មនុស្សភាគច្រើនកាលណាកើតជំងឺឫសដូងបាតតែងតែភ័យខ្លាច និងខ្មាសអៀនណាស់ សុខចិត្តលាក់លាំង មិនហ៊ានទៅជួបគ្រូពេទ្យភ្លាមៗនោះទេ។ បើតាមការលើកឡើងរបស់លោកវេជ្ជបណ្ឌិត ចាន់ ស៊ីណេត ឯកទេសជំងឺទូទៅ ជំងឺឫសដូងបាត ជាជំងឺដែលឧស្សាហ៏កើតមានលើមនុស្សទាំងប្រុសទាំងស្រី។ ប៉ុន្តែស្ត្រីមានផ្ទៃពោះ និងអ្នកមានបញ្ហាទល់លាមក ឬរាករ៉ាំរ៉ៃ ប្រឈមកើតជំងឺនេះច្រើនជាងធម្មតា។
យោងតាមការសិក្សាស្រាវជ្រាវ មនុស្សជាង ១ នាក់ ក្នុងចំណោម ៤ នាក់ រងផលប៉ះពាល់ពីជំងឺឫសដូងបាត។ ខាងក្រោមនេះជារោគសញ្ញាជំងឺឫសដូងបាត ប្រភេទជំងឺឫសដូងបាត ផលប៉ះពាល់ និងគ្រោះថ្នាក់ធ្ងន់ធ្ងរ នៃជំងឺឫសដូងបាត។
១. រោគសញ្ញាជំងឺឫសដូងបាត
– ហូរឈាមក្រហមស្រស់នៅទ្វារធំ
– ឈឺចាប់ទ្វារធំ
– រមាស់ទ្វារធំ
– រលាក ក្រហាយនៅទ្វារធំ
– មានសើម ឬហូរទឹករងៃនៅទ្វារធំ
– មានលៀនចេញប៉ោងសរសៃឫសដូងបាត។
រោគសញ្ញាជំងឺឫសដូងបាតមានច្រើនដូចការរៀបរាប់ខាងលើ តែក្នុងនោះការហូរឈាមជារោគសញ្ញាដែលកើតញឹកញាប់ ដែលឈាមនោះមានពណ៌ក្រហមស្រស់តិចតួចបន្ទាប់ពីបន្ទោបង់ហើយ។
២. ប្រភេទជំងឺឫសដូងបាត
គេបែងចែកជំងឺឫសដូងបាតជា ៣ ប្រភេទ៖
– ជំងឺឫសដូងបាតនៅខាងក្នុង (Internal hemorrhoids)៖ ជំងឺឫសដូងបាតប្រភេទនេះនៅខាងក្នុងចុងពោះវៀនធំ។ ជំងឺឫសដូងបាតនៅខាងក្នុង ជាទូទៅមិនមានឈឺចាប់ទេ ប៉ុន្តែវាធ្វើឲ្យយើងបត់ជើងធំចេញឈាម។
– ជំងឺឫសដូងបាតខាងក្រៅ (External hemorrhoids)៖ ជំងឺឫសដូងបាតប្រភេទនេះ មាននៅខាងក្រៅ ជុំវិញរន្ធគូទ ហើយអាចធ្វើឲ្យរមាស់ ឬឈឺចាប់ ពេលខ្លះអាចដាច់រហែកទៀតផង។
– ជំងឺកំណកឈាមឫសដូងបាត (Thrombosed hemorrhoids) ៖ កំណកឈាមអាចប្រែក្លាយទៅជាឫសដូងបាតខាងក្រៅដែលមានពណ៌ស្វាយ ឬខៀវ ដែលគេហៅថា ដុំកំណកឈាម ឬកំណកឈាមឫសដូងបាត។
៣. ផលប៉ះពាល់ធ្ងន់ធ្ងរ នៃជំងឺឫសដូងបាត
ដ្បិតជំងឺឫសដូងបាតមិនបណ្តាលឲ្យមានគ្រោះថ្នាក់ដល់ជីវិតក៏ពិតមែន តែជំងឺនេះរំខានដល់ជីវិតរស់នៅប្រចាំថ្ងៃ ថែមទាំងបណ្តាលឲ្យឈឺចាប់ខ្លាំងពេលបន្ទោរបង់ម្តងៗ។ ករណីខ្លះហូរឈាមខ្លាំង ហើយពេលឈានដល់ដំណាក់កាលធ្ងន់ធ្ងរ ដុំនៅរន្ធគូទលៀនចេញមកក្រៅខ្លាំង មិនអាចរុញចូលទៅវិញបាននោះទេ តម្រូវឲ្យចាក់ថ្នាំ ចងសរសៃ ឬវះកាត់។
[embed-health-tool-bmr]
