មិនបាច់និយាយក៏ដឹងដែរ បែកបាក់ស្នេហាថ្មីៗ អ្នកណាមិនសោកសៅ មិនឈឺចាប់ ទោះស្នេហាមួយនេះកើតឡើងយូរ ឬឆាប់ក៏ដោយ។ គ្នាយើងខ្លះ ពិសេសស្រីៗ តែងសួរខ្លួនឯង អាចប្រឈមមុខរស់នៅបន្តទៀតដោយរបៀបណា? មិនអ៊ីចឹង?។ យ៉ាងណា សម្រាប់មនុស្សយើងគ្មានអ្វីមិនអាចទៅរួចទេ ទោះឈឺចាប់ខ្លាំងប៉ុណ្ណា នៅតែត្រូវបន្តជីវិតទៅមុខ។ អត្ថបទនេះ “Hello គ្រូពេទ្យ” នឹងប្រាប់វិធីសាស្ត្រខ្លះៗ ជួយគ្នាយើងធ្វើចិត្តឲ្យបាន។

១- យំ

ទោះជាការយំ សម្រាប់គ្នាយើង ទាំងប្រុស ទាំងស្រី ត្រូវគេចាត់ទុក ឬមើលឃើញថា យើងទន់ខ្សោយក៏ពិតមែន ប៉ុន្តែការយំ គឺជាការប្រតិកម្មធម្មជាតិរបស់មនុស្ស ទឹកភ្នែកមានផ្ទុកអ័រម៉ូនតានតឹងអារម្មណ៍ ដែលកើតចេញដោយសារបញ្ហាទំនាក់ទំនងស្នេហ៍ទើបត្រូវបញ្ចប់។

យ៉ាងណា បើគ្នាយើងជួបបញ្ហាបែកបាក់ ទោះជាប្រុសក៏ដោយ ស្រីក៏ដោយ ត្រូវស្រែកយំឲ្យខ្លាំងៗ ហើយយំ ក៏គ្មានអ្វីគួរឲ្យខ្មាសអៀននោះដែរ។ តាមវិទ្យាសាស្ត្រ យំអាចជួយដោះស្រាយភាពសោកសង្រេង និងការឈឺចាប់ផ្លូវអារម្មណ៍ តាមរយៈទឹកភ្នែកហូរចេញមកក្រៅ ហេតុនេះ គ្នាយើងត្រូវតែស្រែកយំ បង្ហូរទឹកភ្នែកឲ្យបានច្រើន នឹងជួយឲ្យអារម្មណ៍យើងធូរស្រាលឡើងវិញ។

២- ទៅឆ្ងាយមួយរយៈ

គួរតែចាកចេញទៅកន្លែងណាឲ្យឆ្ងាយមួយរយៈខ្លី វិធីនេះ ទោះធ្វើឲ្យខ្លួនឯងកាន់តែឯកាបន្តិចក្តី ប៉ុន្តែអាចជួយឲ្យយើងនៅដាច់ឆ្ងាយពីមនុស្សដែលធ្វើឲ្យយើងឈឺចាប់ ហើយក៏មិនមែនមានន័យថាយើងត្រូវបង្ខាំងខ្លួនឯងរហូត ឬផ្តាច់ទំនាក់ទំនងពីមនុស្សជុំវិញខ្លួននោះដែរ។

គ្នាយើងមិនគួរបន្តទំនាក់ទំនងជាមួយដៃគូដែលធ្វើឲ្យយើងឈឺចាប់ទៀតទេ ការបែកបាក់ភាគច្រើន បង្កឲ្យមានរបួសផ្លូវចិត្ត ប៉ុន្តែអាចជាសះស្បើយដោយឯកឯង គ្រាន់តែត្រូវការពេលវេលាធ្វើចិត្តប៉ុណ្ណោះ។

៣- ស្វែងរកគាំទ្រពីមនុស្សជុំវិញខ្លួន

កុំលាក់លៀម ព្រោះអាចធ្វើឲ្យយើងកាន់តែមានអារម្មណ៍ឯកា ពិបាកចិត្តរឹតតែខ្លាំង។ គ្នាយើងត្រូវប្រាប់មនុស្សជុំវិញខ្លួន ពីអារម្មណ៍ឈឺចាប់យើងប្រឈមមុខ ដើម្បីទទួលបានការគាំទ្រ ការលើកទឹកចិត្ត ជំនះឆ្លងកាត់ពេលវេលាដ៏ពិបាកមួយនេះ។ ចាំថាមិត្តភក្ដិជុំវិញខ្លួនយើង អាចជួយគ្នាយើងឲ្យសប្បាយចិត្ត និងមានអារម្មណ៍ស្រស់ថ្លាជាថ្មី។

រៀបចំដំណើរកម្សាន្ត ឬធ្វើអ្វីមួយសប្បាយៗជាមួយមិត្តភក្តិ ដើម្បីឲ្យអារម្មណ៍រីករាយត្រលប់មកវិញ ជាមួយនឹងក្ដីសង្ឃឹមថ្មី។

ក្ដីសង្ឃឹម នឹងជួយយើងក្រោកឈរឡើងវិញ ប្រហែលពេលខ្លះ អាចជួយយើងរកឃើញមនុស្សល្អជាអ្នកចាស់ក៏ថាបាន។ មិនត្រូវបោះបង់ចោលក្តីសង្ឃឹមទេ ព្រោះក្រោយឆ្លងកាត់ពេលវេលាច្រើនថ្ងៃ ថ្ងៃណាមួយ យើងខ្លួនឯងនឹងដឹងថា ពេលវេលាឈឺចាប់ទាំងនេះ បានរសាយបាត់អស់ជាមិនខាន។

ត្រូវចាំថា យើងគ្រប់គ្នាសុទ្ធតែអាចធ្វើបាន គ្រាន់តែត្រូវការពេលវេលាសមស្របមួយប៉ុណ្ណោះ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

បែក​គ្នាជាមួយសង្សារ នេះ​ជា​វិធី​កាត់​ចិត្ត​យក​បេះដូង​ហ្ស៊ីន​យើង​មក​វិញ

បែកគ្នាជាមួយសង្សារ នេះជាវិធីកាត់ចិត្តយកបេះដូងហ្ស៊ីនយើងមកវិញ