សុខភាពផ្លូវភេទស្រីៗសំខាន់ៗ មានទំនាក់ទំនងផ្ទាល់ទៅលើការបង្កកំណើត ហើយនៅពេលប្រដាប់ភេទមានបញ្ហា អាចជះឥទ្ធិពលទាំងផ្លូវកាយ ផ្លូវចិត្តយើងបាន។ ហេតុនេះហើយ ទើបមានការណែនាំស្រីៗឲ្យឧស្សាហ៍ត្រួតពិនិត្យប្រដាប់ភេទខ្លួនឲ្យបានញឹកញាប់ ព្រោះបើមានបញ្ហា អាចដោះស្រាយបានទាន់ពេល។ អត្ថបទនេះ “Hello គ្រូពេទ្យ’ នឹងលើកឡើងពីបញ្ហាឧស្សាហ៍កើតមានលើប្រដាប់ភេទស្រីៗ ក៏ដូចជាវិធីដោះស្រាយឲ្យស្រីៗបានដឹង។
១- មានដុំពកប្លែកនៅតំបន់ទ្វារមាស
គ្នាយើងច្បាស់ជាភ្ញាក់ផ្អើលខ្លាំង បើរកឃើញមានដុំប្លែកណាមួយនៅត្រង់តំបន់ទ្វារមាស។ យោងតាមការលើកឡើងរបស់វេជ្ជបណ្ឌិត Alyssa Dweck, M.D ឯកទេសផ្នែករោគស្ត្រីនៅអាមេរិក ដុំមួយនេះ អាចបណ្ដាលមកមូលហេតុជាច្រើន ប៉ុន្តែប្រហែលមិនបង្កគ្រោះថ្នាក់ធ្ងន់ធ្ងរដល់សុខភាពយើងនោះដែរ។ វាអាចខុសគ្នាពីដុំពកដែលកើតមានដោយសាររោមដុះមិនផុត ឬដុំខ្លាញ់នៅក្រោមស្បែក។ បើប្រទះឃើញបញ្ហានេះ ការត្រាំទឹកក្ដៅឧណ្ហៗជាជម្រើសល្អសម្រាប់ដោះស្រាយបញ្ហាមួយនេះ។ តែក៏អាចទិញថ្នាំលាបប្រភេទ Hydrocortisone យកមកលាប បើដុំនោះមានសភាពដូចរលាក ហើយបើឈឺ ឬរកាំៗ ត្រូវប្រញ៉ាប់ទៅជួបជាមួយគ្រូពេទ្យឲ្យបានលឿន ដោយសារតែអាចជាសញ្ញាបញ្ជាក់ពីការឆ្លងរោគនៅទីនោះ។
២- មានធំក្លិនស្អុយ
បើប្រដាប់ភេទយើងមានធំក្លិនស្អុយចេញពីក្នុង អាចប្រហែលមានអ្វីកើតឡើងត្រង់តំបន់នោះហើយ។ ប៉ុន្តែក្លិនត្រង់កន្លែងនោះ អាចបណ្ដាលមកពីមូលហេតុច្រើន ត្រូវតែទៅពិភាក្សាជាមួយគ្រូពេទ្យអំពីបញ្ហាមួយនេះ។បើសិនទ្វារមាសយើង មានធ្លាក់សធំក្លិនអាក្រក់ខ្លាំង អាចបណ្ដាលមកពីការឆ្លងរោគ បង្កដោយពពួកបាក់តេរី ខណៈករណីមួយនេះ យើងប្រហែលជាត្រូវការប្រើថ្នាំផ្សះដើម្បីព្យាបាល។
មូលហេតុចម្បងមួយទៀត ធ្វើឲ្យទ្វារមាសមានធំក្លិន គឺដោយសារជាប់ស្រោមអនាម័យ ឬសំឡីអនាម័យក្នុងទ្វារមាស នេះបើយោងតាមការលើកឡើងរបស់វេជ្ជបណ្ឌិត Alyssa Dweck, M.D។ភាគច្រើនក្លិននៅតំបន់ទ្វារមាស អាចខុសៗគ្នា ធ្វើឲ្យច្រមុះយើងអាចហិតដឹងបាន។ យ៉ាងណា កុំបារម្ភបញ្ហាមួយនេះច្រើនពេកអី គ្រូពេទ្យមានវិធីដោះស្រាយយ៉ាងល្អសម្រាប់យើង។
