មនុស្សយើងម្នាក់ៗអាចកំណត់និយមន័យក្ដីសុខរឿងលើគ្រែខុសៗគ្នា ដោយអ្នកខ្លះគិតថាគ្រប់គ្រាន់ហើយត្រឹមមានអីៗម្ដងក្នុងមួយសប្ដាហ៍ អ្នកខ្លះអាចថាពីរ ឬបីដងក្នុងមួយសប្ដាហ៍ តែអ្នកខ្លះថាមួយថ្ងៃម្ដង ឬច្រើនជាងនេះក៏ថាបាន។ តើយើងអាចកំណត់ថារួមភេទប៉ុន្មានដងក្នុងមួយថ្ងៃ ឬសប្ដាហ៍ចាត់ទុកថាច្រើនពេក? ហើយអាចប៉ះពាល់សុខភាពអត់?
ចម្លើយខ្លីសម្រាប់គ្នាយើងគឺថាដរាបណាយើងនិងដៃគូពេញចិត្ត និងមានក្ដីសុខចំពោះរឿងលើគ្រែ គ្មានទេការកំណត់ជាក់លាក់ថារួមភេទប៉ុន្មានដងក្នុងមួយថ្ងៃ ឬសប្ដាហ៍ចាត់ទុកថាច្រើនពេកនោះ។ អ្វីដែលសំខាន់ គឺយើងត្រូវចេះប៉ាន់កម្លាំង និងសុខភាពរបស់យើង។ ខាងក្រោមនេះ ជាការពន្យល់ខ្លះៗទាក់ទងនឹងផលរំខានអាចកើតមាន បើយើងរួមភេទញឹកញាប់ពេក។
១. ចំពោះស្រ្តី
ដូចបាននិយាយអ៊ីចឹង គ្មានការកំណត់ណាមួយថាយើងរួមភេទប៉ុន្មានដងថាញឹកពេកនោះទេ ប៉ុន្តែយើងត្រូវចេះសង្កេតរាងកាយយើងដែរថាមានបញ្ហាអ្វីឬអត់ក្រោយរួមភេទ។ ការរួមភេទ អាចធ្វើឲ្យរាងកាយរបស់យើងជួបបញ្ហាខ្លះដែរ នៅថ្ងៃបន្ទាប់។
ថ្វីបើយើងនៅតែពេញចិត្តនឹងការរួមភេទច្រើនដងក្នុងមួយថ្ងៃ ឬសប្ដាហ៍ តែយើងក៏អាចមានចេញផលប៉ះពាល់មួយចំនួនដែរ។
ជាដំបូងនេះយើងនិយាយពីបញ្ហាចេញរោគសញ្ញាស្ងួតទ្វារមាស។ បើស្រីៗយើងមានអារម្មណ៍ថាកន្លែងសម្ងាត់ដូចជាស្ងួត នេះគឺប្រហែលមកពីយើងរួមភេទយូរ ឬច្រើនដងពេកដែរ។ ពេលដែលមានអាការៈស្ងួតទ្វារមាស ការដាច់រហែកតូចៗមួយចំនួនអាចនឹងកើតមាននៅក្នុងទ្វារមាស ដែលនេះអាចធ្វើឲ្យស្រីៗយើងមានការឈឺចាប់ដែរ។
ក្រៅពីអាចមានបញ្ហាស្ងួតទ្វារមាស ស្រីៗយើងនៅអាចប្រឈមនឹងការឆ្លងរោគនៅផ្លូវទឹកនោមដែរ បើយើងមិនបានការពារត្រឹមត្រូវពេលរួមភេទ។ អ្នកជំនាញពន្យល់ថា បើយើងរួមភេទច្រើនដងក្នុងរយៈពេលខ្លី នោះសំណើមធម្មជាតិដែលរាងកាយយើងផលិត ក៏មានតិចទៅតាមហ្នឹងដែរ។
ដូចគ្នាដែរ រួមភេទច្រើនដងជាប់ៗគ្នាអាចបង្កឲ្យស្រីៗយើងមានអារម្មណ៍រំខាន ឈឺចាប់ ឬរមាស់នៅផ្នែកខាងក្រៅ និងជុំវិញទ្វារមាស ហើយបរិវេណទ្វារមាសអាចឡើងហើមប៉ោង ជាដើម។
