ការយល់ខុសមួយចំនួនពាក់ព័ន្ធនឹងជំងឺឫសដូងបាត

យើងដឹងហើយថា ជំងឺឫសដូងបាត អាចកើតមានលើមនុស្សគ្រប់វ័យ។ អ្នកកើតជំងឺនេះច្រើនតែមានការអៀនខ្មាស ចូលចិត្តលាក់បាំង ឯខ្លះទៀតជឿលើពាក្យចចាមអារ៉ាមផ្តេសផ្តាស។ ដើម្បីកុំឲ្យមានការភាន់ច្រឡំតទៅទៀត យើងនឹងលើកការបកស្រាយរបស់ឱសថការី និងវេជ្ជបណ្ឌិតជំនាញ ជុំវិញការយល់ខុសមួយចំនួនពាក់ព័ន្ធនឹងជំងឺឫសដូងបាត។

កើតជំងឺឫសដូងបាតជារឿងខ្មាសអៀន គួរតែលាក់បាំង

ការកើតជំងឺឫសដូងបាតមិនមែនជារឿងខ្មាសអៀន គួរតែលាក់បាំងឡើយ។ ផ្ទុយទៅវិញការលាក់បាំងមិនព្រមពិគ្រោះជាមួយគ្រូពេទ្យនឹងធ្វើឲ្យប៉ះពាល់ដល់ជីវិតរស់នៅប្រចាំថ្ងៃ ហើយស្ថានភាពជំងឺកាន់តែធ្ងន់ធ្ងរ។ បញ្ហានេះដែរ ឱសថការី លាង ម៊ីលិញ លើកឡើងថា តាមបទពិសោធន៍របស់ខ្លួនដែលជួបអ្នកជំងឺឫសដូងបាត ក្នុង ១០ នាក់ ប្រហែលជាអៀន ៨ នាក់ហើយ ដោយអ្នកជំងឺដែលមកទិញថ្នាំ និងសាកសួរព័ត៌មាន ភាគច្រើនមិនហ៊ាននិយាយពីស្ថានភាពជំងឺរបស់ខ្លួនទេ ពេលខ្លះប្រាប់ត្រឹមរោគសញ្ញាប៉ុណ្ណោះ។

ញ៉ាំហឹរនាំឲ្យកើតជំងឺឫសដូងបាត

លោកវេជ្ជបណ្ឌិត ផៃ សុភា ឯកទេសផ្នែកជំងឺក្រពះ ពោះវៀន ថ្លើម និងរន្ធបាត នៃមន្ទីរពេទ្យមិត្តភាពខ្មែរ-សូវៀត ពន្យល់ថា ទាក់ទងនឹងការញ៉ាំហឹរ មិនមានការសិក្សាណាដែលបញ្ជាក់ថា ការញ៉ាំហឹរធ្វើឲ្យកើតជំងឺឫសដូងបាតឡើយ។ លោកវេជ្ជបណ្ឌិតមានប្រសាសន៍ថា “ខ្ញុំចេះតែនិយាយលេងជាមួយអ្នកជំងឺថា បើសិនជាការញ៉ាំហឹរធ្វើឲ្យមានជំងឺឫសដូងបាត ជនជាតិថៃដែលចូលចិត្តញ៉ាំអាហារហឹរ ប្រហែលជាកើតជំងឺឫសដូងបាតគ្រប់គ្នាហើយ ឬមួយក៏ជនជាតិឈីលីដែលញ៉ាំហឹរខ្លាំងដែលនោះ ក៏មានជំងឺឫសដូងបាតទាំងអស់គ្នាដែរហើយ”។

ឲ្យតែមានឈាមក្រហមស្រស់នៅលើលាមក ជាសញ្ញាកើតជំងឺឫសដូងបាតហើយ

ការហូរឈាមតាមរន្ធបាត គឺជារោគសញ្ញាដែលកើតញឹកញាប់លើអ្នកជំងឺឫសដូងបាត។ ប៉ុន្តែវាមិនប្រាដកថា ឲ្យតែហូរឈាមនៅរន្ធបាតជាជំងឺឫសដូងបាតទេ។ ការធ្លាក់ឈាមពណ៌ក្រហមស្រស់ ជាពិសេសនៅពេលបន្ទោបង់ អាចជារោគសញ្ញាជំងឺឫសដូងបាត។ នេះជាការលើកឡើងរបស់វេជ្ជបណ្ឌិត ថាវ ស៊ីដានីន ឯកទេសផ្នែកជំងឺក្រពះ ពោះវៀន ថ្លើម និងឫសដូងបាត នៃមន្ទីរពេទ្យកាល់ម៉ែត។ ដូច្នេះអ្នកគួរតែពិគ្រោះជាមួយគ្រូពេទ្យ ដើម្បីប្រាកដថា វាមិនមែនជាសញ្ញានៃជំងឺធ្ងន់ធ្ងរមួយចំនួនដូចជាមហារីកពោះវៀនធំជាដើម។ មនុស្សជាច្រើនមានការយឺតយ៉ាវក្នុងការទៅជួបជាមួយគ្រូពេទ្យ ដោយសារតែការភ័យខ្លាច ការខ្មាសអៀន ឬភាពមិនស្រួលក្នុងខ្លួន។ប៉ុន្តែការពិនិត្យរាងកាយនេះគឺចាំបាច់ណាស់សម្រាប់ការធ្វើរោគវិនិច្ឆ័យដ៏ត្រឹមត្រូវ។ ការពិនិត្យនេះគឺមិនមានការឈឺចាប់ និងសាមញ្ញ។

ជំងឺឫសដូងបាតទាមទារការវះកាត់

ដើម្បីព្យាបាលជំងឺឫសដូងបាត គេមានវិធីជាច្រើន។ គ្រូពេទ្យនឹងជ្រើសរើសយកវិធីព្យាបាល ដោយចាប់ផ្តើមពីវិធីសាមញ្ញ រហូតដល់សាំញ៉ាំ។ លោកវេជ្ជបណ្ឌិត ផៃ សុភា ឯកទេសផ្នែកជំងឺក្រពះ ពោះវៀន ថ្លើម និងរន្ធបាតបានបញ្ជាក់ថា ដើម្បីជ្រើសរើសវិធីព្យាបាលជំងឺឫសដូងបាតឲ្យត្រឹមត្រូវ ហើយមានប្រសិទ្ធភាពល្អ គឺទាល់តែយើងពិនិត្យសិន ឲ្យដឹងថាជំងឺឫសដូងបាតកម្រិតណា? គួរយកវិធីសាស្ត្រនៃការព្យាបាលណាមួយ ដើម្បីឆ្លើយតបនឹងបញ្ហារបស់អ្នកជំងឺ? ក្នុងនោះយើងមានការប្រើថ្នាំ វិធីព្យាបាលដោយប្រើឧបករណ៍ និងដោយការវះកាត់។ មិនមែនគ្រប់អ្នកជំងឺឫសដូងបាតទាំងអស់ត្រូវតែវះកាត់នោះទេ។

[embed-health-tool-bmr]