សម្រាប់ទារកតូចៗ អាហារដែលមានប្រយោជន៍បំផុតក្នុងការផ្ដល់សារធាតុចិញ្ចឹមនានាទៅឲ្យអាអូននោះគឺទឹកដោះម៉ាក់ៗ។ ផ្ទុយទៅវិញ ដ្បិតទឹកដោះម្ដាយជាថ្នាំទិព្វរបស់ទារក តែទឹកដោះម្ដាយមិនសូវជាសម្បូរវីតាមីន K ទេ។

វីតាមីន K មាននាទីជួយក្នុងកំណកឈាម ពោលគឺវាជួយសម្រួលទៅដល់កន្លែងណាដែលមានហូរឈាមក្នុងរាងកាយ។ បើអាអូនមិនទទួលបានវីតាមីនKគ្រប់គ្រាន់ វាអាចបង្កឲ្យមានបញ្ហាកង្វះវីតាមីន K នាំឲ្យមានការហូរឈាម ឬអាចបណ្ដាលឲ្យកកឈាមក្នុងខួរក្បាលទារកបានផងដែរ។ នេះបើតាមការឲ្យដឹងពីលោកស្រីវេជ្ជបណ្ឌិត កុសល កណិការ ឯកទេសជំងឺកុមារ សញ្ញាប័ត្រពីបារាំង។

ជាទូទៅ នៅពេលដែលទារកកើតមក គ្រូពេទ្យនឹងចាក់វីតាមីន K ឲ្យអាអូនគ្រប់រូប ប៉ុន្តែពេលខ្លះការចាក់វីតាមីនអាចមិនគ្រប់គ្រាន់ ហើយពេលបៅដោះម្ដាយក៏មិនសូវជាជួយបញ្ហានេះដែរ ព្រោះទឹកម្ដាយមិនសូវសម្បូរវីតាមីន K ដូចនេះម៉ាក់ៗ គួរតែបន្ថែមអាហារដែលសម្បុរទៅដោយវីតាមីន K ទៅក្នុងរបបអាហារប្រចាំថ្ងៃដូចជា៖

– បន្លែ ៖ ត្រសក់ សាលាដ Broccoli ស្ពៃក្ដោប (និយាយរួម បន្លែបៃតងៗ)

– ផ្លែឈើ ៖ ប៊ើរ គីវី ទំពាំងបាយជូរបៃតង…

– សាច់ ៖ ត្រី ស៊ុត ថ្លើម (គោ ជ្រូក) ទ្រូងទា ។ល។

បន្ថែមពីលើនេះ លោកស្រីបញ្ជាក់ថា ម្ដាយដែលបំបៅដោះកូនគ្រប់រូបញ៉ាំអាហារឲ្យបានគ្រប់មុខ (ទាំងបន្លែ និងសាច់) ទទួលយកវីតាមីន ឬជាតិរ៉ែដែលមានក្នុងអាហារទាំងនោះបានល្អ ដើម្បីបម្លែងជាទឹកដោះដែលមានសារធាតុចិញ្ចឹមខ្ពស់ឲ្យកូន។

អាហារ​សម្បូរវីតាមីន K ល្អបំផុតសម្រាប់ម៉ាក់ៗបំបៅដោះកូន

អាហារសម្បូរវីតាមីន K ល្អបំផុតសម្រាប់ម៉ាក់ៗបំបៅដោះកូន