បណ្តាញសង្គមបច្ចុប្បន្ន គឺជាកន្លែងសម្រាប់យុវវ័យ បង្ហោះរូបថតអនុស្សាវរីយ ក៏ជាកន្លែងសម្រាប់ បង្ហាញអារម្មណ៍ពិត ដែលចង់ប្រាប់មនុស្សគ្រប់គ្នា ប៉ុន្តែមិនអាចប្រាប់ផ្ទាល់បាន ខណៈអ្នកជំនាញអះអាងថា បណ្តាញសង្គម អាចជាអាវុធមុខពីរសម្រាប់យុវវ័យ។
តាមការស្រាវជ្រាវ ដឹកនាំដោយលោក សាស្រ្តាចារ្យ Seth J Gillihan អ្នកជំនាញចិត្តវិទ្យា មកពីសាកលវិទ្យាល័យ រដ្ឋ Pennsylvania បានសិក្សាទៅលើយុវជនប្រមាណ ជាង ១.០០០នាក់ ទាក់ទងករណីប្រើប្រាស់បណ្តាញសង្គមសម្រាប់ ដើម្បីបង្ហាញអារម្មណ៍ ដូចជា ការបាត់បង់ការងារ មុខតំណែង បាត់បង់ស្នេហា លុយកាក់ និងមនុស្សជាទីស្រឡាញ់ ជាដើម។
ប៉ុន្តែអ្វីគួរសម្គាល់នោះ សាស្រ្តាចារ្យ Seth J Gillihan រកឃើញថា ភាគច្រើនជំនួយទទួលបានពីគ្រួសារ មិត្តភក្តិ តាមរយៈបណ្តាញសង្គមនេះ គឺបានជួយជាស្មារតីដល់យុវវ័យក៏ពិតមែន ប៉ុន្តែពេលខ្លះ ជំនួយទាំងនោះ ពុំអាចអនុវត្តត្រូវទៅតាមអ្វីសាមីខ្លួនត្រូវការបំផុតនោះទេ។
លោកសាស្រ្តាចារ្យរូបនេះ បញ្ជាក់ទៀងថា ករណីខ្លះ ជំនួយផ្នែកស្មារតីលើបណ្តាញសង្គម បែរជារំឭករឿងឈឺចាប់ដោយអចេតនាទៅវិញ។ ជាពិសេសទៅទៀត ពេលអន្តរាគមន៍ ឬជំនួយភ្លាមៗ ដោយពុំបាននៅស្តាប់ឲ្យយល់ពី អ្វីជាបញ្ហាពិតប្រាកដ។
លោកថាទៀតថា សូម្បីតែអ្នកចិត្តវិទ្យាអាជីព សម្រាប់ដោះស្រាយបញ្ហាកើតឡើងទាំងនោះ ក៏ពុំទាន់ហ៊ានធានា អាចជួយមនុស្សទាំងអស់បានគ្រប់បិរបទផងដែរ ពោលគឺត្រូវការសិក្សា ពីករណីផ្សេងៗគ្នា ព្រោះមនុស្សត្រូវការជំនួយ បានជួបរឿងរ៉ាវទាំងនោះផ្សេងៗពីគ្នា។
អត្ថបទពាក់ព័ន្ធ៖
យ៉ាងណាមិញ លោកសាស្រ្តាចារ្យ Seth J Gillihan បានណែនាំ វិធីម្យ៉ាងសម្រាប់ដោះស្រាយបញ្ហាអារម្មណ៍ជនរងគ្រោះបញ្ចេញលើបណ្តាញសង្គម ត្រូវផ្អែកតាមបទពិសោធចិត្តវិទ្យា ជនជាតិស្វីស-អាមេរិកាំង គីលោកស្រី វេជ្ជបណ្ឌិត Elisabeth Kubler-Ross សម្រាប់អ្នកមានបញ្ហា បាក់ទឹកចិត្ត ស្រ្តេស ឬពិបាកគ្រប់គ្រងអារម្មណ៍។ ហើយបើចង់ជួយដល់ពួកគេ គប្បីព្យាយាមស្តាប់ពួកគេ ជាជាងធ្វើអន្តរាគមន៍ភ្លាមៗ ព្យាយាមនាំពួកគេ ទៅធ្វើសកម្មភាពល្អៗ ដើម្បីបន្លប់ទុក្ខព្រួយ ម្យ៉ាងទៀត ឧស្សាហ៍នៅក្បែរពួកគេ ជាជាងការណែនាំតែលើបណ្តាញសង្គម និងទុកពេលវេលាឲ្យពួកគេខ្លះ បើគេចង់បាន ព្រោះពេលវេលា និងការជឿជាក់លើខ្លួនឯង គឺជាកត្តាសំខាន់បំផុត ដើម្បីជនរងគ្រោះអាចជួយខ្លួនឯងគេចផុតពីបញ្ហាទុក្ខព្រួយទាំងនោះបាន។
