កត្តាជាច្រើនធ្វើឲ្យស្រីៗយើងមានអាការៈរមាស់ចុងសុដន់ជាញឹកញាប់។ ពិតណាស់ ចុងសុដន់គឺជាផ្នែកមួយនៃរាងកាយដែលងាយរងគ្រោះ រលាកដោយការកកិត កើតត្រអក ដោយការបំបៅដោះ ឬការមានផ្ទៃពោះជាដើម។ ប៉ុន្តែ នៅក្នុងករណីកម្រខ្លះ ការរមាស់ចុងសុដន់ក៏អាចជាសញ្ញានៃបញ្ហាសុខភាពធ្ងន់ធ្ងរផងដែរ។ យ៉ាងណាមិញ ប្រសិនបើយើងប្រើប្រាស់ថ្នាំបំបាត់អាការៈរមាស់ប៉ុន្មានសប្ដាហ៍ហើយ នៅតែមិនបាត់ទៀតនោះ យើងគួរតែទៅពិគ្រោះយោបល់ជាមួយនឹងគ្រូពេទ្យជំនាញ ទើបជាការប្រសើរ។ កត្តាខាងក្រោមនេះ អាចជាមូលហេតុដែលធ្វើឲ្យយើងកើតមានអាការៈរមាស់នៅចុងសុដន់។
ចេះតែរមាស់ចុងសុដន់ មកពីមូលហេតុអ្វី? គួរធ្វើម៉េចល្អ?
ត្រួតពិនិត្យដោយ វេជ្ជ. ចាន់ ស៊ីណេត · មន្ទីរពេទ្យបង្អែកមិត្តភាពកម្ពុជា-ចិន សែនសុខ
១. អាកាសធាតុ
អាកាសធាតុត្រជាក់ ឬក្ដៅ អាចធ្វើឲ្យរាងកាយរបស់យើងទាំងមូលមានការរមាស់ រួមទាំងសុដន់ និងចុងសុដន់ផងដែរ។ ដូច្នេះហើយ ចូរងូតទឹកក្ដៅឧណ្ហៗមិនឲ្យលើសពី១០នាទី និងជៀសវាងងូតទឹកក្ដៅខ្លាំង ដែលអាចធ្វើឲ្យប្រេងធម្មជាតិនៃស្បែកបាត់បង់។ ជាមួយគ្នានេះដែរ យើងគួរជូតសម្អាតបរិវេណសុដន់ឲ្យនៅមានសល់សំណើមតិចៗ ព្រមទាំងលាបក្រែមសម្រាប់លាបចុងសុដន់ឲ្យរាងក្រាស់បន្តិច ដើម្បីកម្ចាត់បញ្ហារមាស់នេះ។
២. សាប៊ូ
សាប៊ូ ឡេលាបស្បែក ឬទឹកក្រអូបសម្រាប់បោកខោអាវ អាចជាមូលហេតុដែលបណ្ដាលឲ្យចុងសុដន់របស់យើងរមាស់បាន។ ជាទូទៅ សារធាតុគីមីនៅក្នុងផលិតផលលាងសម្អាតជាច្រើន អាចបណ្ដាលឲ្យស្បែករបស់យើងកើតកន្ទួលរមាស់។ ដើម្បីបំបាត់បញ្ហានេះ គ្នាយើងអាចផ្លាស់ប្ដូរប្រើប្រាស់ផលិតផលដែលមិនបង្កជាអាលែកហ្ស៊ី និងមិនមានក្លិនក្រអូបជំនួសវិញ។
៣. អាវទ្រនាប់
ការរលាកស្បែក អាចបណ្ដាលឲ្យមានស្នាមក្រហម និងរមាស់នៅបរិវេណនៃស្បែកសុដន់ និងចុងសុដន់ដែលប៉ះពាល់ផ្ទាល់ទៅនឹងសាច់ក្រណាត់។ ប្រសិនបើស្រីៗយើងមានអារម្មណ៍រមាស់ នៅពេលដែលចាប់ផ្ដើមពាក់អាវទ្រនាប់ថ្មីៗ ចូរសាកល្បងផ្លាស់ប្ដូរទៅប្រើអាវទ្រនាប់ចាស់ៗមួយរយៈសិន និងសង្កេតមើលថាតើការរមាស់នៅចុងសុដន់នោះ នឹងបាត់ទៅវិញដោយខ្លួនឯងឬយ៉ាងណា?
៤. ការកកិត
ចុងសុដន់របស់យើងអាចសង្កៀរ នៅពេលដែលយើងកកិតទៅនឹងសំលៀកបំពាក់ ខណៈពេលដែលយើងធ្វើលំហាត់ប្រាណ ឬក៏ពាក់អាវទ្រនាប់តឹងពេក។ ជាទូទៅ វាមានអាការៈឈឺចាប់ជាងរមាស់ទៅទៀត។ ប្រសិនបើស្រីៗយើងជួបប្រទះបញ្ហានេះ ចូរលាបប្រេងចាហួយទៅបរិវេណនោះ មុនពេលធ្វើលំហាត់ប្រាណ ដើម្បីការពារពីការរលាក ក៏ដូចជាពាក់អាវទ្រនាប់ឲ្យបានត្រឹមត្រូវ ដោយមិនតឺង ឬធូរពេកឡើយ។
៥. ការមានផ្ទៃពោះ
ការឡើងទម្ងន់ ចាញ់កូន ប្រែប្រួលអ័រម៉ូន និងរមាស់ចុងសុដន់ គឺសុទ្ធតែជាអាការៈរបស់អ្នកមានផ្ទៃពោះ។ កត្តាផ្លាស់ប្ដូរអ័រម៉ូន និងភាពយឺតនៃស្បែកនឹងកើតឡើង ដោយសារតែសុដន់ និងចុងសុដន់របស់យើងរីកធំ ដើម្បីត្រៀមបំបៅដោះកូន។ ដូច្នេះហើយ ការលាបប្រេងដូង ឬប្រភេទថ្នាំLanolin Ointment នៅពេលចុងសុដន់ អាចកាត់បន្ថយបញ្ហារមាស់នេះបានប្រកបដោយប្រសិទ្ធភាព។
៦. ការបំបៅដោះកូន
កាកសំណល់ទឹកដោះ ការស្ទះថង់ទឹកដោះ និងបញ្ហាផ្សេងទៀតដែលពាក់ព័ន្ធទៅនឹងការបំបៅដោះកូន គឺសុទ្ធតែអាចធ្វើឲ្យចុងសុដន់មានអាការៈរមាស់ និងឈឺចាប់។ ហេតុនេះហើយ ស្រីៗយើងគួរថែទាំបរិវេណសុដន់ឲ្យបានស្អាត និងស្ងួតល្អ ក៏ដូចជាបន្តបំបៅដោះកូនតទៅទៀត។ ជាមួយគ្នានេះដែរ ម៉ាក់ៗក៏អាចប្រើប្រាស់ប្រភេទបន្ទះជែលស៊ីលីកូន (Silicone Gel Pad) ត្រជាក់ ដែលរក្សាទុកនៅក្នុងទូរទឹកកក ដើម្បីកាត់បន្ថយការរមាស់នេះបានផងដែរ។
បដិសេធ
Hello Health Group និង “Hello គ្រូពេទ្យ” មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
ផ្សព្វផ្សាយពាណិជ្ជកម្មតើអត្ថបទនេះមានប្រយោជន៍ដែរទេ?
ផ្សព្វផ្សាយពាណិជ្ជកម្មផ្សព្វផ្សាយពាណិជ្ជកម្ម