៣- ហូរឈាមតាមទ្វារមាស មិនមែនជាឈាមរដូវទេ
បើសង្កេតឃើញមានឈាមតិចតួចនៅជាប់ខោក្នុង គឺអាចគ្រាន់តែបណ្ដាលមកពីអតុល្យភាពអ័រម៉ូន បណ្ដាលមកពីការប្រើប្រាស់ថ្នាំ ប៉ុន្តែបើឈាមនោះនៅតែបន្តធ្លាក់ គ្នាយើងគួរតែទៅជួបគ្រូពេទ្យ ដោយសារតែអាចជាសញ្ញាឆ្លងរោគណាមួយកើតឡើង ឬដោយសារមានផ្ទៃពោះ ឬមានសាច់ដុះនៅលើមាត់ស្បូនជាដើម។ បើឈាមធ្លាក់ក្រោយពីការរួមភេទ ឬធ្លាក់លាយគ្នាមកជាមួយតាមទ្វារមាស អាចជាសញ្ញាជំងឺកាមរោគ ដូចនេះ ត្រូវតែទៅជួបគ្រូពេទ្យ និងធ្វើតេស្តពិនិត្យរកមើលមេរោគប្រមេះទឹកបាយ (Gonorrhea) និងប្រមេះទឹកថ្លា (Chlamydia)។ បើគ្នាយើងធ្លាក់ឈាមតែម្ដងគត់ បន្ទាប់ពីរួមភេទប្រើកម្លាំងខ្លាំងពេក វាមិនមែនជារឿងត្រូវបារម្ភនោះដែរ។
៤- រមាស់ត្រង់ទ្វារមាស
មានអារម្មណ៍ដូចជាមានអ្វីមួយជាប់ក្នុងខោមែនអត់? បើទ្វារមាសយើងរមាស់មិនបាត់ ជាពិសេស បើមានធ្លាក់សមកជាមួយ អាចជាសញ្ញាឆ្លងរោគបង្កឡើងដោយពពួកផ្សិត ឬមានជំងឺឆ្លងបាក់តេរីក្នុងទ្វារមាស (Bacterial vaginosis)។ ប៉ុន្តែ បើយើងបានសាកល្បងគ្រប់វិធីរួចហើយ នៅតែមិនអាចបំបាត់បញ្ហារមាស់បាន អាចបណ្ដាលមកពីអាលែកហ្ស៊ីស្បែក ដោយសារសាប៊ូ ទឹកអនាម័យស្ត្រី ប្រតិកម្មជាមួយខោក្នុងក៏ថាបាន។
៥- ធ្លាក់សប្លែកខុសពីប្រក្រតី
គ្នាយើងប្រហែលជាធ្លាប់ដឹងហើយ អាការៈធ្លាក់សប្លែកខុសពីប្រក្រតី អាចបណ្ដាលមកពីមូលហេតុជាច្រើនរាប់មិនអស់។ ប៉ុន្តែ ក៏មិនត្រូវព្រួយបារម្ភនោះដែរ ព្រោះវាគ្រាន់តែជាបញ្ហាកើតឡើងធម្មតារៀងរាល់ខែ។ មានស្រីៗជាច្រើន មានការធ្លាក់សក្នុងកម្រិតធម្មតា ត្រូវតែកើតឡើងជារៀងរាល់ខែ។ ប៉ុន្តែបើមានប្រែពណ៌ខាប់ជាងមុន ឬមានធំក្លិនអាក្រក់ ត្រូវប្រញាប់ទៅពិគ្រោះជាមួយគ្រូពេទ្យឲ្យបានលឿន។
៦- ឈឺចាប់ពេលនោម ឬពេលរួមភេទ
