ស្វែងយល់ពីការប្រើប្រាស់
១- ថ្នាំ Terpin Hydrate/codeine ព្យាបាលជំងឺអីខ្លះ?
Terpin Hydrate/codeine គឺប្រើព្យាបាល អាការៈក្អក ដូចជា ក្អកស្ងួត ក្អកខ្លាំងៗ គ្រុនផ្ដាសាយ និងក្អកបង្កដោយមេរោគ។ បញ្ហាទាំងនេះ បណ្ដាលមកពីការបង្ករោគនៅលើប្រព័ន្ធដង្ហើម ដូចជា រលាកទងសួត រលាកសួតរ៉ាំរ៉ៃ រលាកសួតស្រួចស្រាវ ស្អក អ្នកជំងឺមានអាការក្អកមធ្យមទៅខ្លាំង។
២- គេប្រើថ្នាំនេះយ៉ាងម៉េច?
ជាប្រភេទថ្នាំគ្រាប់សម្រាប់លេប ប្រើប្រាស់កម្រិតថ្នាំ និងពេលវេលាឲ្យបានត្រឹមត្រូវ ដោយមានការអនុញ្ញាតពីគ្រូពេទ្យ។ ត្រូវអានការណែនាំ មុននឹងប្រើប្រាស់ អាចពិភាក្សាជាមួយគ្រូពេទ្យបើមិនយល់ពីការណែនាំរបស់ថ្នាំ។ ត្រូវចាំថា! ថ្នាំនេះអាចធ្វើឲ្យងងុយគេងបន្ទាប់ពីប្រើប្រាស់។
៣- រក្សាទុកដោយវិធីណា?
ថ្នាំ Terpin Hydrate/codeine អាចរក្សាទុកបានល្អក្នុងបន្ទប់សីតុណ្ហភាពល្មម ចៀសឆ្ងាយពីពន្លឺថ្ងៃ និងសំណើម។ រក្សាថ្នាំកុំឲ្យខូច មិនត្រូវទុកនៅក្នុងបន្ទប់ទឹក ឬទូទឹកកកទេ។ លើទីផ្សារប្រហែលជាមានថ្នាំម៉ាក Terpin Hydrate/codeine ផ្សេងគ្នា ហើយការរក្សាទុកក៏ខុសគ្នា។ ហេតុនេះសំខាន់ណាស់ ត្រូវពិនិត្យមើលក្រដាសណែនាំផលិតផលពីការរក្សាទុក ឬសួរឱសថការី។ ដើម្បីសុវត្ថិភាពគួរថែរក្សាទុកថ្នាំគ្រប់ប្រភេទឲ្យឆ្ងាយពីដៃក្មេង និងសត្វចិញ្ចឹម។
ពុំគួរចោលថ្នាំតាមបង្គន់ ឬតាមលូបង្ហូរទឹកទេ លើកលែងតែមានការណែនាំពីគ្រូពេទ្យ។ សំខាន់ណាស់ត្រូវកម្ទេចថ្នាំប្រភេទនេះឲ្យបានត្រឹមត្រូវ ពេលហួសកាលកំណត់ ឬលែងប្រើ។ ពិភាក្សាជាមួយឱសថការី សម្រាប់ព័ត៌មានលម្អិតពីរបៀបកម្ទេចថ្នាំ។
កត្តាគួរប្រុងប្រយ័ត្ន
៤- ត្រូវដឹងអ្វីខ្លះមុនប្រើ?
មុនពេលប្រើ Terpin Hydrate/codeine ត្រូវដឹង និងត្រូវប្រាប់គ្រូពេទ្យប្រសិនបើបញ្ហាប្រតិកម្មជាមួយថ្នាំដូចជា៖
– មានប្រតិកម្មជាមួយថ្នាំប្រភេទនេះ
– ប្រតិកម្មជាមួយប្រភេទថ្នាំផ្សេងៗទៀត ក៏ដូចជាអាហារ ឬសត្វជាដើម
– ប្រសិទ្ធភាព និងសុវត្ថិភាពថ្នាំ ចំពោះក្មេងៗ
– ប្រសិទ្ធភាព និងសុវត្ថិភាពថ្នាំ ចំពោះមនុស្សចាស់
– ប្រើប្រាស់ថ្នាំផ្សេងទៀត អាចមានអន្តរអំពើជាមួយថ្នាំ Terpin Hydrate/codeine។
៥- មានសុវត្ថិភាពចំពោះស្រ្តីមានផ្ទៃពោះ និងបំបៅដោះកូនទេ?