បញ្ហាមួយទៀតកើតចេញពីការរួមភេទញឹកញាប់ពេកអាចមានផលរំខានដូចជាកើតហានិភ័យនៃការឆ្លងរោគនៅប្លោកនោម និងទ្វារមាស។ ទឹករម្អិលចេញពីរាងកាយ អាចកម្ចាត់pH ធម្មជាតិក្នុងទ្វារមាសស្រីៗយើងចេញមកក្រៅបាន ដែលនេះនាំឲ្យយើងអាចឆ្លងរោគផ្សេងៗ។ ដូចនេះហើយ មុន និងក្រោយការរួមភេទស្រីៗយើងត្រូវសម្អាតទ្វារមាសឲ្យស្អាតជានិច្ច តែថាបើយើងរួមភេទច្រើនដងក្នុងរយៈពេលណាមួយ គឺនៅតែមានឱកាសឆ្លងរោគដូចគ្នា។
ទឹកកាមបុរសមានកម្រិតpH 7 ដែលអាចមានផលល្អដល់បាក់តេរីមិនល្អនៅក្នុងទ្វារមាសស្រីៗយើង។ ជាមួយនឹងការកកិតខ្លាំងពេលរួមភេទ ក៏អាចបង្កើតឱកាសឆ្លងបាក់តេរីទ្វារមាសដូចគ្នា ហើយបាក់តេរីនៅម្ដុំរន្ធគូទអាចរកផ្លូវចូលទៅកាន់ប្លោកនោមបាន នាំឲ្យយើងមានការឆ្លងរោគនៅផ្លូវទឹកនោមដែរ។
ក្រៅពីនេះ ការរួមភេទច្រើនដងពេកក៏អាចធ្វើឲ្យស្រីៗយើងមានការឈឺចាប់ពេលបត់ជើងតូច មានធ្លាក់សតិចៗ និងមានក្លិនទ្វារមាស ឬមានឈាមតិចៗផងដែរ។
២. ចំពោះប្រុសៗ
ចំពោះប្រុសៗវិញ ការរួមភេទច្រើនដងពេកក្នុងពេលវេលាកំណត់ណាមួយ ក៏អាចចេញជារោគសញ្ញាខ្លះៗដែរ។ រោគសញ្ញាទាំងនោះមានដូចជាមានអារម្មណ៍មិនស្រួលក្នុងខ្លួន និងឈឺចាប់ផងដែរ។
ប្រសិនបើប្រុសៗយើងបញ្ចេញទឹកកាមពីប្រាំបីដង ទៅ ១០ដងនៅថ្ងៃចុងសប្ដាហ៍ ឬត្រឹមរយៈពេលបីថ្ងៃ អាចធ្វើឲ្យយើងមានអារម្មណ៍មិនស្រួលក្នុងខ្លួន និងមានអារម្មណ៍ថាឈឺប្រដាប់ភេទផងដែរ។ ប៉ុន្តែ បើប្រុសៗយើងមានសកម្មភាពលើគ្រែច្រើនដងបែបនេះជាទៀងទាត់ នោះរាងកាយយើងនឹងទម្លាប់បានទៅតាមស្ថានភាពដែរ។
យ៉ាងណា ការអាចរាប់បានថានរណាម្នាក់ ឬខ្លួនយើងរួមភេទច្រើនពេក ឬអត់ គឺអាស្រ័យលើខ្លួនយើងម្នាក់ៗ ទៅតាមតម្រូវការ ចំណង់ តួរនាទី និងរាងកាយរបស់យើងផ្ទាល់។ ដូចនេះ មានតែខ្លួនយើងទេ ដែលអាចដឹងថា រួមភេទប៉ុន្មានដងគិតថាច្រើនពេក ហើយគួរបន្ថយមកប៉ុន្មានដងក្នុងមួយថ្ងៃ ឬសប្ដាហ៍វិញនោះ។
[embed-health-tool-ovulation]