អាការៈឈឺចាប់ក្នុងទ្វារមាស ឬឈឺតាមមាត់ទ្វារមាស អាចជាសញ្ញាមួយរបស់ជំងឺកាមរោគ ដូចនេះត្រូវពិគ្រោះជាមួយគ្រូពេទ្យ បើបញ្ហាមួយនេះមិនបាត់ទៅវិញក្នុងរយៈពេលលើសពី ២ ថ្ងៃឡើងទៅ។ បើវាកើតឡើងតែម្ដង ឬ ២ដង ក្រោយពេលរួមភេទរួច អាចកើតឡើងដោយសារតែទ្វារមាសយើងស្ងួតពេក ដូចនេះអាចសាកល្បងប្រើទឹករម្អិលជំនួយបន្ថែមពេលរួមភេទនៅពេលក្រោយ ហើយចាំសង្កេតមើលភាពខុសប្លែកគ្នា ឬអត់។
អត្ថបទពាក់ព័ន្ធ៖
- របស់ទាំងអស់នេះ អាចប្រើនៅបរិវេណខាងក្រៅបាន តែហាមដាក់ចូលទ្វារមាស
- តិចនិកធម្មជាតិ មានប្រសិទ្ធភាព ដោះស្រាយបញ្ហាស្ងួតទ្វារមាស
៧- មានអារម្មណ៍ស្ពឹកៗត្រង់តំបន់ប្រដាប់ភេទ
ជាធម្មតា ស្រីៗមិនត្រូវមានបញ្ហាមួយនេះកើតឡើងជាប្រចាំទេ ប៉ុន្តែវាអាចកើតឡើងច្រើនសម្រាប់គ្នាយើងចូលចិត្ដជិះកង់ច្រើន ឬចូលចិត្ដធាក់កង់ហាត់ប្រាណ។ បើគ្នាយើងចូលចិត្ដជិះកង់ច្រើនត្រូវតែទិញកង់ល្អ មានកែបស្រួលជិះ និងអានការណែនាំ ដើម្បីជៀសវាងពីបញ្ហាឈឺត្រង់តំបន់សម្ងាត់ដោយសារតែការធាក់កង់។
៨- ទ្វារមាសស្ងួតពេក
បញ្ហាស្ងួតទ្វារមាស ភាគច្រើនកើតតែលើស្រីៗមានអាយុច្រើនប៉ុណ្ណោះ ប៉ុន្តែក៏មិនមែនជាបញ្ហាធ្ងន់ធ្ងរដូចយើងគិតទេ។ ការពិតទៅ បញ្ហាស្ងួតទ្វារមាស ក៏អាចកើតឡើងក្រោយពេលពពោះ ឬប្រើប្រាស់ថ្នាំមួយចំនួន ដូចជាថ្នាំអាលែកហ្ស៊ី ឬថ្នាំព្យាបាលជំងឺបាក់ទឹកចិត្ដជាដើម។ បើយើងមានអារម្មណ៍ថា ទ្វារមាសស្ងួតខ្លាំងទៀតនោះ គួរសាកល្បងទិញពពួកទឹករម្អិលមកប្រើ ឬទៅពិគ្រោះជាមួយគ្រូពេទ្យ ដើម្បីរកដំណោះស្រាយបន្ថែម។
៩- ឈឺចុកអួលនៅខាងក្នុង
អាការៈឈឺចាប់នៅផ្នែកខាងក្នុងរបស់ទ្វារមាស ពិសេសឈឺអំឡុងពេលកំពុងរួមភេទ អាចជាបញ្ហាជំងឺជាលិកាស្បូនដុះខុសកន្លែង (Endometriosis) ឬមានដុំគីសក្នុងដៃស្បូន។ គ្រូពេទ្យ នឹងធ្វើការពិនិត្យក្នុងអាងត្រគាក ឬឆ្លុះអេកូ ដើម្បីរកមើលមូលហេតុ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបលផ្ទាល់ជាមួយគ្រូពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-ovulation]
