គ្នាយើងខ្លះ ប្រហែលជាចូលចិត្តទំពារស្ករកៅស៊ូ ដោយសារវាអាចជួយឲ្យអារម្មណ៍ស្រស់ស្រាយ។ ស្ករកៅស៊ូ មានរាប់ពាន់ឆ្នាំមកហើយ ដោយវាជាសារធាតុទន់ និងយឺត ដែលផលិតឡើងសម្រាប់ទំពារ តែមិនអាចលេបចូលក្នុងពោះបានទេ។
១. អត្ថប្រយោជន៍ នៃស្ករកៅស៊ូ
- ស្ករកៅស៊ូ អាចជួយបំបាត់ស្ត្រេស និងបង្កើនការចងចាំ
ការសិក្សាជាច្រើន បង្ហាញថា ស្ករកៅស៊ូអាចជួយដល់មុខងារខួរក្បាល ដូចជា ការរំញោច ចងចាំ ស្វែងយល់ និងការសម្រេចចិត្ត។ ក្រៅពីនេះ វាជួយកាត់បន្ថយអារម្មណ៍ស្មុគស្មាញ និងធ្វើឲ្យយើងស្វាហាប់ ពេញមួយថ្ងៃ។
- ស្ករកៅស៊ូ អាចជួយសម្រកទម្ងន់
ស្ករកៅស៊ូ អាចជាឧបករណ៍មួយ សម្រាប់គ្នាយើងដែលព្យាយាមសម្រកទម្ងន់ ដោយសារវាមានជាតិផ្អែម តែមានកាឡូរីតិច ដែលធ្វើឲ្យយើងមិនញ៉ាំអាហារច្រើន។ វាក៏ជួយកាត់បន្ថយចំណង់អាហាររបស់យើងផងដែរ។
- ស្ករកៅស៊ូ ជួយការពារធ្មេញ និងកាត់បន្ថយដង្ហើមមិនល្អ
ស្ករកៅស៊ូគ្មានជាតិស្ករ អាចជួយការពារធ្មេញ មិនឲ្យពុក ហើយនេះដោយសារវាគ្មានជាតិស្ករ ចិញ្ចឹមពពួកបាក់តេរីមិនល្អក្នុងមាត់ ដែលធ្វើឲ្យខូចធ្មេញ។ ជាមួយគ្នានេះ ស្ករកៅស៊ូ ដែលមានសារធាតុអាល់កុលស្ករ Xylitol ជួយការពារការលូតលាស់របស់បាក់តេរី ដែលបណ្ដាលឲ្យពុកធ្មេញ និងដង្ហើមមិនល្អ។
អត្ថបទពាក់ព័ន្ធ៖
- ទម្លាប់អាក្រក់ ១៥នេះ បំផ្លាញធ្មេញមិនដឹងខ្លួន
- ចាប់ផ្ដើមថែធ្មេញ កុំចាំទាល់ឈឺ ដកចោល ដាក់ថ្មីទើបស្ដាយក្រោយ
២. ផលប៉ះពាល់ នៃស្ករកៅស៊ូ
- ស្ករកៅស៊ូ អាចបង្កជាបញ្ហារំលាយអាហារ និងរាក
អាល់កុលស្ករ Laxatives និង FODMAPs ដែលប្រើក្នុងស្ករកៅស៊ូគ្មានជាតិស្ករ អាចបណ្ដាលជាបញ្ហារំលាយអាហារ រាក និងរោគសញ្ញារលាកពោះវៀន។
- ស្ករកៅស៊ូ អាចបណ្ដាលឲ្យមានបញ្ហាថ្គាម
ការទំពារស្ករកៅស៊ូ អាចបណ្ដាលឲ្យមានបញ្ហាថ្គាម ហៅថា Temporomandibular Disorder (TMD) ដែលបណ្ដាលឲ្យឈឺ នៅពេលទំពារ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmi]
