ការលូតលាស់ និងអាកប្បកិរិយា
ស្នាមញញឹមរបស់កូនយើងប្រៀបបាននឹងពិភពលោកស្រស់បំព្រង។ ទោះមិនទាន់មានធ្មេញ តែស្នាមញញឹមអាអូនធ្វើឲ្យម៉ាក់ប៉ាមានកម្លាំងព្រឺស។ អាយុ ៦សប្តាហ៍អាអូនផ្តើមបញ្ចេញអារម្មណ៍ទៅតាមអ្វីដែលគេឃើញ ឧទាហរណ៍ យំ ឬនៅស្ងៀមពេលឮសំឡេងកណ្ដឹង។
១- បង្រៀនកូនពីអីខ្លះ?
គ្រូពេទ្យណែនាំឲ្យយើងដាក់កូនគេងលើគ្រែទោះបីមិនទាន់គេងលក់ក្តី។ ការធ្វើបែបនេះអាចជួយបង្រៀនកូនយើងឲ្យគេងដោយខ្លួនឯង។ អាអូននឹងលូតលាស់ល្អពេលគេងបានគ្រប់គ្រាន់។ មុនគេងយើងត្រូវងូតទឹកឲ្យកូន ម៉ាស្សា និងអានរឿងឲ្យកូនស្តាប់។ ការធ្វើបែបនេះអាចឲ្យកូនយើងម្ចាស់ការលើខ្លួនឯងទៅថ្ងៃមុខ។
សុខភាព និងសុវត្ថិភាព
២- ពិភាក្សាជាមួយគ្រូពេទ្យរឿងអីខ្លះ?
គ្រូពេទ្យសួរពីបញ្ហាមួយចំនួនដូចជា តើកូនយើងមានបញ្ហាមិនឡើងគីឡូ មានជំងឺអ្វីផ្សេងឬអត់? សួរជុំវិញចរិតលក្ខណៈ ការគេង ឬរបបអាហារកូនក្នុងអំឡុងពេលពីរសប្តាហ៍មុន។
៣- ត្រូវដឹងពីអីខ្លះ?
អាហារូបត្ថម្ភ៖ ម៉ាក់សម័យថ្មីច្បាស់ជាមិនមានពេលវេលាគ្រប់ដើម្បីបំបៅកូនដោយទឹកដោះ តែមិនមែនជាបញ្ហាត្រូវបារម្ភនោះទេ យើងអាចប្រើទឹកដោះដែលមានផ្ទុកសារធាតុបំប៉នគ្រប់គ្រាន់ជំនួសក៏បាន ព្រោះវាអាចឲ្យកូនយើងមានសុខភាព ឡើងទម្ងន់បានធម្មតា។ ទោះយ៉ាងណាយើងត្រូវប្រុងប្រយ័ត្នបន្តិច ព្រោះអាអូនបៅទឹកដោះច្រើនជ្រុលអាចថ្លោសខ្លាំង ឧស្សាហ៍ក្អែ ឈឺពោះ យកល្អគួរតែសួរគ្រូពេទ្យពីបរិមាណទឹកដោះគោកូនបៅតាមអាយុ។
ការដាក់កូនឲ្យគេង៖ ដាក់ឲ្យកូនគេងផ្ងារមុខឡើងលើ មានន័យថាយើងធ្វើបានល្អ ព្រោះការសិក្សាបានបង្ហាញថាគេងផ្ងារមុខឡើងលើអាចកាត់បន្ថយជំងឺមួយចំនួនដូចជា ក្តៅខ្លួន តឹងច្រមុះ ជំងឺឆ្លងក្នុងត្រចៀក និងជួយមិនឲ្យកូនក្អែពេលគេង។
ដង្ហើមកូន៖ អាអូនទើបកើតដកដង្ហើមបានប្រហែល ៤០ដង/នាទីពេលមិនទាន់គេង ឯពេលគេគេងដកដង្ហើមបានត្រឹមតែ ២០ដង/នាទី។ យើងត្រូវសង្កេតមើលដង្ហើមកូនពេលគេង តើដកដង្ហើមទៀងទាត់ទេ។
