ជាភរិយាបុរសអាយុ ៤៧ ឆ្នាំ បានដាក់ឲ្យសម្រាកព្យាបាលនៅមណ្ឌលសុខភាពចាក់អង្រែក្រោម និងបុរសម្នាក់ទៀតជាជានជាតិខ្មែរ ត្រូវជាស្វាមីស្រ្តីអាយុ ៤៥ ឆ្នាំ រស់នៅសង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ហើយកំពុងសម្រាកព្យាបាលនៅមណ្ឌលសុខភាពចាក់អង្រែក្រោម។ បុរសរូបនោះជាមិត្តភ័ក្តិបុរសជនជាតិចិន ចូលមកកម្ពុជាកាលពីថ្ងៃ ២០ មីនា ឆ្នាំ ២០២០ អ្នកឧស្សាហ៍ឡើងចុះ និងក្រោយពីបានចាកចេញពីកម្ពុជានៅថ្ងៃទី ៣ ខែ មេសា ឆ្នាំ២០២០ ក៏បានរកឃើញ COVID-19 ដោយអាជ្ញាធរសុខាភិបាលចិន។ បុរសជនជាតិចិនរូបនោះគឺជាមិត្តប្រុសនារីវៀតណាមដែលតេស្តវិជ្ជមាន COVID-19 ក្រសួងបានប្រកាសកាលពីម្សិលមិញ។