មិនមានព័ត៌មានពីសុវត្ថិភាពការប្រើថ្នាំនេះ ទាំងអំឡុងពេលមានផ្ទៃពោះ និងបំបៅដោះបេប៊ីនៅឡើយទេ។ ហេតុនេះពិភាក្សាជាមួយវេជ្ជបណ្ឌិត ពីគុណប្រយោជន៍ និងហានិភ័យមុនពេលប្រើ គឺជារឿងចាំបាច់។ យោងតាមរដ្ឋបាលចំណីអាហារ និងឱសថ នៅអាមេរិក (FDA) ថ្នាំនេះត្រូវបានចាត់ថ្នាក់ក្នុងបញ្ជីថ្នាំគ្រោះថ្នាក់កម្រិត D សម្រាប់ស្ត្រីមានផ្ទៃពោះ។
ចំណាត់ថ្នាក់កម្រិតគ្រោះថ្នាក់នៃថ្នាំទៅលើស្ត្រីមានផ្ទៃពោះរបស់ FDA មានដូចខាងក្រោម៖
– A = គ្មានគ្រោះថ្នាក់
– B = គ្មានគ្រោះថ្នាក់ ក្នុងការសិក្សាមួយចំនួន
– C = អាចមានគ្រោះថ្នាក់ខ្លះៗ
– D = មានភស្តុតាងជាវិជ្ជមានថាមានគ្រោះថ្នាក់
– X = ហាមប្រើ
– N = មិនមានព័ត៌មាន។
ស្វែងយល់ពីផលរំខាន
៦- ផលរំខានមានអ្វីខ្លះ?
ដូចថ្នាំដទៃទៀតដែរ Terbpin Hydrate/codeine អាចបង្កឲ្យមានផលរំខានខ្លះ ប៉ុន្តែផលរំខានទាំងនេះកម្រមានណាស់ ក៏មិនតម្រូវព្យាបាលបន្ថែមអ្វីដែរ។ ទោះយ៉ាងណា សំខាន់បំផុត ត្រូវពិភាក្សាជាមួយគ្រូពេទ្យប្រសិនបើមានបញ្ហាអ្វីមួយបន្ទាប់ពីប្រើថ្នាំ។
ផលរំខានខ្លះៗមាន៖ ឈឺក្បាល វិលមុខ ស្រេកទឹកខ្លាំង និងមានអារម្មណ៍ចម្លែក ចង្អោរ ក្អួត ទល់លាមក ចាល់ទឹកនោម នោមតិច បេះដូងលោតញាប់ បេះដូងលោតយឺត ញ័រចុងដៃ ចុងជើង ខ្សោយកម្លាំង ចុះសម្ពាធឈាម។ ប្រើថ្នាំ Codein ក្នុងកម្រិត ២៤០-៥៤០ មិល្លីក្រាម/ថ្ងៃ រយៈពេលយូរ អាចបណ្ដាលឲ្យញៀនថ្នាំ។
មនុស្សគ្រប់គ្នា មិនប្រាកដថាមានរោគសញ្ញាដូចគ្នាទាំងអស់ទេ នៅអាចមានរោគសញ្ញាផ្សេងទៀត ហេតុនេះបើមានចម្ងល់ អាចពិភាក្សាជាមួយគ្រូពេទ្យ ឬឱសថការីបន្ថែម។
ស្វែងយល់ពីអន្តរកម្មថ្នាំ
៧- អន្តរកម្មថ្នាំ
ថ្នាំ Terbpin Hydrate/codeine អាចមានប្រតិកម្មជាមួយថ្នាំផ្សេងទៀត យើងកំពុងប្រើប្រាស់ ជាហេតុនាំឲ្យផ្លាស់ប្ដូរអំពើរបស់ថ្នាំ បង្កើនគ្រោះថ្នាក់ ផលរំខានដល់យើង។ ដើម្បីចៀសវាងអន្តរកម្មពីថ្នាំនេះ គួររក្សាទុកបញ្ជីឈ្មោះថ្នាំទាំងអស់យើងកំពុងប្រើ ទាំងមាន ឬគ្មានវេជ្ជបញ្ជា និងផលិតផលពីរុក្ខជាតិ យកបញ្ជីនោះទៅឲ្យវេជ្ជបណ្ឌិត ឬឱសថការីពិនិត្យមើល។ ដើម្បីសុវត្ថិភាព កុំចាប់ផ្ដើមប្រើ ឬឈប់ប្រើ ផ្លាស់ប្ដូរកម្រិតថ្នាំដោយគ្មានការណែនាំ និងយល់ព្រមពីវេជ្ជបណ្ឌិតឲ្យសោះ។
ថ្នាំអាចមានអន្តរកម្មជាមួយ Terbpin Hydrate/codeine ដូចជា ថ្នាំប្រឆាំងប្រព័ន្ធសរសៃប្រសាទកណ្តាល ថ្នាំសំយោគពីថ្នាំ Morphine (Derevative morphine) ថ្នាំប្រឆាំងជំងឺបាក់ទឹកចិត្ត (Antidepressant drug) ថ្នាំសណ្តំ (Sedative Tranquilizers) ថ្នាំងងុយគេង និងថ្នាំ Cimetidine។