អនាម័យរង្វង់រន្ធផ្ចិត៖ សម្អាតតំបន់ជុំវិញរន្ធផ្ចិតបានស្អាត ស្ងួត និងមានអនាម័យ នោះការឆ្លងរោគមិនងាយកើតឡើងឡើយ។ បើយើងឃើញតំបន់ផ្ចិតឡើងក្រហម ឬក្តៅ ត្រូវយកកូនទៅជួបគ្រូពេទ្យជាបន្ទាន់។ ជាទូទៅទងផ្ចិតនឹងស្ងួតហើយរបេះចេញដោយខ្លួនឯងពេលអាអូនមានអាយុប្រហែល ១-២សប្តាហ៍។ ពេលទងផ្ចិតរបូតយើងនឹងឃើញមានឈាម ឬជាតិរម្អិលបន្តិចបន្តួចហូរចេញ តែមិនបាច់បារម្ភពីបញ្ហានេះទេ។ ប៉ុន្តែបើរន្ធផ្ចិតនៅចំហ និងសើមបន្ទាប់ពី២សប្តាហ៍ក្រោយទងផ្ចិតរបូតនោះ យើងត្រូវយកកូនទៅជួបគ្រូពេទ្យជាបន្ទាន់។
ការព្រួយបារម្ភ
៤- អីខ្លះត្រូវបារម្ភ?
ទារកគេង៖ អង្គុយមើលកូនគេងជាអារម្មណ៍មានក្តីសុខបំផុតសម្រាប់ម៉ាក់ៗគ្រប់រូប។ មានពេលខ្លះកូនគេងក្នុងដៃយើងពេលកំពុងធ្វើការ ដូចនេះយើងត្រូវដាក់កូនឲ្យគេងលើគ្រែហើយចាំប្រហែល១០នាទី ចាំចាកចេញពីកូន។
– ប្រើអង្រឹង ឬរទះធំងាយស្រួលលើកកូនចេញចូល
– មិនត្រូវប្រើភ្លើងភ្លឺខ្លាំងក្នុងបន្ទប់កូន
– លួងកូនឲ្យគេងក្នុងដៃយើងរួចដាក់ក្នុងអង្រឹង
– បើអាចច្រៀងបំពេរបានកាន់ល្អ។
ទារកយំ៖ ការសិក្សាបានបង្ហាញថា កូនៗដែលមានម៉ាក់បីបមក្នុងដៃប្រហែល ៣ម៉ោង/ថ្ងៃ អូនតូចនឹងយំតិចជាងទារកដទៃ។ អាអូនតែបន្តយំទោះជាមានអាយុ ៦សប្តាហ៍ហើយក្តី។ អាអូននៅតូចមិនទាន់ក្តីទេ ដូច្នេះពេលយំម្តងៗយើងពិបាករកមូលហេតុណាស់។ ទោះយ៉ាងណាម៉ាក់ប៉ាត្រូវរកវិធីលួងកូនកុំឲ្យយំ ដោយសាកតាមតិចនិកខាងក្រោមនេះ៖
– ត្រូវរកមូលហេតុកូនយំ
– ផ្តល់ភាពកក់ក្តៅឲ្យកូនដោយយកកន្សែងមករុំ
– ថ្នាក់ថ្នមកូនឲ្យបានច្រើន
– ដាក់កូនគេងឲ្យស្រួលកុំឲ្យឆ្អល់ពោះ
– ឲ្យកូនបៅដោះ ឬមានក្បាលដោះជ័រសម្រាប់បៅ
– រកកន្លែងមានខ្យល់បរិសុទ្ធសម្រាប់កូនតូច
– ពេលបំបៅដោះត្រូវគោះខ្នងកូនដើម្បីកុំឲ្យកូនលេបខ្យល់ចូលច្រើន
– លេងសើចជាមួយកូនឲ្យបានច្រើន។
ជួបគ្នាពេលក្រោយ អំពីការវិវត្តរបស់កូននៅសប្តាហ៍ទី៧!
[embed-health-tool-vaccination-tool]
