ស្ត្រីដែលកំពុងតែត្រៀមខ្លួនធ្វើជាម៉ាក់ៗគេ ឬអ្នកទើបតែមានកូនជាលើកដំបូង ពេលឃើញកូនតូចយំមានច្បាស់ជាមានអារម្មណ៍ភិតភ័យណាស់ ព្រោះមិនដឹងមានរឿងអ្វីកើតឡើង។

សាស្ត្រាចារ្យវេជ្ជបណ្ឌិត គាន់ អូន ប្រធានផ្នែករោគស្ត្រី នៃមន្ទីរពេទ្យកាល់ម៉ែត បានឲ្យដឹងថា ទារកយំបណ្ដាលមកពីមូលហេតុច្រើនណាស់ក្នុងនោះមានឃ្លាន ហើមពោះ សត្វល្អិតទិចខាំ កន្ទបសើម និងឈឺ ឬមានអ្វីចូលត្រចៀកជាដើម។ ក្នុងនោះអ្នកម៉ាក់ថ្មីថ្មោងមួយចំនួន ដែលមិនទាន់មានបទពិសោធន៍ថែទាំកូន ពេលកូនយំភ័យស្លន់ស្លោខ្លាចមានបញ្ហាអ្វីធំដុំ ក៏នាំទៅរកពេទ្យ។

លោកបានបញ្ជាក់ថា ប្រសិនបើទារកមិនក្ដៅខ្លួន គ្មានស្នាមរបួស ហើយពោះក៏ធម្មតា បញ្ជាក់ថាកូនគ្រាន់តែឃ្លានប៉ុណ្ណោះ។ ទារកទើបនឹងកើតត្រូវការបៅរៀងរាល់ ២ ឬយ៉ាងយូរ ៣ ម៉ោងម្ដង ព្រោះក្រពះតូចងាយនឹងឆាប់ឆ្អែត ហើយក៏ឆាប់នោមអស់មកវិញដែរ។ ដូចនេះទារកភាគច្រើនយំ ដោយសារឃ្លានជ្រុល ជាពិសេសពេលយប់ បើម៉ាក់ៗគេងហួសម៉ោងកំណត់ត្រូវងើបមកបំបៅ។ ខាងក្រោមជាអាការៈពេលកូនឃ្លាន នឹងបញ្ចេញដូចជា៖

– យំងាកក្បាលទៅរកអ្វីដែលប៉ះថ្ពាល់

– យំបណ្ដើរលិឍមាត់ ឬដៃបណ្ដើរ

– បិទបើកៗមាត់

– បៀមដៃ

– ជញ្ជក់ដៃ ឬកន្សែង សម្លៀកបំពាក់

– បង្វិលខ្លួនចុះឡើងៗ។

សាស្ត្រាចារ្យវេជ្ជបណ្ឌិតបន្ថែមទៀតថា បើទារកយំនៅពេលយប់ ដោយសារឃ្លានជ្រុល អារម្មណ៍នឹងមួម៉ៅខ្លាំង យំក៏ខ្លាំង ហើយពិបាកលួងឲ្យបាត់ណាស់។ ក្រៅពីឃ្លាន ការងងុយណាស់ក៏បណ្ដាលឲ្យកូនយំខ្លាំង និងពិបាកក្នុងការលួងលោមដូចគ្នា បែបនេះត្រូវកំណត់ម៉ោងគេង និងបៅឲ្យត្រឹមត្រូវ ទើបមិនជួបបញ្ហាយំខ្លាំងរបស់កូន។ ចំណុចសំខាន់មួយទៀតដែលគួរតែប្រយ័ត្នគួរតែកុំបង្ខំឲ្យកូនបៅទាំងកំពុងយំ ព្រោះបណ្ដាលឲ្យឈ្លក់ ឬក្អែចេញមកវិញ ត្រូវលើកបី និងឲ្យបៅសន្សឹមៗ ហើយបើឈ្លក់ត្រូវប្រញាប់ដក់មាត់កូនចេញពីដោះភ្លាម។

ស្រីៗទើបមានកូន ត្រូវដឹងអាការៈពេលកូនឃ្លាន មិនមែនឲ្យតែយំដឹងតែឃ្លាននោះទេ