៨- អន្តរកម្មជាមួយអាហារ ឬគ្រឿងស្រវឹង
អាហារ និងគ្រឿងស្រវឹងអាចធ្វើឲ្យដំណើរការរបស់ថ្នាំ មានការប្រែប្រួល អាចធ្វើឲ្យមានគ្រោះថ្នាក់ ឬផលប៉ះពាល់កាន់តែធ្ងន់ធ្ងរ។ ត្រូវពិភាក្សាជាមួយគ្រូពេទ្យ ឬឱសថការីដើម្បីដឹងអំពីប្រភេទអាហារ និងគ្រឿងស្រវឹងទាំងនោះ មុនពេលចាប់ផ្តើមប្រើប្រាស់ថ្នាំ។
៩- អន្តរកម្មជាមួយសុខភាព
ថ្នាំ Terbpin Hydrate/codeine អាចមានអន្តរកម្មជាមួយសុខភាពយើង នាំឲ្យស្ថានភាពសុខភាពកាន់តែដុនដាប ឬអាចផ្លាស់ប្ដូរអំពើថ្នាំទៀតផង។ សំខាន់បំផុត ត្រូវប្រាប់វេជ្ជបណ្ឌិត និងឱសថការីបានដឹងពីស្ថានភាពសុខភាពយើងបច្ចុប្បន្ន ពិសេសបើយើងមានបញ្ហាសុខភាពដូចជា៖
– ក្អកបង្កដោយជំងឺហឺត
– មានបញ្ហាសួតខ្សោយ
– ក្មេងអាយុក្រោម ៣០ខែ
– ខូចតម្រងនោម ឬថ្លើម
– ជំងឺប្រព័ន្ធដង្ហើមដូចជា ជំងឺហឺត ជំងឺ Emphysema (ក្អកបណ្តាលមកពីខូចជញ្ជាំងថង់ទងសួត)។
ស្វែងយល់ពីកម្រិតថ្នាំ
ព័ត៌មានទាំងនេះ មិនបានរាប់ជាការណែនាំរបស់គ្រូពេទ្យនោះទេ។ ត្រូវតែពិភាក្សាជាមួយគ្រូពេទ្យ ឬឱសថការី មុនពេលចាប់ផ្តើមប្រើប្រាស់ថ្នាំប្រភេទនេះ។
១០- មនុស្សពេញវ័យត្រូវប្រើកម្រិតណា?
ត្រូវពិភាក្សាជាមួយគ្រូពេទ្យបន្ថែម ដើម្បីដឹងពីកម្រិតប្រើថ្នាំ Terpin hydrate/codeine ។ ជាធម្មតា កម្រិតថ្នាំណែនាំឲ្យប្រើ ១គ្រាប់ លេប ២-៣ ដង/ថ្ងៃ។
១១- កូនក្មេងត្រូវប្រើកម្រិតណា?
ត្រូវពិភាក្សាជាមួយគ្រូពេទ្យបន្ថែម ដើម្បីដឹងពីកម្រិតថ្នាំ Terpin hydrate/ codeine ត្រូវប្រើ។
ជាទូទៅ
– អាយុលើស ៣០ខែ ត្រូវមានវេជ្ជបញ្ជាពីគ្រូពេទ្យ
– អាយុក្រោម ៣០ខែ មិនត្រូវបានណែនាំឲ្យប្រើនោះទេ។
១២- ថ្នាំនេះមានទម្រង់បែបណាខ្លះ?
Terpin hydrate/codeine មានទម្រង់ជាថ្នាំគ្រាប់ មានកម្រិត Cdeine Phosphate ១០ មិល្លីក្រាម។
១៣- ករណីបន្ទាន់ ឬប្រើថ្នាំលើសកម្រិត
សូមទូរសព្ទទៅផ្នែកសង្គ្រោះបន្ទាន់ ១១៩ ឬប្រញាប់ទៅមន្ទីរពេទ្យនៅជិតបំផុត។
១៤- ករណីភ្លេចលេបថ្នាំ
បើភ្លេចលេបថ្នាំ សូមលេបភ្លាម ប៉ុន្តែបើកៀកពេលត្រូវលេបថ្នាំបន្ទាប់ ត្រូវរំលងថ្នាំភ្លេចនោះ លេបថ្នាំតាមពេលត្រូវលេបបន្តបានហើយ កុំលេបថ្នាំពីរកម្រិតក្នុងពេលតែមួយ។
ក្នុងករណីមានសំណួរ ឬមន្ទិលសង្ស័យជុំវិញសុខភាពអ្នកជម្រើសល្អបំផុត សូមពិគ្រោះ និងប្រឹក្សាយោបល់ផ្ទាល់ជាមួយពេទ្យជំនាញ។ Hello Health Group មិនចេញវេជ្ជបញ្ជា មិនធ្វើរោគវិនិច្ឆ័យ ឬព្យាបាលជូនទេ៕
[embed-health-tool-bmi]
