ទារកឆ្លងមេរោគចូលក្នុងខ្លួនចេញសញ្ញាបែបនេះ ម៉ាក់ប៉ាមិនត្រូវព្រងើយកន្តើយ

នៅពេលមានដំបៅ ឬការឆ្លងរោគលើទារកទើបកើត វាពិតជាគ្រោះថ្នាក់បំផុត ទាមទារឲ្យយើងជាអាណាព្យាបាលស្វែងរកការព្យាបាលជាមួយគ្រូពេទ្យជំនាញត្រឹមត្រូវឲ្យលឿនបំផុត។ លោកវេជ្ជបណ្ឌិត ហ៊ាង រតនា ឯកទេសជំងឺទូទៅបានឲ្យដឹងថា ការដែលទារកមានឆ្លងមេរោគចូលខ្លួនពិតជាគ្រោះថ្នាក់ខ្លាំងណាស់ ហើយបើសង្កេតឃើញកូនមានសញ្ញាទាំងនេះ ត្រូវប្រញាប់នាំទៅមន្ទីរពេទ្យភ្លាមៗកុំបង្អង់យូរ។

– ក្ដៅខ្លួនលើសពី ៣៨ អង្សារសេ

– ពេលគេងដកដង្ហើមញាប់ ឬច្រើនជាង ៦០ ដង/នាទី

– ដង្ហក់ស្ទះផ្លូវដង្ហើម ទ្រូងផឺតផត ច្រមុះរួមរីកនៅពេលប្រឹងដកដង្ហើមពេលគេង

– មិនព្រមបៅ

– ប្រកាច់កន្ត្រាក់ដៃជើង

– ដេកសន្លឹមមិនដឹងខ្លួន

– ស្បែករមាស់កន្ទួល ក្រហម

លោកវេជ្ជបណ្ឌិតបន្តថា បើកូនមានសញ្ញាទាំងនេះលើសពីមួយចំណុច ទារកអាចធ្លាក់ថិតក្នុងសភាពគ្រោះថ្នាក់ និងត្រូវការការព្យាបាលជាបន្ទាន់ ហើយកូនក្ដៅខ្លួនខ្លាំង ត្រូវជូតខ្លួនកូនដោយកន្សែងសើម ដើម្បីការពារកុំឲ្យប្រកាច់។

វេជ្ជបណ្ឌិតរូបនោះបន្តទៀតថា ម៉ាក់ប៉ាត្រូវចេះសង្កេត និងតាមដានពីស្ថានភាពទារក ព្រោះជំងឺតិចព្យាបាលឆាប់ជា ហើយមិនគ្រោះថ្នាក់ដល់ជីវិត។ មួយវិញទៀតត្រូវស្វែងយល់ពីរបៀបថែទាំកូនផ្សេងៗ ដើម្បីកុំឲ្យកូនតូចជួបបញ្ហាច្រើន ព្រោះពេលនេះប្រព័ន្ធការពាររាងកាយគេមិនទាន់រឹងមាំល្អ ដូចមនុស្សធំឡើយ។