គ្នាយើងច្បាស់ជាធ្លាប់ឮពេទ្យប្រាប់ អ័រម៉ូន ជាកត្តាចម្បងមួយនាំឲ្យឡើងមុន គ្រាន់តែគ្នាយើងភាគច្រើន បានឮ តែមិនដឹងច្បាស់ ហេតុអីបានអ័រម៉ូនក្នុងខ្លួនធ្វើឲ្យមុនទប់មិនឈ្នះបែបនេះ? សម្រាប់ចម្លើយ “Hello គ្រូពេទ្យ’ នឹងលម្អិតឲ្យគ្នាយើងបានដឹងក្នុងអត្ថបទនេះតែម្តង។

១- បម្រែបម្រួលអ័រម៉ូនក្នុងពេលមករដូវ

ជាការពិតណាស់ មុនមានច្រើនប្រភេទ មុនដែលទាក់ទងនឹងអ័រម៉ូន ជាមុនមួយប្រភេទសម្បូរកើតមានជាងគេ។ បម្រែបម្រួលអ័រម៉ូន ច្រើនកើតនៅពេលយើងទើបពេញវ័យ មានផ្ទៃពោះ និងបណ្តាលមកពីការប្រើប្រាស់ថ្នាំ ឬជំងឺផ្សេងៗ។

មូលហេតុចម្បងធ្វើឲ្យឡើងមុនអ័រម៉ូន គឺដោយសារការឡើងនូវអ័រម៉ូន អង់ដ្រូហ្សែន (អ័រម៉ូនផ្លូវភេទរបស់ប្រុសៗ) នៅក្នុងឈាម ប៉ុន្តែអ័រម៉ូនប្រភេទនេះ គេក៏ឃើញមានក្នុងខ្លួនស្រីៗដូចគ្នា គ្រាន់តែក្នុងខ្លួនប្រុសៗមានច្រើនជាងប៉ុណ្ណោះ។ អ័រម៉ូននេះ កើនឡើងនៅពេលយើងពេញវ័យ ឬពេលមានផ្ទៃពោះ ធ្វើឲ្យក្រពេញខ្លាញ់បញ្ចេញខ្លាញ់មកក្រៅកាន់តែច្រើន ដែលខ្លាញ់ទាំងនេះ នឹងជួយការពារស្បែក ធ្វើឲ្យស្បែកទន់ មានសំណើម ប៉ុន្តែបើមានជាតិខ្លាញ់ច្រើនពេក នឹងអាចស្អិតជាមួយកោសិកាស្បែកដែលងាប់ បង្កឲ្យស្ទះរន្ធរោម ជាហេតុនាំឲ្យមុននឹងកើតឡើងតែម្តង។ លើសពីនេះ ខ្លាញ់ទាំងនោះ ក៏ជាប្រភពសារធាតុចិញ្ចឹមសម្រាប់ពួកបាក់តេរី P.Acnes ជាពពួកបាក់តេរីបង្កមុន។

អត្ថបទពាក់ព័ន្ធ៖

ថែស្បែកមុខយ៉ាងម៉េច កុំឲ្យឡើងមុន?
ន៎ុះ! មុនមិនមែនចេះតែកើតទេ តែបើកើតអាចមានបញ្ហាទាំងនេះ

២- វិធីព្យាបាលមុនអ័រម៉ូន

ពេលខ្លះ អ្នកឯកទេសស្បែក នឹងប្រាប់ឲ្យយើងប្រើប្រាស់ការព្យាបាលដោយអ័រម៉ូន សម្រាប់បញ្ហាមុន ក្នុងនោះថ្នាំគ្រាប់ពន្យារកំណើត អាចបន្ថយការកើនឡើងអ័រម៉ូនអង់ដ្រូហ្សែនក្នុងឈាម មានន័យថា រាងកាយមានកម្រិតអ័រម៉ូនបង្កឲ្យឡើងមុនតិចតួចប៉ុណ្ណោះ។ គ្នាយើង ក៏អាចប្រើថ្នាំគ្រាប់ពន្យារកំណើតតែឯង ឬប្រើជាមួយថ្នាំបញ្ចុះទឹកនោមឈ្មោះ Spironolactone ប៉ុន្តែទោះបីប្រើថ្នាំនេះមានសុវត្ថិភាពចំពោះមនុស្សទូទៅ យើងក៏ត្រូវមានការប្រុងប្រយ័ត្នឲ្យបានខ្ពស់ ប្រសិនជាមានបញ្ហាសុខភាពមួយចំនួនដូចជា៖

– មានបញ្ហាបេះដូង ដូចជា ជំងឺគាំងបេះដូង ឬជំងឺដាច់សសៃឈាមខួរក្បាល

– ធ្លាប់មានប្រវិត្តកើតជំងឺមហារីកដោះ

– ធ្លាប់មានបទពិសោធលើសឈាម ធ្ងន់ធ្ងរមិនអាចគ្រប់គ្រងបាន

– មានរដូវមិនប្រក្រតី។

គួរតែពិគ្រោះជាមួយអ្នកឯកទេសស្បែកពីបញ្ហាមុន ក៏ដូចជាស្ថានភាពជំងឺ មុនពេលប្រើប្រាស់ការព្យាបាលដោយអ័រម៉ូននេះ។

ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នក ជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕

អ័រម៉ូន​ធ្វើឲ្យឡើង​មុនច្រើន ពិតអត់?

អ័រម៉ូនធ្វើឲ្យឡើងមុនច្រើន ពិតអត់?